ກະຊວງແຮງງານທົບທວນ ການຈັດສົ່ງແຮງງານໄປເຮັດວຽກຢູ່ເກົາຫຼີຕາມລະດູການ

44

ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໃນນາມປະທານກອງປະຊຸມໄດ້ມີຄຳເຫັນຕໍ່ ກອງປະຊຸມປຶກສາຫາລື ກ່ຽວກັບການຈັດສົ່ງແຮງງານລາວໄປເຮັດວຽກຕາມລະດູການ ຢູ່ ສ.ເກົາຫລີ ທີ່ຈັດຂຶ້ນວັນທີ 17 ມິຖູນາ 2024 ນີ້, ທີ່ຫ້ອງປະຊຸມ ກະຊວງແຮງງານ ແລະ ສະຫວັດດີການສັງຄົມ, ນະຄອນຫຼວງວຽງຈັນ ວ່າ: ວຽກງານຈັດສົ່ງແຮງງານລາວໄປເຮັດວຽກຢູ່ຕ່າງປະເທດກໍ່ເປັນວຽກງານໜຶ່ງ ທີ່ນອນຢູ່ໃນແຜນພັດທະນາວຽກງານແຮງງານ ແລະ ສະຫວັດດີການສັງຄົມ 5 ປີ ຄັ້ງທີ 5 (2021-2025) ເພື່ອສົ່ງເສີມໃຫ້ຜູ້ອອກແຮງງານລາວມີວຽກເຮັດງານທຳ, ສ້າງລາຍຮັບ, ພັດທະນາຄວາມຮູ້ຄວາມສາມາດ ແລະ ສີມືແຮງງານຢູ່ຕ່າງປະເທດ.

May be an image of 10 people

ສໍາລັບການຈັດສົ່ງແຮງງານລາວໄປເຮັດວຽກຕາມລະດູການ ຢູ່ ສາທາລະນະລັດເກົາຫຼີ ໄດ້ເລີ່ມແຕ່ປີ 2022 ຈົນເຖິງປະຈຸບັນ ສາມາດຈັດສົ່ງແຮງງານລາວໄປເຮັດວຽກໃນ 2 ລະບົບດັ່ງກ່າວ ໄດ້ທັງໝົດຈໍານວນ: 7,551 ເທື່ອຄົນ, ຍິງ 1,962 ເທື່ອຄົນ.
ຜ່ານການຮັບຟັງການລາຍງານການຈັດຕັ້ງປະຕິບັດວຽກງານຈັດສົ່ງແຮງງານລາວໄປເຮັດວຽກຕາມລະດູການ ທີ່ ປະເທດ ສ.ເກົາຫຼີ ໄລຍະຜ່ານມາ ຍັງເຫັນໄດ້ວ່າ ມີຫຼາຍດ້ານທີ່ບໍ່ສາມາດປະຕິບັດໄດ້ຢ່າງມີປະສິດທິຜົນ ເປັນຕົ້ນ ຄຸນນະພາບຂອງແຮງງານທີ່ຈັດສົ່ງ, ການປະສານງານ ຢູ່ພາຍໃນ ແລະ ກັບຄູ່ຮ່ວມງານຢູ່ປະເທດປາຍທາງ, ການຕິດຕາມ ແລະ ໃຫ້ການຊ່ວຍເຫຼືອຜູ້ອອກແຮງງານ ແລະ ການລາຍງານຍັງບໍ່ເປັນລະບົບ.

May be an image of chard, collard greens and cold frame

ສະນັ້ນ, ການສົ່ງຜູ້ອອກແຮງງານລາວໄປເຮັດວຽກຢູ່ຕ່າງປະເທດຕ້ອງຮັບປະກັນແຮງງານທີ່ມີຄຸນນະພາບ ໂດຍຜ່ານການຝຶກອົບຮົມ ແລະ ອອກໃບຢັ້ງຢືນການທົດສອບສີມື ເພື່ອໃຫ້ສາມາດສ້າງມູນຄ່າເພີ່ມ, ຮັບປະກັນທາງດ້ານລາຍຮັບໃຫ້ສູງ ແລະ ແຮງງານໄດ້ຮັບການປົກປ້ອງສິດ ແລະ ຜົນປະໂຫຍດໂດຍຊອບທຳ ເພື່ອເຮັດໃຫ້ການຈັດສົ່ງຜູ້ອອກແຮງງານລາວໄປເຮັດວຽກຢູ່ຕ່າງປະເທດ ມີຜົນກະທົບໜ້ອຍທີ່ສຸດຕໍ່ກັບຄວາມຕ້ອງການນຳໃຊ້ແຮງງານຂອງບັນດາຫົວໜ່ວຍແຮງງານຢູ່ຕາມຂະແໜງການຕ່າງໆ ໃຫ້ສາມາດຕອບສະໜອງກັບການສົ່ງເສີມການລົງທຶນຂອງນັກລົງທຶນພາຍໃນ ແລະ ນັກລົງທຶນຈາກຕ່າງປະເທດ.

No photo description available.

ທ່ານລັດຖະມົນຕີ ໄດ້ສະແດງຄວາມຊົມເຊີຍຕໍ່ຄວາມເອົາໃສ່ຈັດຕັ້ງປະຕິບັດໃນໄລຍະຜ່ານມາ ແລະ ຂໍສະເໜີໃຫ້ບັນດາທ່ານເຂົ້າຮ່ວມກອງປະຊຸມ ສຸມໃສ່ຄົ້ນຄວ້າ, ປະກອບຄໍາເຫັນຢ່າງສ້າງສັນ ແລະ ເປັນປະໂຫຍດ ເພື່ອນໍາໄປສູ່ການປັບປຸງລະບົບການຈັດສົ່ງແຮງງານລະດູການ ໃຫ້ດີຍິ່ງຂຶ້ນໃນຕໍ່ໜ້າ.

ກອງປະຊຸມດັ່ງກ່າວ, ແມ່ນເພື່ອເປັນການທົບທວນຄືນການຈັດຕັ້ງປະຕິບັດວຽກງານການຈັດສົ່ງແຮງງານລາວໄປເຮັດວຽກຕາມລະດູການທີ່ ສ.ເກົາຫຼີ ໃນໄລຍະຜ່ານມາ, ບັນດາຂໍ້ສະດວກ,​ ຂໍ້ຫຍຸ້ງຍາກ, ບັນຫາຂໍ້ຄົງຄ້າງ, ຂໍ້ສະເໜີ ແລະ ທິດທາງໃນການຈັດຕັ້ງປະຕິບັດຕໍ່ໜ້າ ກ່ຽວກັບວຽກງານການຈັດສົ່ງແຮງງານລາວໄປເຮັດວຽກຕາມລະດູການ ຢູ່ ສ.ເກົາຫຼີ ໂດຍຜູ້ເຂົ້າຮ່ວມທີ່ຢູ່ສູນກາງ ແລະ ທ້ອງຖິ່ນ.
ຂອບໃຈແຫຼ່ງຂ່າວຈາກ: ຂ່າວສານ ຮສສ