ສະປີດ ເອັຟຊີ ( Speed FC ) ສະໂມສອນບານເຕະເຍົາວະຊົນລາວ ເປັນເຈົ້າພາບຈັດການແຂ່ງຂັນບານເຕະເຍົາວະຊົນ ຮຸ່ນອາຍຸບໍ່ເກີນ 13-14 ປີ ຂຶ້ນໃນຕອນແລງຂອງວັນທີ 4 ສິງຫາ 2024 ທີ່ເດີ່ນບານເຕະ ສະຫະພັນບານແຫ່ງຊາດລາວ ເພື່ອໃຫ້ 4 ສະໂມສອນໄດ້ມີການອຸ່ນເຄື່ອງ ແລະ ກຽມທີມໃສ່ລາຍການໃຫຍ່ ມາສດ້າ ຊາເລັນ 2024 ( Mazda Challenge Cup 2024 ) ທີ່ຈະມີຂຶ້ນໃນລະຫວ່າງວັນທີ 10-11 ສິງຫາ 2024 ທີ່ສະໜາມຈໍາປີ-ຈໍາປາ ເຂດສະໜາມກິລາແຫ່ງຊາດຫຼັກ 16.
ໃຫ້ກຽດເຂົ້າຮ່ວມໃນການແຂ່ງຂັນຄັ້ງນີ້ນໍາໂດຍ ທ່ານ ນາງ ມະນີຈັນ ແກ້ວລະຄອນ ຜູ້ບໍລິຫານຂອງສະໂມສອນ ສະປີດ ເອັຟຊີ ພ້ອມດ້ວຍຄະນະ, ມີບັນຫາຕ່າງໜ້າຄະນະ, ນັກກິລາ ແລະ ຄູຝຶກ ຈາກ 4 ສະໂມສອນຄື: ຄິດສ໌ຕຽນ ( ທີມຈາກໄທ ), ສະປີດ ເອັຟຊີ, ນິນຈາ ເອັຟຊີ ແລະ ມາສເຕີ 7 ເອັຟຊີ ລວມເຖິງພໍ່ແມ່ຜູ້ປົກຄອງ ແລະ ແຟນບານເຂົ້າຮ່ວມຫຼາຍກວ່າ 100 ຄົນ.
ໂອກາດດັ່ງກ່າວ ທ່ານ ນາງ ມະນີຈັນ ແກ້ວລະຄອນ ຜູ້ບໍລິຫານຂອງສະໂມສອນ ສະປີດ ເອັຟຊີ ໃຫ້ສໍາພາດວ່າ: ງານຄັ້ງນີ້ຈັດຂຶ້ນໃນຮຸ່ນໃຫຍ່ 13-14 ປີ ແຂ່ງແບບ 11 ຄົນເປັນຄັ້ງທໍາອິດໃຫ້ນັກກິລາໄດ້ສໍາຜັດການແຂ່ງຂັນແບບ 11 ຄົນ ເພື່ອກຽມຄວາມພ້ອມໃຫ້ແຕ່ລະທີມກຽມເຂົ້າຮ່ວມການແຂ່ຂງັນບານເຕະລາຍການໃຫຍ່ ມາສດ້າ ຊາເລັນ 2024 ເພາະທັງ 4 ທີມແມ່ນໄດ້ສົ່ງເຂົ້າຮ່ວມລາຍການດັ່ງກ່າວທີ່ຈະຈັດຂຶ້ນໃນລະຫວ່າງວັນທີ 10-11 ສິງຫາ 2024 ພ້ອມທັງຍັງເປັນການເປີດໂອກາດໃຫ້ກັບນັກເຕະເຍົາວະຊົນກໍຄືຮຸ່ນສືບທອດ ໄດ້ມີໂອກາດມາແຂ່ງຂັນບານເຕະ ແລະ ມີເວທີໃຫ້ນ້ອງໆ ເພື່ອຫ່າງໄກຈາກສິ່ງເສບຕິດ ແລະ ພັດທະນາທັກສະ ເພື່ອກ້າວເປັນນັກເຕະໃນລີກ ຫຼື ທີມຊາດໃນຕໍ່ໜ້າ.
ຜ່ານການແຂ່ງຂັນປາກົດວ່າ:
+ຮອບທໍາອິດ:
– ສະປີດ ເອັຟຊີ ບຽດເອົາຊະນະ ຄິດສ໌ຕຽນ ( ທີມຈາກໄທ ) 1-0
– ນິນຈາ ເອັຟຊີ ເອົາຊະນະ ມາສເຕີ 7 ເອັຟຊີ 3-1
+ຮອບຊີງຊະນະເລີດ ແລະ ຮອບຊີງອັນດັບ 3
-ຮອບຊີງຊະນະເລີດ: ນິນຈາ ເອັຟຊີ ບຽດເອົາຊະນະ ສະປີດ ເອັຟຊີ 1-0 ຄວ້າແຊັມ ພ້ອມຂັນແຊັມໄປຄອງ
-ຮອບຊີງອັນດັບ 3: ມາສເຕີ 7 ເອັຟຊີ ເອົາຊະນະ ຄິດສ໌ຕຽນ ( ທີມຈາກໄທ ) 2-0 ຄວ້າອັນດັບ 3 ໄປຄອງ
ສໍາລັບ ພາລະກິດຕໍ່ໄປຂອງທັງ 4 ທີມກຽມເຂົ້າຮ່ວມການແຂ່ງຂັນບານເຕະ Mazda Challenge Cup 2024 ທີ່ຈະມີຂຶ້ນໃນລະຫວ່າງວັນທີ 10-11 ສິງຫາ 2024 ທີ່ສະໜາມຈໍາປີ-ຈໍາປາ ເຂດສະໜາມກິລາແຫ່ງຊາດຫຼັກ 16 ໃນຮຸ່ນອາຍຸບໍ່ເກີນ 13-14 ປີ ແຕະແບບ 11 ຄົນຄັ້ງທໍາອິດ ໂດຍ ສະປີດ ຢູ່ສາຍ Fຮ່ວມກັບ ນິນຈາ ເອັຟຊີ ແລະ BN ອະຄາເດມີ, ສ່ວນ ມາສເຕີ 7 ເອັຟຊີ ຢູ່ສາຍ A ຮ່ວມກັບ ມາສດ້າ ຈີບີ ເອັຟຊີ, ເຄເອັມທີ ເອັຟຊີ ແລະ ຊຸບເປີສະຕ້າ ເອັຟຊີ.
ຂ່າວ-ຮູບຈາກ: Larh Creators
