ເປີດຊ້ອມຮົບຮ່ວມ​ ລາວ-ຈີນ “ໂລ້ກໍາບັງມິດຕະພາບ -2024’

33

ພິທີເປີດຊ້ອມຮົບຮ່ວມລາວ-ຈີນ ໃນຫົວຂໍ້ “ໂລ້ກໍາບັງມິດຕະພາບ -2024” ໄດ້ເປີດຂຶ້ນຢ່າງເປັນທາງການ, ໃນວັນທີ 5 ກໍລະກົດ 2024.

ເປັນປະທານຂອງ ສະຫາຍ ພົນໂທ​ ສຈ ປອ ວົງຄຳ​ ພົມມະກອນ​  ຮອງລັດຖະມົນຕີ​ກະຊວງປ້ອງກັນປະເທດ ແຫ່ງ ສປປ ລາວ, ມີທ່ານ ນາງ ຟາງ ຫົງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ​ ຈີນ​ ປະຈໍາລາວ, ມີສະຫາຍ​ ພົນຕີ ເຈີ້ງ​ ກົວເຢ່​ ຮອງຜູ້​ບັນຊາການ​ກອງ​ປະຈຳ​ ຮົງກົງ​ ເຂດສູ້ຮົບໃຕ້ ກອງທັບ​ປົດປ່ອຍ​ປະຊາຊົນ​ຈີນ​ , ມີຄະນະນຳກະຊວງ,​ 4ກົມໃຫຍ່,​ ຫ້ອງວ່າການກະຊວງປ້ອງກັນປະເທດ, ອົງການປົກຄອງທ້ອງຖິ່ນ, ແຂກຖືກເຊີນ, ຕະຫຼອດຮອດນາຍ ແລະ ພົນທະຫານ ສອງກອງທັບລາວ-ຈີນເຂົ້າຮ່ວມ.


ສະຫາຍ ພົນຕີ ພັນແສງ ບຸນພັນ ຮອງຫົວຫນ້າ​ກົມໃຫຍ່​ເສນາທິການ​ກອງທັບປະຊາຊົນລາວ, ຮອງຫົວໜ້າຄະນະຊີ້ນຳລວມການຊ້ອມຮົບຮວ່ມລາວ-ຈີນ​ ໄດ້ກ່າວຄຳເຫັນໃນພິທີວ່າ: ການເຄື່ອນໄຫວຊ້ອມຮົບ “ໂລ້ກໍາບັງມິດຕະພາບ -2024” ຄັ້ງນີ້ ກໍເພື່ອແນໃສ່ເສີມຂະຫຍາຍສາຍພົວພັນມິດຕະພາບການຮ່ວມມືຮອບດ້ານລະຫວ່າງສອງຊາດ, ສອງພັກ ,ສອງກອງທັບ ແລະ ປະຊາຊົນສອງຊາດ ລາວ-ຈີນ, ຈີນ-ລາວ, ໃຫ້ນັບມື້ເພີ່ມທະວີຄວາມໜັກແໜ້ນ, ໝັ້ນຄົງທະນົງແກ່ນຍິ່ງໆຂຶ້ນ. ໂດຍສະເພາະແມ່ນການຮ່ວມມືທາງດ້ານການທະຫານ, ສ້າງຄວາມເຊື່ອໝັ້ນທັງເປັນການເພີ່ມທະວີການຊ່ວຍເຫຼືອເຊິ່ງກັນ ແລະ ກັນ ໃນຂົງເຂດວຽກງານປ້ອງກັນຊາດ, ສະນັ້ນການຊ້ອມຮົບ “ໂລ້ກຳບັງມິດຕະພາບ-2024” ແມ່ນມີຄວາມຈໍາເປັນ ແລະ ສໍາຄັນຢ່າງຍິ່ງ ເພາະເປັນການຍົກລະດັບການພັດທະນາກຳລັງເພີ່ມທະວີຄວາມເຂັ້ມແຂງ ຮອບດ້ານໃຫ້ແກ່ກອງທັບປະຊາຊົນລາວກ້າວຂຶ້ນຕາມທິດສ້າງກອງທັບປະຊາຊົນລາວໃຫ້ກາຍເປັນກອງທັບປະຕິວັດ ທີ່ມີແບບແຜນທັນສະໄໝ.

ໄປຄຽງຄູ່ກັບການຫັດແອບ ສອງກຳລັງຍັງຈະມີການເຄື່ອນໄຫວໃນຂົງເຂດວຽກງານການເມືອງ-ນໍາພາແນວຄິດ, ເປັນຕົ້ນແມ່ນການແລກປ່ຽນວັດທະນະທຳ, ສິລະປະ – ວັນນະຄະດີ, ກິລາ ແລະ ການເຄື່ອນໄຫວກິດຈະກຳຕ່າງໆ ຕະຫຼອດຮອດການດໍາລົງຊີວິດປະຈຳວັນ, ແລກປ່ຽນຂໍ້ມູນຂ່າວສານ, ການສື່ສານ, ແລກປ່ຽນພາສາຄຳເວົ້າໃຫ້ມີຄວາມເຂົ້າໃຈເຊິ່ງກັນ ແລະ ກັນ.​ ນອກຈາກນີ້ສະຫາຍ ພົນຕີ ພັນແສງ ບຸນພັນ ຍັງຮຽກຮ້ອງມາຍັງບັນດາສະຫາຍນາຍ ແລະ ພົນທະຫານ ຂອງສອງກອງທັບ ລາວ – ຈີນ ຈົ່ງພ້ອມກັນຍົກສູງນ້ຳໃຈຄວາມເປັນເຈົ້າການ ໃນການຮັບຜິດຊອບໜ້າທີ່ຂອງຕົນ, ປະຕິບັດຂໍ້ກຳນົດກົດລະບຽບ, ບາດກ້າວການເຄື່ອນໄຫວຊ້ອມຮົບຮ່ວມກັນຢ່າງເຂັ້ມງວດ, ພ້ອມກັນເຮັດສຳເລັດໜ້າທີ່ ແລະ​ ຮັບປະກັນໄດ້ຄວາມປອດໄພ100%.


ໃນຕອນທ້າຍພິທີ, ສະຫາຍຄະນະປະທານທັງ 2 ຝ່າຍ ໄດ້ລົງສໍາພັດມື-ຖ່າຍຮູບຮ່ວມກັບກັບຄະນະຮັບຜິດຊອບ-ກຳລັງຝຶກຊ້ອມ ແລະ ທ່ຽວຊົມການວາງສະແດງພາຫະນະ-ອາວຸດ ຈໍານວນໜຶ່ງ ຢູ່ດ້ານໜ້າຜາມໄຊ.

ການຊ້ອມຮົບຮ່ວມ ຈີນ-ລາວ “ໂລ້ກຳບັງມິດຕະພາບ 2024” ຈະໄດ້ດໍາເນີນເປັນເວລາ 15 ວັນ, ນັບຕັ້ງແຕ່ ວັນທີ​5-18​ ກໍລະກົດ 2024 ຈຶ່ງສໍາເລັດ.
ທີ່ມາ:ວິທະຍຸກະຈາຍສຽງກອງທັບປະຊາຊົນລາວ