ໜຸ່ມ ບອຍ ແສງພະຈັນ Mr Global Lao 2023 ລົງຕັດສິນບານເຕະຍິງນັດທີ 2, ບອກປີໜ້າອາດກັບສູ່ເວທີປະກວດອີກຄັ້ງ

88

ໜຸ່ມ ແສງພະຈັນ ແສງຈັນພະວົງ ຫຼື ໜຸ່ມ ບອຍ Mr Global Lao 2023 ປັດຈຸບັນຍັງສືບຕໍ່ພັດທະນາຕົວເອງທາງການກີລາ ຫຼ້າສຸດລົງຕັດສິນການແຂ່ງຂັນບານເຕະລາວລີກຍິງ 2024 ເປັນນັດທີ 2 ຂອງຕົວເອງ ໃນນັດທີ ສະໂມສອນບານເຕະຍິງ ທ່າຊ້າງ ຢູໄນເຕັດ ເປີດບ້ານເສຍໃຫ້ກັບ ເອັສອີຊີ ຢູໄນເຕັດ 0-1 ເມື່ອວັນທີ 23 ມິຖຸນາ 2024 ທີ່ສະໜາມບານເຕະຫຍ້າທຽມ ສະຫະພັນບານເຕະແຫ່ງຊາດລາວ ບ້ານຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ ສປປ ລາວ.

ນັດດັ່ງກ່າວ ບອຍ ລົງເຮັດໜ້າທີ່ເປັນກໍາມະການຕັດສິນໃນສະໜາມ ສາມາດເຮັດໜ້າທີ່ໄດ້ດີທ່າມກາງສາຍຝົນຕົກລົງມາໃນໄລຍະທ້າຍເຄິ່ງເວລາທໍາອິດ ກ່ອນການແຂ່ງຂັນຈະຈົບດ້ວຍຜົນໄຊຊະນະເປັນຂອງ ເອັສອີຊີ ຢູໄນເຕັດ ເຊິ່ງນັດນີ້ເປັນອາທິດທີ 3 ຂອງບານເຕະຍິງ ແລະ ເປັນນັດທີ 2 ຂອງ ໜຸ່ມບອຍ ທີ່ໄດ້ຮັບໜ້າທີ່ລົງຕັດສິນໃນບານເຕະລາວລີກຍິງ 2024.
ໜຸ່ມ ບອຍ ໃຫ້ສໍາພາດກັບທີມຂ່າວພວກເຮົາວ່າ: ປັດຈຸບັນ ກໍຍັງສືບຕໍ່ເຮັດວຽກເປັນ ເທຣນເນີ ຟິດ ແລະ ເປັນກໍາມະການ ຫຼ້າສຸດໄດ້ກໍໄດ້ລົງຕັດສິນການແຂ່ງຂັນບານເຕະ ລາວລີກຍິງ 2024 ໂດຍປີທີ່ຜ່ານມາ ກໍໄດ້ຈົບການສຶກສາ, ໄດ້

ຮ່ວມຕັດສິນໃນບົດບາດກໍາມະການ, ເປັນນັກກີລາບານສົ່ງໃຫ້ກັບ ທີມອິນເທັນເຊິນ ແລະ ໄດ້ປະກວດໃນເວທີ Mr Global Lao 2023 ເຊິ່ງກໍໄດ້ຮັບຕໍາແໜ່ງມາ ແນ່ນອນປີໜ້າ 2024 ມີຄວາມຫວັງຍາກລົງປະກວດໃນເວທີຊາຍໜຸ່ມ ອີກຄັ້ງ ແລະ ຈະມີຄວາມໝັ້ນໃຈຫຼາຍຂຶ້ນ ເນື່ອງຈາກໄດ້ຮັບປະສົບການຫຼາຍດ້ານໃນໄລຍະ 1 ປີທີ່ຜ່ານມາ.

ສໍາລັບ ໜຸ່ມບອຍ ເກີດທີ່ແຂວງວຽງຈັນ ຈົບການສຶກສາ ຈາກ ຄະນະວິທະຍາສາດການກິລາ-ກາຍະກຳ ມະຫາວິທະຍາໄລແຫ່ງຊາດ, ປະຈຸບັນເປັນເທຣນເນີ ຢູ່ ສູນອອກກຳລັງກາຍ VIP fitness ແລະ ໄດ້ເລີ່ມເຮັດ ໜ້າທີ່ເປັນກຳມະການ ຂອງ ສຕລ ຕອນເປັນນັກສຶກສາ.
ຂ່າວ: Larh Creators; ຮູບຈາກ: ສຕລ