ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ໄດ້ລາຍງານໃນກອງປະຊຸມ ສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 10 ມິຖຸນາ 2024 ວ່າ: ສະພາບການຈັດຕັ້ງປະຕິບັດແຜນງົບປະມານແຫ່ງລັດ ມາຮອດຕົ້ນເດືອນ ມິຖຸນາ 2024 ດ້ານລາຍຮັບ ປະຕິບັດໄດ້ 25. 957 ຕື້ກີບ ເທົ່າກັບ 52% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 64% ເປັນເງິນປະມານ 10.165 ຕື້ກີບ.
ໃນນີ້ ລາຍຮັບພາຍໃນ ປະຕິບັດໄດ້ 24.104 ຕື້ກີບ ເທົ່າກັບ 54% ຂອງ ແຜນການປີ. ສໍາລັບຂັ້ນທ້ອງຖິ່ນ ໂດຍສະເລ່ຍປະຕິບັດໄດ້ 70%, ໃນນີ້ ແຂວງໄຊສົມບູນ ເກີນແຜນ 136% ແລະ ມີ 5 ແຂວງ ສາມາດປະຕິບັດໄດ້ 70% ຂຶ້ນໄປ.
ລາຍຮັບສ່ວນໃຫຍ່ໄດ້ຈາກ ຂະເເໜງ ພະລັງງານໄຟຟ້າ ແລະ ຂະແໜງແຮ່ທາດ, ລະອຽດແຕ່ລະປະເພດລາຍຮັບມີ ດັ່ງນີ້: ລາຍຮັບພາສີ ແລະ ສ່ວຍສາອາກອນ 21.333 ຕື້ກີບ ເທົ່າກັບ 51,21% ຂອງແຜນການປີ; ລາຍຮັບບໍ່ແມ່ນພາສີ ແລະ ສ່ວຍສາອາກອນ 2.770 ຕື້ກີບ ເທົ່າກັບ 81,15% ຂອງແຜນການປີ; ລາຍຮັບຈາກການຊ່ວຍເຫຼືອລ້າ 1.854 ຕື້ກີບ ເທົ່າກັບ 36,82% ຂອງແຜນການປີ ແລະ ຄາດຄະເນປະຕິບັດ 6 ເດືອນຕົ້ນປີ 2024 ສູ້ຊົນເກັບລາຍຮັບໃຫ້ໄດ້ 28.005 ຕື້ກີບ ເທົ່າກັບ 112% ຂອງແຜນ 6 ເດືອນຕົ້ນປີ ຫລື ເທົ່າກັບ 56% ຂອງແຜນການປີ.
ດ້ານລາຍຈ່າຍປະຕິບັດໄດ້ 19.061 ຕື້ກີບ ເທົ່າກັບ 32% ຂອງແຜນການປີ, ໃນນີ້ ຂັ້ນສູນກາງປະຕິບັດໄດ້ 14.865 ຕື້ກີບ ເທົ່າກັບ 31% ຂອງແຜນການປີ ແລະ ຂັ້ນທ້ອງຖິ່ນປະຕິບັດໄດ້ 4.195 ຕື້ກີບ ເທົ່າກັບ 40% ຂອງແຜນການປີ ໂດຍໄດ້ສຸມໃສ່ການເບີກຈ່າຍ ລາຍຈ່າຍທີ່ເປັນບູລິມະສິດຂອງລັດຖະບານ ເປັນຕົ້ນ: ເງິນເດືອນ, ເງິນນະໂຍບາຍ, ເງິນອຸດໜູນຄ່າຄອງຊີບ, ການຊຳລະໜີ້ສິນ ພາຍໃນ ແລະ ຕ່າງປະເທດ ຕາມຂໍ້ຜູກພັນສັນຍາ ແລະ ລາຍຈ່າຍບໍລິຫານຮັບໃຊ້ກົງຈັກ ພັກ-ລັດ ໃຫ້ສາມາດເຄື່ອນໄຫວໄດ້ ເປັນປົກກະຕິ.
ຄາດຄະເນລາຍຈ່າຍ 6 ເດືອນຕົ້ນປີ ຈະປະຕິບັດໄດ້ 28.519 ຕື້ກີບ ເທົ່າກັບ 48% ຂອງແຜນການປີ
