ສະເຫຼີມສະຫຼອງຫັດຖະກຳພື້ນເມືອງພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ ຖືກຮັບຮອງເຂົ້າເປັນມໍລະດົກໂລກ ທາງດ້ານວັດທະນະທຳນາມມະທຳຂອງມວນມະນຸດ.

33

ພິທີສະເຫຼີມສະຫຼອງຫັດຖະກຳພື້ນເມືອງພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ ທີ່ຖືກຮັບຮອງເຂົ້າເປັນມໍລະດົກໂລກ ທາງດ້ານວັດທະນະທຳນາມມະທຳຂອງມວນມະນຸດ ມີຂຶ້ນໃນວັນທີ 7 ມິຖຸນາ 2024 ທີ່ຫໍວັດທະນະທຳແຫ່ງຊາດ.

ໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ-ພ້ອມພັນລະຍາ, ທ່ານ ນາງ ສວນສະຫວັນ ວິຍາເກດ ລັດຖະມົນຕີກະຊວງ ຖະແຫຼງຂ່າວວັດທະນະທຳ ແລະ ທ່ອງທ່ຽວ (ຖວທ), ບັນດາຮອງລັດຖະມົນຕີ-ການນຳຂຶ້ນສູງ, ຕາງໜ້າຈາກອົງການອຸຍແນັສໂກ (UNESCO), ບັນດາທູດ, ຕານຸທູດ ແລະ ມວນຊົນຈາກຫຼາຍພາກສ່ວນເຂົ້າຮ່ວມ.


ທ່ານ ພະຂັນໄຊ ສີຄັນໄຊ ຫົວໜ້າກົມມໍຣະດົກ ກະຊວງ ຖວທ ກ່າວວ່າ: “ພາຍຫຼັງທີ່ ສຽງແຄນລາວເຊື້ອຊາດລາວ” ໄດ້ຖືກຮັບຮອງໃຫ້ເປັນມີລະດົກໂລກທາງດ້ານວັດທະນະທຳ ທີ່ບໍ່ເປັນວັດຖຸທີ່ເປັນຕົວແທນຂອງມວນມະນຸດ ໃນປີ 2017. ພວກເຮົາໄດ້ສືບຕໍ່ນຳສະເໜີເອົາ ‘‘ ຫັດຖະກຳພື້ນເມືອງ ພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ’’ສະເໜີຕໍ່ອົງການອຸຍແນັສໂກ ເພື່ອຮັບຮອງເຂົ້າເປັນມໍລະດົກໂລກທາງດ້ານວັດທະນະທຳ ທີ່ບໍ່ເປັນວັດຖຸ. ພ້ອມທັງສຶກສາ, ຄົ້ນຄວ້າ, ເກັບກຳຂໍ້ມູນ ແລະ ຂຽນເອກະສານຄຳຮ້ອງນັບແຕ່ປີ 2018 ເປັນຕົ້ນມາ.


ມາຮອດ ໃນກອງປະຊຸມໃຫຍ່ຂອງຄະນະກໍາມະການລະຫວ່າງລັດຖະບານ ວ່າດ້ວຍການປົກປ້ອງມໍຣະດົກວັດທະນະທຳທີ່ບໍ່ເປັນວັດຖຸ ຄັ້ງທີ 18 ທີ່ໄດ້ຈັດຂຶ້ນໃນລະຫວ່າງວັນທີ 05-08 ທັນວາ 2023 ທີ່ແຂວງກາຊານ (KASANE) ສາທາລະນະລັດບັອສະວານາ (BOTSWANA) ໄດ້ມີການພິຈາລະນາ, ຮັບຮອງ ເອົາບັນດາເອກະສານຄຳຮ້ອງຈາກບັນດາປະເທດລັດພາຄີ ທີ່ໄດ້ຍື່ນສະເໜີຕໍ່ຄະນະກຳມະການ ແລະ ໄດ້ມີການປະກາດຮັບຮອງເອົາບັນຊີມໍຣະດົກວັດທະນະທຳທີ່ບໍ່ເປັນວັດຖຸ ເຂົ້າໃໝ່ໃນຫຼາຍລາຍການພາຍໃຕ້ຫົວຂໍ້ດັ່ງລຸ່ມນີ້:


1. ບັນຊີມໍຣະດົກວັດທະນະທໍາທີ່ບໍ່ເປັນວັດຖຸ ທີ່ຈໍາເປັນຕ້ອງການປົກປ້ອງຢ່າງຮີບດ່ວນ
2. ບັນຊີມໍຣະດົກວັດທະນະທຳທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດ
3. ມໍຣະດົກວັດທະນະທຳທີ່ບໍ່ເປັນວັດຖຸ ທີ່ມີການຂຶ້ນທະບຽນ ການປົກປັກຮັກສາໄດ້ດີ


ໃນນັ້ນ “ຫັດຖະກຳພື້ນເມືອງ ພູມປັນຍາການຕໍ່ລາຍນາກ ຂອງຊຸມຊົນເຊື້ອຊາດລາວ” ກໍ່ແມ່ນຫົວຂໍ້ໜຶ່ງທີ່ທາງຄະນະນຳມະການຈາກ 24 ປະເທດໄດ້ມີການຄົ້ນຄວ້າ, ພິຈາລະນາ ແລະ ຮັບຮອງເຂົ້າໃນບັນຊີມໍຣະດົກວັດທະນະທຳທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດ(ມໍຣະດົກໂລກ) ໃນຄັ້ງວັນທີ 6 ທັນວາ 2023.