ທັບນັກກີລານັກສຶກສາລາວບໍໍ່ທໍາມະດາ ຄວ້າ 3 ຫຼຽນຄໍາຢູ່ອັນດັບທີ 7 ຈາກ 11 ປະເທດໃນງານ ມ.ອາຊຽນ 2024

43

ທັບນັກກີລານັກສຶກສາລາວ ຫຼື ທັບນັກກີລາມະຫາວິທະຍາໄລລາວ ບໍໍ່ທໍາມະດາຄວ້າ 3 ຫຼຽນຄໍາ, 2 ຫຼຽນເງິນ ແລະ 6 ຫຼຽນທອງ ຢູ່ອັນດັບທີ 7 ຈາກ 11 ປີິໃນງານ ມ.ອາຊຽນ ຄັ້ງທີ 12 ປະຈໍາປີ 2024 ໂດຍພິທີປິດສາກລົງຢ່າງເປັນທາງການ ໃນຕອງແລງວັນທີ 6 ກໍລະກົດ 2024 ທີ່ເມືອງສຸລາບາຢາ-ມາລັງ ແຂວງຈາວາຕາເວັນອອກ (Java East) ປະເທດອິນໂດເນເຊຍ ພາຍຫຼັງໄດ້ເປີດສາກໃນວັນທີ 25 ມິຖຸນາ 2024 ແລະ ໄດ້ມອບທຸງເຈົ້າພາບຕໍ່ໃຫ້ກັບ ມາເລເຊຍ ເຈົ້າພາບຄັ້ງທີ 13 ທີ່ຈະຈັດຂຶ້ນໃນປີ 2026.

ສໍາລັບທັບນັກກິລາ ມະຫາວິທະຍາໄລລາວ ສາມາດຄວ້າມາໄດ້ແລ້ວ 3 ຫຼຽນຄໍາ ຈາກກິລາເປຕັງ ລາຍການຊຸດຕິງຊາຍ, ຄູ່ຊາຍ ແລະ ຄູ່ປະສົມ ຊາຍ 1 ຍິງ 1; 2 ຫຼຽນເງິນ ຈາກກິລາເປຕັງ ລາຍການທີມຊຸດຍິງ ແລະ ຄູ່ຍິງ ແລະ 6 ຫຼຽນທອງຈາກກິລາເປຕັງ ລາຍການດ່ຽວຍິງ, ດ່ຽວຊາຍ, ທີມປະສົມ ຊາຍ 1 ຍິງ 2, ຊາຍ 2 ຍິງ 1, ກິລາແລ່ນ-ລານ ລາຍການເຕັ້ນຍາວ ແລະ ປັນຈັກຊີລັດ ລາຍການຕໍ່ສູ້ຊາຍ 65 ກິໂລ ຈັດຢູ່ອັນດັບທີ 7 ຂອງຕາຕະລາງຫຼຽນ.

ຈາກຜົນງານດັ່ງກ່າວເຮັດໃຫ້ ທັບນັກກິລາລາວ ສາມາດສ້າງຜົນງານໄດ້ດີເກີນຄາດ ເນື່ອງຈາກໃນເບື້ອງຕົ້ນທາງລັດຖະບານ ກໍຄື ກະຊວງສຶກສາທິການ ແລະ ກິລາ ແລະ ສະຫະພັນກິລາມະຫາວິທະຍາໄລລາວ ໄດ້ຕັ້ງເປົ້າໝາຍໄວ້ພຽງ 2 ຫຼຽນຄໍາ ຈາກກິລາ 4 ປະເພດທີ່ສົ່ງເຂົ້າຮ່ວມແຂ່ງຂັນໃນ ມ.ອາຊຽນ 2024 ປະກອບມີ ກິລາ ແລ່ນ-ລານ, ເປຕັງ, ປັນຈັກສີລັດ ແລະ ກິລາບານບ້ວງ 3X3 ລວມທັງໝົດ 41 ຄົນ.

ສ່ວນເຈົ້າຄອງຫຼຽນຄໍາເປັນຂອງ ອິນໂດເນເຊຍ ເປັນເຈົ້າພາບ ທີ່ໄດ້ຄອງເຈົ້າຫຼຽນຄໍາ ມີ 126 ຫຼຽນຄໍາ, 99 ຫຼຽນເງິນ ແລະ 71 ຫຼຽນທອງ; ອັນດັບ 2 ໄທ ມີ 53 ຫຼຽນຄຳ, 49 ຫຼຽນເງິນ ແລະ 29 ຫຼຽນທອງ; ອັນດັບ 3 ມາເລເຊຍ 38 ຫຼຽນຄໍາ, 47 ຫຼຽນເງິນ ແລະ 62 ຫຼຽນທອງ.
ຂ່າວ-ຮູບຈາກ: ດາວຫວຽດ; ຮຽບຮຽງ: Larh Creators