ພາຍຫຼັງໄດ້ຮັບຟັງລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ຕິດພັນການຈັດຕັ້ງປະຕິບັດ 2 ວາລະແຫ່ງຊາດ ໄລຍະ 6 ເດືອນຕົ້ນປີ 2024 ຂອງລັດຖະບານ ໃນວັນທີ 10 ມິຖຸນາ 2024. ບັນດາ ສສຊ ສະເໜີໃຫ້ລັດຖະບານເລັ່ງແກ້ໄຂ ບັນຫາດ້ານເສດຖະກິດ ໂດຍເນັ້ນພັດທະນາສົ່ງເສີມການຜະລິດພາຍໃນ, ແກ້ໄຂບັນຫາເງິນເຟີ້ ທີ່ຕິດພັນກັບຊີວິດການເປັນຢູ່ຂອງພໍ່ແມ່ປະຊາຊົນ. ລວມທັງຜົນກະທົບຂອງເສດຖະກິດຕໍ່ດ້ານການສຶກສາ ທີ່ປະຈຸບັນມີອັດຕາປະລະການຮຽນສູງ.
ທ່ານ ຄຳແສນ ສີສະວົງ ສສຊ ປະຈຳເຂດເລືອກຕັ້ງທີ 9 ແຂວງຊຽງຂວາງ ປະກອບຄຳເຫັນ ວ່າ: ຜ່ານມາການແກ້ໄຂບັນຫາເງິນເຟີ້ ຂອງລັດຖະບານແມ່ນໄດ້ເຮັດຫຼາຍວິທີທາງ ແຕ່ມາຮອດປະຈຸບັນຍັງບໍ່ເຮັດໄດ້ດີເທົ່າທີ່ຄວນ. ເຮົາຄວາມມາໄຈ້ແຍກລະອຽດວ່າລາຍຮັບແທ້ໆ ຂອງລັດຖະບານໄດ້ມາຈາກໄສແທ້ ແລ້ວເຮົາຈະປັບໂຕໃດໃຫ້ກາຍມາເປັນການສ້າງລາຍຮັບຕື່ມ. ນອກຈາກດ້ານເສດຖະກິດແລ້ວ ຍັງໄດ້ສົ່ງຜົນກະທົບຕໍ່ຂະແໜງການສຶກສາ ນອກຈາກນັກຮຽນ-ນັກສຶກສາ ຈະມີອັດຕາການປະລະການຮຽນທີ່ສູງແລ້ວ ອັດຕາຂອງການລາອອກຂອງຄູ-ອາຈານ ທີ່ຈະໄປຊອກເຮັດວຽກອື່ນກໍສູງເຊັ່ນດຽວກັນ.
ທ່ານ ສີນາວາ ສຸພານຸວົງ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ ທີ 6 ແຂວງຫຼວງພະບາງ ປະກອບຄຳເຫັນວ່າ: ຂ້າພະເຈົ້າເຫັນດີຕໍ່ການສົ່ງເສີມການຜະລິດຢູ່ພາຍໃນ ໂດຍສະເພາະແມ່ນການຜະລິດນໍ້າມັນເຊື້ອໄຟໃນ ສປປ ລາວ ແຕ່ຢາກໃຫ້ຜະລິດຈາກວັດຖຸດິບຖ່ານຫີນ ເນື່ອງຈາກວ່າພວກເຮົາສົ່ງອອກຖ່ານຫີນໃນແຕ່ລະປີແມ່ນຈຳນວນບໍ່ໜ້ອຍ. ສ່ວນຕົວເລກສະເລ່ຍຂອງແຕ່ລະບົດລາຍງານທີ່ລັດຖະບານສະເໜີນັ້ນແມ່ນຕົວເລກງາມ ແຕ່ຢາກໃຫ້ແຈ້ງເປັນແຕ່ລະອັນທີ່ຊັດເຈນ ເພາະຖ້າແຕ່ລະດ້ານແລ້ວມັນບໍ່ເໝາະສົມກັບສະພາບຕົວຈິງ.
ທ່ານ ສີເຮັງ ຫອມສົມບັດ ສສຊ ປະຈຳເຂດເລືອກຕັ້ງທີ 14 ແຂວງສາລະວັນ ໃຫ້ຮູ້ວ່າ: ຢາກສະເໜີໃຫ້ລັດຖະບານເລັ່ງແກ້ໄຂບັນຫາເງິນເຟີ້ ທີ່ຕິດພັບກັບລາຄາສິນຄ້າ ໂດຍອາດຈະແກ້ໄຂໃຫ້ນຳເຂົ້າແຕ່ສິນຄ້າທີ່ຈຳເປັນ ຫຼື ຈຳກັດສິນຄ້ານຳເຂົ້າ ໂດຍສະເພາະແມ່ນສິນຄ້າຟູມເຟືອຍ, ເລັ່ງກວດກາການປັບຂຶ້ນລາຄາສິນຄ້າຕາມທ້ອງຕະຫຼາດແບບບໍ່ຖືກຕ້ອງຕາມລະບຽບກົດໝາຍ.
