ເທຄວັນໂດ ຊີງຂັນເຈົ້າຄອງນະຄອນຫຼວງວຽງຈັນ ຄັ້ງທີ 6 ກຽມເປີດສາກ, 22 ພາກສ່ວນຮ່ວມມຊີງໄຊ

42

ການແຂ່ງຂັນກີລາເທຄວັນໂດ ຊີງຂັນເຈົ້າຄອງນະຄອນຫຼວງວຽງຈັນ ຄັ້ງທີ 6 ກຽມເກີດສາກຂຶ້ນຢ່າງຍິ່ງໃຫຍ່ ລະຫວ່າງວັນທີ 15-16 ມິຖຸນາ 2024 ທີ່ສູນບູໂດເຊັນເຕີ ລາວ-ຍີ່ປຸ່ນ ເຂດເຈົ້າອານຸວົງ ເມືອງຈັນທະບູລີ ນະຄອນຫຼວງວຽງຈັນ ໂດຍມີເຖິງ 22 ພາກສ່ວນແຈ້ງເຈດຈໍານົງເຂົ້າຮ່ວມຊີງໄຊ.
ພິທີດັງກ່າວ ຈັດຂຶ້ນທີ່ສະໂມສອນໃຫຍ່ ຄະນະກໍາມະການໂອແລມປິກແຫ່ງຊາດລາວ ໃຫ້ກຽດເຂົ້າຮ່ວມໂດຍ ທ່ານ ກະເສມ ອິນທະລາ ຮອງເລຂາທິການ ຄະນະກຳມະການໂອແລມປິກແຫ່ງຊາດລາວ, ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກີລານະຄອນຫຼວງວຽງຈັນ, ທ່ານ ປະສາດໄຊ ພິລາພັນເດຊ ປະທານສະຫະພັນກີລາເທຄວັນໂດແຫ່ງຊາດລາວ ແລະ ທ່ານ ທະນູສັກ ພົມມມະຈັກ ຜູ້ອໍານວຍການອໍໂຕລາວ ພ້ອມດ້ວຍຄະນະ ແລະ ຕ່າງໜ້າຜູ້ສະໜັບສະໜູນຕ່າງໆ, ຄູຝຶກ ແລະ ນັກກີລາຈາກ 22 ສະໂມສອນເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ປອ ຈັນທະວົງ ປັນຍາສິລິ ເລຂາທິການ ສະຫະພັນກີລາເທຄວັນໂດແຫ່ງຊາດລາວ ກ່າວໃນພິທີວ່າ: ການແຂ່ງຂັນເທຄວັນໂດ ຊີງຂັນເຈົ້າຄອງນະຄອນຫຼວງ ຄັ້ງທີ 6 ໂດຍການຮ່ວມມືຂອງ ສະຫະພັນເທຄວັນໂດແຫ່ງຊາດລາວ ຮ່ວມກັບ ບໍລິສັດ ອໍໂຕ ລາວ ແລະ ບໍລິສັດ ເບຍລາວ ຈໍາກັດ ລວມເຖິງບໍລິສັດອື່ນຈັດການແຂ່ງຂັນຄັ້ງນີ້ຂຶ້ນມາລະຫວ່າງວັນທີ 15-16 ມິຖຸນາ 2024 ທີ່ສູນບູໂດເຊັນເຕີ ລາວ-ຍີ່ປຸ່ນ ເປັນສະຖານທີ່ແຂ່ງຂັນ, ມີກິດຈະກໍາ, ງານຕະຫຼາດນັດ ແລະ ການແຂ່ງຂັນເທັນຄວັນໂດ ໃຫ້ເປັນເທດສະການ ເຊິ່ງມາຮອດປັດຈຸບັນມີຫຼາຍພາກສ່ວນແຈ້ງເຈດຈໍານົງເຂົ້າຮ່ວມ 22 ພາກສ່ວນ.
ຂະນະດຽວກັນ ທ່ານ ປະສາດໄຊ ພິລາພັນເດຊ ປະທານສະຫະພັນກີລາເທຄວັນໂດແຫ່ງຊາດລາວ ກ່າວວ່າ: ການແຂ່ງຂັນເທຄວັນໂດ ຊີງຂັນເຈົ້າຄອງນະຄອນຫຼວງວຽງຈັນ ຄັ້ງທີ 6 ໄດ້ຮັບການສະໜັບສະໜູນຈາກຫຼາຍບໍລິສັດນໍາໂດຍ ບໍລິສັດ ອໍໂຕລາວ, ບໍລິສັດ ເບຍລາວ ຈໍາກັດ, EZY FIT, ຊໍາຊຸງ, ເບສ ເທເລຄອມ ແລະ ສະມໍ-ບີ ( Small-b ) ຈັດຂຶ້ນເພື່ອເປັນການສ້າງຂະບວນການແຂ່ງຂັນກີລາເທຄວັນໂດ ໃຫ້ມີເວທີແຂ່ງຂັນ ແລະ ຍັງເປັນການຈັດຕາມແຜນຍຸດທະຍາສາດຂອງ ສະຫະພັນເທຄວັນໂດແຫ່ງຊາດລາວ ກໍຄືການພັດທະນາວົງການເທຄວັນໂດໃນຫຼາຍໆດ້ານເປັນຕົ້ນແມ່ນ ດ້ານບຸກຄະລາກອນ, ກໍາມະການຕັດສິນ, ຄະນະກໍາມະການຈັດການແຂ່ງຂັນ, ຄູຝຶກ ແລະ ນັກກີລາຂອງລາວໃຫ້ມີປະສົບການລະດັບປະເທດກໍຄືໃນລະດັບຂົງເຂດສາກົນ.
