ປິດສາກບານເຕະ 4 ພາກສ່ວນ ຊີງຂັນປະທານສະໂມສອນ ເອັນແອນເອັນ ເອັຟຊີ 2024 IMC UNITED ຄອງແຊັມ

28

ທີມສູນໂຄສະນາຂ່າວສານການສຶກສາ ແລະ ກີ ຫຼື IMC UNITED ຄອງແຊັມການແຂ່ງຂັນເຕະບານມິດຕະພາບ 4 ພາກສ່ວນ ຊີງຂັນປະທານສະໂມສອນ ເອັນແອນເອັນ ເອັຟຊີ ໄປຄອງ ເມື່ອວັນທີ 8 ກໍລະກົດ 2024 ເພື່ອສ້າງຂະບວນການສະເຫຼີມສະຫຼອງວັນຄ້າຍວັນເກີດປະທານສຸພານຸວົງ ຄົບຮອບ 115 ປີ ແລະ ວັນສ້າງຕັ້ງກີລາລາວ ຄົບຮອບ 58 ປີ ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນຍິ່ງຂຶ້ນ.

ພິທີດັ່ງກ່າວ ໃນຕອນແລງວັນທີ 8 ກໍລະກົດ 2024 ທີ່ສະໜາມກີລາບານເຕະຫຍ້າທຽມ ເບສະຫວັນ ເອັຟຊີ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ບຸນມີ ໄຊຍະວົງ ປະທານສະໂມສອນ ເອັນແອນເອັນ ເອັຟຊີ ທັງເປັນປະທານຈັດງານ, ທ່ານ ວິໃນ ທິບດາລາ ຫົວໜ້າສ່ວຍສາອາກອນ ນະຄອນຫຼວງວຽງຈັນ, ທ່ານ ສຸກສາຄອນ ສີປະເສີດ ຜູ້ອຳນວຍການສູນໂຄສະນາຂ່າວສານການສຶກສາ ແລະ ກີລາ ທັງເປັນປະທານທີມ IMC UNITED, , ທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນກີລາບານເຕະຄົນພິການຕາແຫ່ງຊາດ ທັງເປັນເຈົ້າຂອງສະໜາມກີລາຫຍ້າທຽມ ເບສະຫວັນ ເອັຟຊີ ແລະ ທ່ານ ໄພລະຄອນ ບຸນວິຊຽນ ເຈົ້າຂອງຮ້ານຂາຍເຄື່ອງກີລາພິມລາຍ ໄອ-ສະປອດ ທີ່ໄດ້ມອບຊຸດແຂ່ງໃຫ້ກັບ 3 ພາກສ່ວນຈໍານວນ 100 ກວ່າຊຸດມູນຄ່າເກືອບ 20 ລ້ານກີບ ຕະຫຼອດຮອດນັກກີລາແຕ່ລະພາກສ່ວນ ເຂົ້າຮ່ວມຢ່າງພ້ອມພຽງ.

ສໍາລັບ ລາຍການດັ່ງກ່າວ ມີນັກກີລາ 4 ພາກສ່ວນ ຄື: ທີມສ່ວຍສາອາກອນ ນະຄອນຫຼວງວຽງຈັນ, ທີມຮ້ານຂາຍເຄື່ອງກີລາ ໄອ-ສະປອດ, ທີມລາວສະປອດ ມີເດຍ ແລະ ທີມ IMC UNITED ຊຶ່ງຮູບແບບການແຂ່ງຂັນແມ່ນຈັບສະຫຼາກປະຄົບຄູ່ແຂ່ງຂັນ ທີມຊະນະຜ່ານເຂົ້າໄປຊີງຊະນະເລີດ ແລະ ທີມເສຍ ແມ່ນໄປຊີງອັນດັບທີ 3. ຜ່ານການແຂ່ງຂັນຜົນປະກົດວ່າ ຊະນະເລີດ ທີມ IMC UNITED, ຮອງຊະນະເລີດ ທີມລາວສະປອດມີເດຍ, ອັນດັບທີ 3 ທີມສ່ວຍສາອາກອນ ນະຄອນຫຼວງ ແລະ ອັນດັບທີ 4 ທີມໄອ-ສະປອດ ເອັຟຊີ.