ລາວ ກໍານົດສົ່ງ 4 ປະເພດ ຮ່ວມງານມະຫາກໍາກິລາມະຫາວິທະຍາໄລອາຊຽນ ຄັ້ງທີ XXI

123

ສປປ ລາວ ກໍານົດສົ່ງ 4 ປະເພດ ຮ່ວມງານມະຫາກໍາກິລາມະຫາວິທະຍາໄລອາຊຽນ ຄັ້ງທີ XXI ທີ່ອິນໂດເນເຊຍ ໃນລະຫວ່າງວັນທີ 25 ມິຖຸນາ ຫາ 6 ກໍລະກົດ 2024 ທີ່ແຂວງຊູຣາມາຢາ ແລະ ແຂວງມາລັງ ປະເທດອິນໂດເນເຊຍ.
ທ່ານ ຮສ.ປອ ສິນທະວອນ ດາລາວົງ ໄດ້ກ່າວລາຍງານໃຫ້ຮູ້ວ່າ: ສະຫະພັນກິລາມະຫາວິທະຍາໄລລາວ ໄດ້ຮັບການອະນຸມັດຈາກລັດຖະບານ ກໍຄື ກະຊວງສຶກສາທິການ ແລະ ກິລາ (ສສກ) ເພື່ອເຂົ້າຮ່ວມງານມະຫາກໍາກິລາມະຫາວິທະຍາໄລອາຊຽນ ຄັ້ງທີ XXI ທີ່ປະເທດອິນໂດເນເຊຍ. ເນື່ອງຈາກຄວາມຈຳເປັນຫຼາຍດ້ານ, ງົບປະມານມີຈໍາກັດ ແລະ ປະເທດທີ່ເປັນເຈົ້າພາບກໍຢູ່ຫ່າງໄກ. ສະນັ້ນ, ທາງລັດຖະບານ ແລະ ສະຫະພັນກິລາມະຫາວິທະຍາໄລລາວ ຈຶ່ງໄດ້ຕົກລົງສົ່ງປະເພດກິລາ ແລະ ນັກກິລາໃນຈໍານວນຈຳກັດ ໂດຍປະກອບມີ 4 ປະເພດກິລາ ຄື: ກິລາແລ່ນ-ລານ, ເປຕັງ, ປັນຈັກສີລັດ ແລະ ບານບ້ວງ 3X3, ລວມມີນັກກິລາທັງໝົດ 41 ຄົນ.
ສໍາລັບ ງານມະຫາກໍາກິລາມະຫາວິທະຍາໄລອາຊຽນ ຄັ້ງທີ XXI ແມ່ນຈະເປີດສາດຂຶ້ນ ໃນລະຫວ່າງວັນທີ 25 ມິຖຸນາ ຫາ 6 ກໍລະກົດ 2024 ທີ່ແຂວງຊູຣາມາຢາ ແລະ ແຂວງມາລັງ ປະເທດອິນໂດເນເຊຍ ໂດຍຈະມີການຊີງໄຊກັນ 21 ປະເພດກິລາ ປະກອບມີ ຍິງທະນູ, ແລ່ນ-ລານ, ດອກປີກໄກ່, ບານບ້ວງ, ບານບ້ວງ 3×3, ບານສົ່ງຫາດຊາຍ, ບຣິດ (ເກມໄພ້), ໝາກເສິກ, ຟຸດຊໍ, ບານມື, ຢູໂດ, ຄາຣາເຕ, ເປຕັງ, ປັນຈັກຊີລັດ, ກະຕໍ້, ປີນພູ, ລອຍນໍ້າ, ເທຄວັນໂດ, ເທັນນິດ, ບານສົ່ງ ແລະ ກິລາວູຊູ
ຂ່າວຈາກ: ດາວຫວຽດ ແລະ ໜັງສືພິມສຶກສາ, ວິທະຍາສາດ ແລະ ກິລາ ອອນລາຍ
ຮູບຈາກ: Larh Creators