ນອກນັ້ນ, ລາຍການຄັ້ງນີ້ຍັງແນ່ໃສ່ພັດທະນາ ແລະ ປັບປຸງການສ້າງນັກກີລາເທຄວັນໂດເຍົາວະຊົນຮຸ່ນສືບທອດ ໃນລະດັບສະໂມສອນພາຍໃນປະເທດໃຫ້ມີຄວາມເຂັ້ມແຂງ ສາມາດສ້າງນັກກີລາດີເດັ່ນທັງປະເທດຕໍ່ສູ້ ເພື່ອທັດແທນນັກກີລາທີມຊາດລາວ ໃນປັດຈບຸັນຢ່າງເປັນລະບົບ ພິເສດກໍກຽມຄັດເລືອກນັກກີລາດີເດັ່ນເຂົ້າຮ່ວມການແຂ່ງຂັນ ເອຊຽນ ອິນດໍເກມ ໃນກາງເດືອນພະຈິກ 2024.
ສໍາລັບ 22 ພາກສ່ວນທີ່ແຈ້ງເຈດຈໍານົງເຂົ້າຮ່ວມມີດັ່ງນີ້:
1.ສະໂມສອນສະຖາບັນກີລາ-ກາຍະກໍາ
2.ສະໂມສອນ ໂຮງຮຽນພາລະສຶກສາ
3.ສະໂມສອນ ມາສເຕີເລ
4.ສະໂມສອນ ສະຫວັນນະເຂດ
5.ສະໂມສອນ ນັນດາ
6.ສະໂມສອນ ແຂວງບໍ່ແກ້ວ
7.ສະໂມສອນ ແຂວງຈໍາປາສັກ
8.ສະໂມສອນ ເສືອນ້ອຍ
9.ສະໂມສອນ ແຂວງຫຼວງພະບາງ
10.ສະໂມສອນ ຕາວັນ
11.ສະໂມສອນ ອອສກ້າ
12.ສະໂມສອນ ຕຸລີໄຊ
13.ສະໂມສອນ ລ້ານຊ້າງ
14.ສະໂມສອນ ແຂວງຊຽງຂວາງ
15.ສະໂມສອນ ແຂວງຄໍາມ່ວນ
16.ສະໂມສອນ ແຂວງອຸດົມໄຊ
17.ສະໂມສອນ ພີເຄ
18.ສະໂມສອນ ໂຊກໂຊ
19.ສະໂມສອນ ພີເອັມເອັສ
20.ສະໂມສອນ ພານທອງ
21.ສະໂມສອນ ປກສ
22.ສະໂມສອນ ປ້ອງກັນເທດ
ເຊິ່ງມີ ມີນັກກີລາຮ່ວມຫຼາຍ 350 ຄົນ ນັບຕັ້ງແຕ່ຮຸ່ນອາຍຸອະນຸຊົນ – ຊາວໜຸ່ມແຂ່ງຂັນ 3 ປະເພດຄື: ປະເພດເຕະອຸປະກອນ, ປະເພດຕໍ່ສູ້ ຮຸ່ນອາຍຸ 6 ໄປຈົນເຖິງຮຸ່ນທົ່ວໄປ ແລະ ປະເພດຟ້ອນ ປຸ່ມເຊ 50 ລາຍການ ລວມລາຍການທັງໝົດໃຊ້ເວລາ 2 ມຶ້ື້ 153 ລາຍການ ຊີງໄຊຫຼຽນຄໍາ 153 ຫຼຽນມີຫຼຽນ ແລະ ມີໃບຢັ້ງຢືນການເຂົ້າຮ່ວມແຂ່ງຂັນ ໂດຍສະເພາະສະໂມສອນໃດຍາດໄດ້ຫຼຽນລາງວັນໄດ້ຫຼາຍທີ່ສຸດຈະໄດ້ຮັບຂັນແຊັມຂັນໃຫຍ່ ລວມເຖິງມີລາງວັນອື່ນຢ່າງຫຼວງຫຼາຍເຖິງ 22 ຂັນ.
ຂ່າວ-ຮູບ: Larh Creators
A111: ເທຄວັນໂດ ຊີງຂັນເຈົ້າຄອງນະຄອນຫຼວງວຽງຈັນ ຄັ້ງທີ 6 ກຽມເປີດສາກ, 22 ພາກສ່ວນຮ່ວມມຊີງໄຊ