ໃນວັນທີ 9 ກໍລະກົດ 2024 ທ່ານ ບຸນຍະວັດ ນິລະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ລາຍງານໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນ ຊຸດທີ II, ໂດຍການເປັນປະທານຂອງທ່ານ ອານຸພາບ ຕຸນາລົມ ປະທານສະພາປະຊາຊົນ ນວ.
ທ່ານ ບຸນຍະວັດ ນິລະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ລາຍງານວ່າ: ສາເຫດຂອງການເກີດ ນໍ້າຖ້ວມຂັງ ໃນນະຄອນຫຼວງວຽງຈັນ ແມ່ນມີຫຼາຍສາເຫດ ເຊິ່ງສະເພາະຮ່ອງລະບາຍນໍ້າ ໃນຕົວເມືອງ ມີດັ່ງນີ້:
1). ພື້ນທີ່ຂອງຕົວເມືອງແມ່ນມີຄວາມຮາບພຽງ ແລະ ມີຄວາມເນີນ ປະມານ 2% ໃນເວລາຝົນຕົກແຮງນໍ້າບໍ່ສາມາດລະບາຍໄດ້ທັນ;
2). ມີການປ່ຽນແປງດິນຟ້າອາກາດເຮັດໃຫ້ປະລິມານນໍ້າຝົນເພີ່ມຂຶ້ນທຸກໆປີ;
3). ຮ່ອງລະບາຍນໍ້າທີ່ມີຢູ່ແລ້ວ ຂາດການອານາໄມຢ່າງຕໍ່ເນື່ອງເກີດມີການອຸດຕັນ, ນໍ້າໄຫຼບໍ່ສະດວກ ແລະ ຕື້ນເຂີນ;
4). ຮ່ອງນໍ້າທໍາມະຊາດຈຳນວນໜຶ່ງຍັງບໍ່ໄດ້ຮັບການປັບປຸງ ແລະ ກໍ່ສ້າງເປັນລະບົບ, ມີການບຸກລຸກຂອງປະຊາຊົນກວມເອົາເຂດສະຫງວນຮ່ອງ;
5). ມີການຖົມດິນຊະຊາຍ ຕັນແລວນໍ້າໄຫຼ ແລະ ມີການຖົມບຶງ-ໜອງ ທີ່ເປັນບ່ອນພັກນໍ້າຢູ່ໃນຕົວເມືອງເປັນຕົ້ນ: ໜອງຈັນ, ໜອງບອນ, ໜອງທາ, ບຶງທາດຫຼວງ ແລະ ມີຫັນປ່ຽນດິນກະສິກຳເປັນດິນປຸກສ້າງເພີ່ມຂຶ້ນ;
6). ມີການເທເບຕົງປິດຮ່ອງລະບາຍນໍ້າ ແລະ ວາງທໍ່ນໍ້າ ເພື່ອນໍາໃຊ້ເປັນທີ່ຢູ່ອາໄສ, ບ່ອນຈອດລົດ ບໍ່ສາມາດລົງໄປອານາໄມໄດ້;
7). ບາງພື້ນທີ່ ທີ່ນໍ້າຖ້ວມຂັງບໍ່ມີຮ່ອງລະບາຍນໍ້າ ແລະ ບໍ່ເຊື່ອມຈອດກັນ.
+ສຳລັບຮ່ອງລະບາຍນໍ້າໜ້າທາງ:
1). ປັດຈຸບັນ ທໍ່ລະບາຍນໍ້າຂ້າງທາງມີຂະໜາດໜ້ອຍບໍ່ສາມາດຮອງຮັບປະລິມານນໍ້າຝົນໃນເວລາຝົນຕົກໜັກ;
2). ທໍ່ລະບາຍນໍ້າຂ້າງທາງ ທີ່ມີປັດຈຸບັນນີ້ແມ່ນຮັບທັງນໍ້າເປື້ອນ ແລະ ນໍ້າຝົນ;
3). ບາງເສັ້ນທາງ ທໍ່ນໍ້າບໍ່ເຊື່ອມຈອດກັນ, ມີບ່ອນຕໍ່າບ່ອນສູງ ແລະ ຂະໜາດບໍ່ເທົ່າກັນ;
4). ຂາດການອານາໄມເປັນປະຈຳເຮັດໃຫ້ເກີດມີການສະສົມຂອງການຕົກຕະກອນ, ມີຂີ້ເຫຍື້ອອຸດຕັນໃນລະບົບຮ່ອງລະບາຍນໍ້າຂ້າງທາງ;
5). ຂຸມພັກນໍ້າແມ່ນມີໄລຍະຫ່າງກັນ, ມີບາງຈຸດຖືກທັບຖົມດ້ວຍຕະກອນ ແລະ ສິ່ງເສດເຫຼືອຕ່າງໆ.
