ຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ໃນວັນທີ 2 ກໍລະກົດ 2024 ທີ່ສູນຄົ້ນຄວ້າກະສິກໍາ ແຂວງຫລວງນໍ້າທາ ທົດສອບຄຸນນະພາບການກິນເຂົ້າຈ້າວ ຈໍານວນ 6 ສາຍພັນ ຈຸດປະສົງ ເພື່ອທົດສອບສະຖຽນລະພາບຜົນຜະລິດ ແລະ ຄັດເລືອກເອົາສາຍພັນເຂົ້າຈ້າວທີ່ດີເດັ່ນ ສາມາດໃຫ້ຜົນຜະລິດສູງ, ມີຄຸນນະພາບການກິນດີ, ພ້ອມທັງປັບຕົວເຂົ້າກັບການປ່ຽນແປງດິນຟ້າອາກາດ ແລະ ທົນທານຕໍ່ພະຍາດແມງໄມ້-ສັດຕູພືດ ໃນຫລາຍຂອບເຂດພື້ນທີ່ ທັງນີ້ກໍເພື່ອຄັດເລືອກເອົາແນວພັນທີ່ດີເດັ່ນ ໄປຂຶ້ນທະບຽນເປັນແນວພັນເຂົ້າໃໝ່ .
ການທົດສອບການຊິມຄຸນນະພາບແນວພັນໃໝ່ ຈັດຂຶ້ນໂດຍການເປັນປະທານຂອງທ່ານ ປະດິດ ຈັນທະນຸວົງ ຫົວໜ້າສູນຄົ້ນຄວ້າກະສິກໍາ ແຂວງຫລວງນໍ້າທາ, ທ່ານ ວິລະຊົນ ແດນຫັນສາ ຮອງຫົວໜ້າພະແນກ ກະສິກໍາ ແລະ ປ່າໄມ້ແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ຂອງແຂວງ, ເມືອງ, ບໍລິສັດ ແລະ ພະນັກງານ-ລັດຖະກອນຂອງສູນເຂົ້າຮ່ວມ.
ສຳລັບແນວພັນເຂົ້າໃໝ່ນີ້ແມ່ນໄດ້ມີການຈັດຕັ້ງປະຕິບັດ ທົດລອງປຽບທຽບສາຍພັນເຂົ້າຈ້າວ ຈໍານວນ 6 ສາຍພັນ ໃນ 3 ລະດູການ ສົກປີ 2023-2024 ສູນຄົ້ນຄວ້າກະສິກໍາ ຫລວງນໍ້າທາ ໄດ້ລົງມືຈັດຕັ້ງປະຕິບັດ ທົດລອງແນວພັນເຂົ້າຈ້າວ ຄັ້ງທຳອິດໃນລະດູແລ້ງ ສົກປີ 2022-2023 ແລະ ສືບຕໍ່ທົດລອງລະດູຝົນ 2023 ແລະ ລະດູແລ້ງ 2024 ຖືວ່າເປັນການທົດລອງໃນ 3 ລະດູການ. ການທົດລອງໃນຄັ້ງນີ້ ແມ່ນເຮັດຢູ່ໃນສະຖານທີ່ຂອງສູນ ເພື່ອຈະຄັດເລືອກເອົາແນວພັນເຂົ້າໃຫ້ໄດ້ 2 ສາຍພັນ ເພື່ອໄປຂຶ້ນທະບຽນໃໝ່ ແລະ ເປັນແນວພັນ ເພື່ອສົ່ງເສີມກະສິກອນໃນຕໍ່ໜ້າ.
ຈາກຜົນການທົດລອງສາຍພັນເຂົ້າຈ້າວ ຈໍານວນ 6 ສາຍພັນ ເຫັນວ່າມີຫລາຍສາຍພັນ ທີ່ໃຫ້ຜົນຜະລິດທີ່ແຕກຕ່າງກັນ ເປັນຕົ້ນ ສາຍພັນ V1 ຜົນຜະລິດໄດ້ 6.193 ກິໂລ/ເຮັກຕາ ມີອາຍຸ 128 ມື້; ສາຍພັນ V2 ຜົນຜະລິດໄດ້ 6.154 ກິໂລ/ເຮັກຕາ ມີອາຍຸ 125 ມື້; ສາຍພັນ V3 ເນື່ອງຜົນຜະລິດໄດ້ 5.521 ກິໂລ/ເຮັກຕາ ມີອາຍຸ 125 ມື້; ສ່ວນສາຍພັນ V4 ຜົນຜະລິດໄດ້ 4.476 ກິໂລ/ເຮັກຕາ ມີອາຍຸ 146 ມື້; ສາຍພັນ V5 ຜົນຜະລິດໄດ້ 2.831 ກິໂລ/ເຮັກຕາ ມີອາຍຸ 146 ມື້ ແລະ ສາຍພັນ V6 (ເຂົ້າຈ້າວມຽນມາ) ຜົນຜະລິດໄດ້ 4.896 ກິໂລ/ເຮັກຕາ ມີອາຍຸ 133 ມື້.
ພ້ອມກັນນີ້, ຜູ້ເຂົ້າຮ່ວມຍັງໄດ້ພ້ອມກັນປະກອບຄໍາຄິດເຫັນ ກ່ຽວກັບການຄົ້ນຄວ້າທົດລອງແນວພັນເຂົ້າຈ້າວ ໂດຍໃຫ້ມີການຄົ້ນຄວ້າທົດລອງຫລາຍຮູບແບບ, ຫລາຍພື້ນທີ່ ທີ່ແຕກຕ່າງກັນ, ມີການປຽບທຽບຜົນໄດ້ ຜົນເສຍ ແລະ ຄຸນນະພາບຂອງຜົນຜະລິດ ສາມາດຄົ້ນຄວ້າໄດ້ແນວພັນເຂົ້າ ທີ່ໃຫ້ຜົນຜະລິດສູງ, ຄຸນນະພາບການກິນດີ, ປັບຕົວເຂົ້າກັບການປ່ຽນແປງດິນຟ້າອາກາດ ແລະ ທົນທານຕໍ່ພະຍາດແມງໄມ້ສັດຕູພືດ ທັງນີ້ກໍເພື່ອຮັບປະກັນສະບຽງອາຫານ ໃຫ້ມີຄວາມໝັ້ນຄົງ ເພື່ອຜະລິດເປັນສິນຄ້າໃນອະນາຄົດ.
ໂອກາດນີ້, ຜູ້ເຂົ້າຮ່ວມ ຍັງໄດ້ລອງຊິມເຂົ້າຈ້າວ ຈໍານວນ 6 ສາຍພັນ ພ້ອມທັງໃຫ້ຄະແນນ,ຜ່ານການກິນ ແລະ ລົງຄະແນນ ເຫັນວ່າ: ສາຍພັນ V3 ໄດ້ຮັບຄະແນນເປັນອັນດັບ 1 ແລະ V2 ໄດ້ອັນດັບທີ 2, ເຊິ່ງ 2 ສາຍພັນນີ້ ໄດ້ຮັບຄະແນນນິຍົມສຸງສຸດ ດັ່ງນັ້ນ, ທາງສູນຄົ້ນຄວ້າກະສິກໍາຫລວງນໍ້າທາ ຈະໄດ້ນໍາສະເໜີຫາພາກສ່ວນທີ່ກ່ຽວຂ້ອງ ເພື່ອຂຶ້ນທະບຽນເປັນຊື່ແນວພັນເຂົ້າໃໝ່.
