ແຂວງຄຳມ່ວນໄດ້ຈັດພິທີມອບ-ຮັບ ວຽກຄຸ້ມຄອງພະນັກງານ-ລັດຖະກອນ ໃຫ້ເມືອງຮັບຜິດຊອບ ແລະ ແກ້ໄຂໂດຍກົງ ໄດ້ຈັດຂຶ້ນໃນວັນທີ 18 ກໍລະກົດ 2024 ທີ່ຫ້ອງວ່າການແຂວງຄໍາມ່ວນ ເປັນກຽດມອບ ໂດຍ ທ່ານ ວົງເພັດ ຈິດປັນຍາ ຮອງເລຂາພັກແຂວງ, ຜູ້ຊີ້ນໍາວຽກການເມືອງ-ແນວຄິດ, ວຽກພັກ-ພະນັກງານ, ຮັບໂດຍບັນດາທ່ານເຈົ້າເມືອງ-ຮອງເຈົ້າເມືອງໃນ 10 ເມືອງ, ມີບັນດາພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ.
ສໍາລັບວຽກຄຸ້ມຄອງພະນັກງານ-ລັດຖະກອນໃຫ້ເມືອງຮັບຜິດຊອບ ແລະ ແກ້ໄຂໂດຍກົງຈໍານວນ 9 ວຽກໃນຄັ້ງນີ້ປະກອບມີ : ການປະຕິບັດນະໂຍບາຍອຸດໜູນເທື່ອດຽວ. ການປະຕິບັດນະໂຍບາຍຕໍ່ລັດຖະກອນທີ່ເຮັດວຽກກັບທາດເບື່ອ, ເຄມີ ແລະ ສານພິດຕ່າງໆ. ການປະຕິບັດນະໂຍບາຍຕໍ່ລັດຖະກອນເສຍກຳລັງແຮງງານ, ການເລື່ອນລັດຖະກອນຝຶກງານຂື້ນເປັນລັດຖະກອນສົມບູນ, ການເລື່ອນຊັ້ນ-ຂັ້ນເງິນເດືອນປົກກະຕິໃຫ້ລັດຖະກອນ, ການອະນຸມັດດັດແກ້ຊັ້ນ-ຂັ້ນເງິນເດືອນຕາມອາຍຸການ (ພົ້ນຊັ້ນ), ການອະນຸມັດດັດແກ້ຊັ້ນ-ຂັ້ນເງິນເດືອນຕາມການສອບເສັງ, ການອະນຸມັດຕັດແກ້ຊັ້ນ-ຂັ້ນເງິນເດືອນຕາມຕຳແໜ່ງບໍລິຫານ ແລະ ການອະນຸມັດດັດແກ້ຊັ້ນ-ຂັ້ນເງິນເດືອນຕາມການຕົກຄ້າງເລື່ອນຂັ້ນປົກກະຕິ ເຊິ່ງການມອບໂອນຄັ້ງນີ້ແມ່ນປະຕິບັດຕາມຕາມຂໍ້ຕົກລົງ ຂອງນາຍົກລັດຖະມົນຕີ ສະບັບເລກທີ 105/ນຍ, ລົງວັນທີ 17 ສິງຫາ 2023, ຄໍາແນະນໍາ ຂອງກະຊວງພາຍໃນ ສະບັບເລກທີ 15/ພນ, ລົງວັນທີ 08 ພະຈິກ 2016, ວ່າດ້ວຍການຄຸ້ມຄອງພະນັກງານ-ລັດຖະກອນທີ່ມອບໃຫ້ບັນດາກະຊວງ, ອົງການທຽບເທົ່າກະຊວງ ແລະ ອົງການປົກຄອງທ້ອງຖິ່ນ ຮັບຜິດຊອບ ແລະ ແກ້ໄຂໂດຍກົງ.
ພ້ອມນີ້ກໍ່ເພື່ອເປັນການຈັດຕັ້ງຜັນຂະຫຍາຍ ການແບ່ງຂັ້ນຄຸ້ມຄອງຕາມນິຕິກຳດັ່ງກ່າວໃຫ້ສອດຄ່ອງຕາມລະບຽບການ, ເພື່ອແນໃສ່ໃຫ້ພະນັກງານ-ລັດຖະກອນທີ່ກ່ຽວຂ້ອງ ຮັບຮູ້-ເຂົ້າໃຈ ນໍາໄປຈັດຕັ້ງປະຕິບັດຢ່າງມີຄຸນນະພາບ ແລະ ໄດ້ຮັບປະສິດທິຜົນ. ພ້ອມນີ້ ບັນດາຜູ້ເຂົ້າຮ່ວມຍັງໄດ້ຮັບຟັງບົດລາຍງານກ່ຽວກັບການຈັດຕັ້ງປະຕິບັດວຽກງານຄຸ້ມຄອງພະນັກງານ-ລັດຖະກອນ ໃນໄລຍະຜ່ານມາ ພ້ອມທັງການປະກອບຄໍາຄິດເຫັນ ໂດຍສະເພາະບັນຫາຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດຕໍ່ວຽກງານດັ່ງກ່າວອີກດ້ວຍ.
