ໂດ່ນັດ ຊະນະ ຈຳນຽນ ຄວ້າແຊັມ ເທັນນິດ ອາໂນໄທ ໂອເພັນ 2024 ພ້ອມລົດຈັກໄຟຟ້າ ອິນດາຣາ ໄປຄອງ

100

ທ້າວ ໄຊສະຫວັດ ຈັນສົມພູ ຫຼື ໂດ່ນັດ ນັກກິລາເທັນນິດດາວຫຮຸ່ງ ໄຟແຮງທີ່ກຳລັງຂຶ້ນມາໃໝ່ ສາມາດປາບ ນັກກິລາຮຸ່ນອ້າຍ 2-0 ເຊັດ ດ້ວຍຄະແນນ 6-1 ແລະ 6-4 ຄະແນນ ຄວ້າຂັນລາງວັນຊະນະເລີດ ລາຍການ ເທັນນິສ ອາໂນໄທ ໂອເພັນ 2024 ຊິງເງິນລາງວັນລວມເກືອບ 100 ລ້ານກີບ ພ້ອມໄດ້ຮັບລົດຈັກໄຟຟ້າ ຍີ່ຫໍ້ ອິນດາຣາ ຫຼື INRADA ມູນຄ່າ 20 ລ້ານກີບ ຫຼື ເກືອບ 1.000 ໂດລາ ໄປຄອງ.

ການແຂ່ງຂັນເທັນນິສ ອາໂນໄທ ໂອເພັນ 2024 ຄັ້ງທີ 4 ຊິງເງິນລາງວັນເກືອບ 100 ລ້ານກີບ ຈັດຂຶ້ນໃນລະຫວ່າງວັນທີ 29 ມິຖຸນາ ຫາ 7 ກໍລະກົດ 2024 ສະໜາມເທັນນິສ ອາໂນໄທ ສະປອດຕິ້ງ ຄລັບ ( Anothai Sport Club ) ສະໜາມອິນດໍ ທີ່ໄດ້ມາດຕະຖານສາກົນ ໃຫ້ກຽດເຂົ້າຮ່ວມ ແລະ ມອບລາງວັນໂດຍທ່ານ ດາວວອນ ພະຈັນທະວົງ ປະທານສະຫະພັນເທັນນິສແຫ່ງຊາດລາວ ແລະ ທ່ານ ອາແຊນ ອາໂນໄທ ເຈົ້າຂອງສະໜາມ ອາໂນໄທ ສະປອດຕິ້ງ ຄລັບ ມີບັນດານັກກິລາທີ່ເປັນຄົນລາວ ແລະ ຊາວຕ່າງຊາດເຂົ້າຮ່ວມ 60 ກວ່າຄົນ.

ການແຂ່ງຂັນເທັນນິດ ອາໂນໂທ ໂອເພັນ 2024 ປີນີ້ຈັດຂຶ້ນເປັນຄັ້ງທີ 4 ແລ້ວ ຊຶ່ງເປັນປິນີ້ທີ່ພິເສດ ເປັນການສະສົມຄະແນນນັກກິລາເທັນນິດທີ່ເຂົ້າຮ່ວມແຂ່ງຂັນ ທຸກຄົນໄດ້ຖືກຈັດອັນດັບຂອງ ສະຫະພັນກິລາເທັນນິດແຫ່ງຊາດລາວ ນັບຕັ້ງແຕ່ຮຸ່ນເຍົາວະຊົນຈົນເຖິງຮຸ່ນທົ່ວໄປ ທັງຍິງ-ຊາຍ ລາຍການນີ້ ໄດ້ຈັດແບ່ງເປັນສາຍ ກໍຄື ສາຍ A, ສາຍ B, ສາຍ C ແລະ ສາຍ ປະເພດຍິງ (ເລດີ້) ຊຶ່ງມີນັກກິລາທີ່ເປັນຄົນລາວ ແລະ ຊາວຕ່າງຊາດ ໂດຍສະເພາະ ເກົາຫຼີ, ຍີ່ປຸ່ນ, ຝຣັ່ງ ແລະ ໄທ ທີ່ມາເຮັດວຽກຢູ່ລາວ ສະໝັກຮ່ວມແຂ່ງຂັນ 60 ກວ່າຄົນ ນຳໃຊ້ລະບົບແຂ່ງຂັນແບບສາກົນ.

