ຈະລົງທຶນ 96 ຕື້ກີບສ້າງຕະຫລາດໂນນໄຮໃໝ່ ໃຫ້ໃຫຍ່ທັນສະໄໝກວ່າເກົ່າ

128

ໃນວັນທີ 19 ມິຖຸນາ 2024 ໄດ້​ມີພິທີວາງເສົາເອກ ໂຄງການກໍ່ສ້າງຕະຫລາດໂນນໄຮ ເມືອງໝື່ນ ແຂວງວຽງຈັນ  ທີ່ບ້ານໂພນງາມ ໂດຍການເຂົ້າຮ່ວມຂອງທ່ານ ຄຳພັນ ສິທິດຳພາ ເຈົ້າແຂວງໆວຽງຈັນ, ທ່ານ ພອນເທີດ ສຸຫວັດດີ ເຈົ້າເມືອງໆໝື່ນ ພ້ອມດ້ວຍພະແນກທີ່ກ່ຽວຂ້ອງຂອງແຂວງ, ເມືອງ, ນັກທຸລະກິດ ແລະ ຜູ້ປະກອບການເຂົ້າຮ່ວມ.

No photo description available.
ທ່ານ ອຸພະໄຊ ສີບຸນເຮືອງ ປະທານບໍລິສັດ ອຸພະໄຊ ຈຳກັດຜູ້ດຽວ ໄດ້ລາຍງານກ່ຽວກັບໂຄງການກໍ່ສ້າງຕະຫລາດ ເມືອງໝື່ນ ວ່າ: ບໍລິສັດ ອຸພະໄຊ ຈຳກັດຜູ້ດຽວ ໄດ້ຮັບອະນຸຍາດຈາກແຂວງວຽງຈັນ ລົງທຶນສຳປະທານກໍ່ສ້າງ ແລະ ຈັດສັນຕະຫລາດ ໂນນໄຮ ເມືອງໝື່ນ ແຂວງວຽງຈັນ ໂດຍມີເນື້ອທີ່ ທັງໝົດ 9.740 ຕາແມັດ ໃນນີ້, ກໍ່ສ້າງບໍລິການຕະຫລາດ 6.140 ຕາແມັດ, ເນື້ອທີ່ກໍ່ສ້າງ ແລະ ບໍລິການຄິວລົດ, ປ້ຳນ້ຳມັນ ແລະ ເຮືອນພັກ ມີເນື້ອທີ່ 3.600 ຕາແມັດ, ໄລຍະເວລາຂອງການສຳປະທານ 48 ປີ, ນັບແຕ່ມື້ລົງລາຍເຊັນສັນຍາສຳປະທານ ລວມທັງໄລຍະກໍ່ສ້າງ 3 ປີ, ມູນຄ່າການລົງທຶນພັດທະນາໂຄງການຄັ້ງນີ້ 96 ຕື້ກວ່າກີບ.

May be an image of 7 people and text

ຕະຫລາດດັ່ງກ່າວ ເປັນອາຄານ 2 ຊັ້ນ, ມີ 180 ຫ້ອງ, ການກໍ່ສ້າງໄດ້ແບ່ງເປັນ 2 ໄລຍະ ຄື: ໄລຍະທີ 1 ໃນປີ 2024 ຈະກໍ່ສ້າງຕະຫລາດໃຫ້ສຳເລັດພາຍໃນ 36 ເດືອນ ມີມູນຄ່າ 66 ຕື້ກວ່າກີບ, ໄລຍະທີ 2 ຈະສ້າງໃນປີ 2027 ໃຫ້ສຳເລັດພາຍໃນ 36 ເດືອນ ມີມູນຄ່າກໍ່ສ້າງ 30 ຕື້ກວ່າກີບ ເຊິ່ງບໍລິສັດອຸພະໄຊ ຈຳກັດຜູ້ດຽວ ເປັນຜູ້ຮັບຜິດຊອບໃນການຊອກຫາ ແລະ ຈັດແຫລ່ງທຶນເອງ ເພື່ອຕອບສະໜອງແກ່ການພັດທະນາໂຄງການນີ້ ທີ່ໄດ້ບັນລຸໄວ້ໃນສັນຍາ.