ເຖິງແມ່ນວ່າໂຕເຮົາຈະບໍ່ໄດ້ສູບຢາກໍຕາມ ແຕ່ກໍບໍ່ອາດປະຕິເສດໄດ້ວ່າ ຈະບໍ່ໄດ້ຮັບຜົນກະທົບຈາກ ຜູ້ທີ່ສູບຢາ ເພາະຈາກການລາຍງານຂອງອົງການອະນາໄມໂລກພົບວ່າ ໃນແຕ່ລະປີມີຜູ້ເສຍຊີວິດ ຈາກການສູບຢາທາງອ້ອມສູງຂຶ້ນ ເຊິ່ງອັນຕະລາຍສ່ວນໜຶ່ງເປັນຜົນມາຈາກໄດ້ຮັບຄວັນຢາສູບຈາກຄົນສູບຢາ.
ຕາມຂໍ້ມູນຈາກກະຊວງສາທາລະນະສຸກໃຫ້ຮູ້ວ່າ: ປັດຈຸບັນໃນທົ່ວໂລກມີຄົນເສຍຊີວິດ ກ່ອນໄວອັນຄວນຍ້ອນຢາສູບເພີ່ມສູງຂຶ້ນ. ສໍາລັບປະເທດລາວກໍມີຕົວເລກເພີ່ມຂຶ້ນເຊັ່ນດຽວກັນ ຜົນຮ້າຍຂອງຢາສູບນັ້ນ ມີທັງທາງກົງ ແລະ ທາງອ້ອມ ຄື: ຜົນຮ້າຍຕໍ່ສຸຂະພາບ, ການຊົມໃຊ້ຢາສູບ ເປັນຕົ້ນ ການສູບຢາຂອງຜູ້ສູບ ແລະ ຜູ້ໄດ້ຮັບຄວັນຢາສູບ ໂດຍສະເພາະແມ່ຍິງ ແລະ ເດັກນ້ອຍ ເຊິ່ງມີຄວາມສ່ຽງໃນການເປັນພະຍາດຮ້າຍແຮງ ເຊັ່ນ: ມະເຮັງປອດ, ພະຍາດເສັ້ນເລືອດຫົວໃຈ-ສະໝອງ, ພະຍາດ ຊໍ້າເຮື້ອລະບົບຫາຍໃຈ, ລະບົບລະລາຍ, ລະບົບປະສາດ, ພະຍາດອື່ນໆ ແລະ ນຳໄປສູ່ການເສຍຊີວິດ,
ຢາສູບມີ ຜົນກະທົບຕໍ່ເສດຖະກິດ-ສັງຄົມ ການຊົມໃຊ້ຢາສູບ ຍັງເປັນການທຳລາຍສຸຂະພາບຂອງຜູ້ອອກແຮງງານ, ຜູ້ຜະລິດ, ທັ່ງເພີ່ມຄ່າໃຊ້ຈ່າຍທີ່ບໍ່ຈຳເປັນ ເຊິ່ງເປັນຜົນກະທົບທາງລົບຕໍ່ການພັດທະນາເສດຖະກິດ-ສັງຄົມຂອງຊາດ ແລະ ເປັນການທຳລາຍສິ່ງແວດລ້ອມ, ນອກຈາກຈະມີຜົນຮ້າຍໃນຫຼາຍໆດ້ານແລ້ວ ຜົນຮ້າຍຕໍ່ສະມາຊິກຂອງຄອບຄົວ ເປັນຕົ້ນແມ່ຍິງ ແລະ ເດັກນ້ອຍແລ້ວ ຜູ້ສູບຢາຍັງຕ້ອງໄດ້ຈ່າຍເງິນເຂົ້າໃນການຊື້ຢາສູບ ແລະ ປິ່ນປົວພະຍາດທີ່ເກີດຂື້ນ ເຊິ່ງເປັນການເພີ່ມພາລະແບກຫາບຂອງຄອບຄົວຕື່ມອີກ.
ຢູ່ໃນຢາສູບມີສານພິດ ແລະ ສານທີ່ພາໃຫ້ເປັນພະຍາດມະເຮັງໃນຄວັນຢາສູບ ຄື:
– ສານ ຄາບອນ ມໍນອກໄຊ ເປັນສານພິດແບບດຽວກັນກັບ ຄວັນທໍ່ລົດ.
– ສານ ໄຮໂດຣເຈນ ໄຊຢາໄນ ແມ່ນແກັສພິດທີ່ທຳລາຍຫລອດປອດ ແລະ ຖົງປອດ.
– ນິໂກຕີນໃນຢາສູບ ເຮັດໃຫ້ເສບຕິດ ແລະ ໃຊ້ຜະລິດເປັນຢາຂ້າແມງໄມ້, ສານນິໂກຕີນ ໃນຢາສູບ 1 ກອກ ສາມາດເຮັດໃຫ້ໜູຕາຍໄດ້ 1 ໂຕ ແລະ ຖ້າສານນິໂກຕີນ ໃນຢາສູບ 20 ກອກ ສາມາດເຮັດໃຫ້ງົວຕາຍໄດ້ 1 ໂຕ.
– ຄວັນຢາສູບ ມີແກັສພິດ ໄນໂຕຣເຈນ ໄດອອກໄຊ.
– ຄວັນຟາສູບ ມີສານ ອາກເຊນິກ ທີ່ໃຊ້ເປັນຢາເບື່ອໜູ.
– ຄວັນຢາສູບ ມີສານ ທາຣ ທີ່ພາໃຫ້ເປັນມະເຮັງປອດ.
– ຄວັນຢາສູບ ມີສານ ໄນໂຕຣຊາມີນ ທີ່ພາໃຫ້ເປັນມະເຮັງ
– ຄວນຢາສູບ ມີສານ ແອມໂມເນຍ ໃຊ້ເປັນນໍ້າຢາລ້າງຫ້ອງນໍ້າ.
– ຄວັນຢາສູບ ມີສານ ຟອກໂມນ ເປັນນໍ້າຢາດອງສົບ
– ຄວັນຢາສູບ ພາໃຫ້ເປັນ ມະເຮັງປອດ.
– ຄວັນຢາສູບ ພາໃຫ້ເປັນ ມະເຮັງປາກ.
– ຄວັນຢາສູບ ພາໃຫ້ ຫົວໃຈວາຍ.
-ຄວັນຢາສູບ ພາໃຫ້ ເສັ້ນເລືອດສະໝອງແຕກ.
– ຄວັນຢາສູບ ພາໃຫ້ ແຂ້ວດຳ-ປາກເໝັນ.
– ຄວັນຢາສູບ ຂ້າຄົນອ້ອມຂ້າງ.
ສະນັ້ນແລ້ວ ພວກເຮົາທຸກຄົນຄວນຢຸດການສູບຢາແຕ່ມື້ເພື່ອສຸຂະພາບຂອງຕົນເອງ ແລະ ຄົນອ້ອມຂ້າງພວກເຮົາ ເພື່ອມີຊີວິດທີ່ສົດໃສປອດໄພຈາກຜົນຮ້າຍຂອງການສູບຢາ.
ຂໍ້ມູນຈາກ: ສູນຂ່າວສານການແພດ