ຜ່ານການແຂ່ງຂັນຜົນປະກົດວ່າ: ສາຍ ເອ ຊະນະເລີດ ເປັນຂອງທ້າວ ໄຊສະຫວັດ ຈັນສົມພູ ໄດ້ຮັບຂັນແຊ໋ມ ພ້ອມລົດໄຟຟ້າ ຍີ່ຫໍ້ ອິນດາຣາ 1 ຄັນ ມູນຄ່າ 20 ລ້ານກີບ ພ້ອມເງິນລາງວັນ 2 ລ້ານກີບ ສ່ວນ ອັນດັບທີ 2 ທ້າວ ຈຳນຽນ ສີຫາວົງ ໄດ້ຮັບຂັນ ແລະ ເງິນລາງວັນ 2 ລ້ານກີບ ສ່ວນຜົນການແຂ່ງຂັນ ສາຍ ບີ ແຊ໋ມເປັນຂອງທ້າວ ອາໂນວົງ ທຳມະວົງ ໄດ້ຮັບຂັນແຊ໋ມ ພ້ອມລົດໄຟຟ້າ ຍີ່ຫໍ້ ອິນດາຣາ 1 ຄັນ ມູນຄ່າ 20 ລ້ານກີບ ພ້ອມເງິນລາງວັນ 2 ລ້ານກີບ ແລະ ອັນດັບທີ 2 ທ້າວ ກິດຕິພົງ ຈາກປະເທດໄທ ໄດ້ຮັບຂັນ ແລະ ເງິນລາງວັນ 2 ລ້ານກີບ ສ່ວນຜົນການແຂ່ງຂັນ, ສາຍ ຊີ ທ້າວ ຈຳລອງ ໄດ້ຮັບຂັນແຊ໋ມ ພ້ອມລົດໄຟຟ້າ ຍີ່ຫໍ້ ອິນດາຣາ 1 ຄັນ ມູນຄ່າ 20 ລ້ານກີບ ພ້ອມເງິນລາງວັນ 2 ລ້ານກີບ ແລະ ອັນດັບທີ 2 ທ້າວ ອ່າງຄຳ ໄດ້ຮັບຂັນ ແລະ ເງິນລາງວັນ 2 ລ້ານກີບ ຂະນະທີ່ ສາຍ ປະເພດຍິງ ອັນດັບທີ 1 ນາງ ເອນິຕ້າ ໄດ້ຮັບຂັນແຊ໋ມ ພ້ອມເງິນສົດ 4 ລ້ານກີບ ແລະ ອັນດັບທີ 2 ນາງ ໝີ ໄດ້ຮັບຂັນ ແລະ ເງິນສົດ 2 ລ້ານກີບ.

ລາຍການດັ່ງກ່າວ ຈັດຂຶ້ນ ໂດຍໄດ້ຮັບການສະໜັບສະໜູນຫຼັກຈາກບໍລິສັດ ຈຳໜ່າຍລົດໄຟຟ້າ ຍີ່ຫໍ້ ອິນດາຣາ, Suansiri, Bivac Lao, PIMENTON, Mineral, Prokennex, Lao Derm Group, Marcel Petit Tennis LAB, Souphattra, Tanqi, ອານຸສິດ ຂົນສົ່ງ (Anousith), ບໍລິການ ສິນເຊື່ອ ຈັນຈະເລີນ ແລະ Red Koff.
ຂ່າວ-ພາບ ໂດຍ ສົງການ ພັນແພງດີ