ຖືວ່າເປັນຄັ້ງທຳອິດ ທີ່ມີຊາວໜຸ່ມລາວຈົບການສຶກສາວິຊາຊີບ ທີ່ບໍລິສັດ BHS Corrugated ເຊິ່ງເປັນວິສາຫະກິດອັນດັບໂລກ.
20 ປີກ່ອນໜ້ານີ້ ທີ່ຄອບຄົວ Engel ໄດ້ເຫັນຄວາມສຳຄັນຂອງອາຊີວະສຶກສາໃນການຕໍ່ຕ້ານຄວາມທຸກຍາກ, ສະນັ້ນຈຶ່ງໄດ້ກໍ່ຕັ້ງມູນນິທິ “ ຄົນໃຈບຸນ ” ຂຶ້ນມາ ໂດຍຜ່ານມູນນິທິດັ່ງກ່າວ ຄອບຄົວຜູ້ປະກອບການ ເຊິ່ງເປັນຄອບຄົວທີ່ອາໄສຢູ່ເຢຍລະມັນ, ຈຶ່ງໃຫ້ຄວາມຊ່ວຍເຫຼືອແກ່ເດັກນ້ອຍລາວທີ່ຢູ່ໄກຈາກເຢຍລະມັນເກືອບ 8.500 ກິໂລແມັດ ໄດ້ຢ່າງມີຜົນເປັນຈິງ.
ປັດຈຸບັນ ມູນນິທິດັ່ງກ່າວ ໄດ້ຮ່ວມມືກັບກະຊວງສຶກສາ ແລະກີລາ, ອົງການປົກຄອງທ້ອງຖິ່ນ ໃຫ້ການສົ່ງເສີມແກ່ນັກຮຽນປະມານ 2.000 ຄົນ ທີ່ເປັນນັກຮຽນຈາກໂຮງຮຽນລັດ 3 ແຫ່ງ ໃນຊັ້ນປະຖົມ ແລະມັດທະຍົມຕອນຕົ້ນ.
ນອກນັ້ນ, ມູນນິທິຍັງມີທຶນການສຶກສາວິຊາຊີບໃຫ້ແກ່ນັກຮຽນທີ່ເສັງຈົບມໍຕົ້ນ ເພື່ອຮຽນອາຊີບທີ່ ວິທະຍາໄລເຕັກນິກລາວ-ເຢຍລະມັນ. ນັກຮຽນທຶນທີ່ຈົບຈາກວິທະຍາໄລດັ່ງກ່າວ ຍັງມີໂອກາດໄດ້ທຶນໄປຮຽນ ຕໍ່ຢູ່ສູນໃຫຍ່ຂອງບໍລິສັດ BHS Corrugated ທີ່ປະເທດເຢຍລະມັນ.
▶ ເຢຍລະມັນແມ່ນປະເທດທີ່ຕັ້ງເອົາໄວ້ໃນເປົ້າໝາຍ
ໂຊກໄຊ (25 ປີ), ອຸດ (22 ປີ) ແລະ ປັນຍາ ຢາງ (28 ປີ) ໜຸ່ມລາວທັງສາມໄດ້ເລົ່າເລື່ອງເສັ້ນທາງຂອງຕົນ ກ່ຽວກັບຄວາມຫວັງ, ກ່ຽວກັບເວລາທີ່ກຳລັງຮຽນ ກໍຄືການດຳລົງຊີວິດຢູ່ປະເທດເຢຍລະມັນ. ໂດຍສະເພາະແລ້ວ ຊີວິດຂອງທ້າວອຸດເປັນຕົວຢ່າງທີ່ຊັດເຈນເຖິງຜົນສຳເລັດຂອງພວກເຂົາ. ທ້າວອຸດເປັນ ເດັກທີ່ດ້ອຍໂອກາດ ເຊິ່ງມີຄອບຄົວທີ່ທຸກຍາກ ແຕ່ໃນທີ່ສຸດ ລາວໄດ້ໄປຮຽນວິຊາຊີບຢູ່ເຢຍລະມັນ ໃນສາຂາວິຊາຊ່າງຈັກກົນໂຮງງານ ແລ້ວຮຽນຈົບໄດ້ຮັບໃບປະກາດພ້ອມດ້ວຍໃບຍ້ອງຍໍທີ່ເປັນໜຶ່ງໃນນັກຮຽນດີເດັ່ນປະຈຳໂຮງຮຽນວິຊາຊີບ ເມືອງ Weiden ໃນລຸ້ນຂອງລາວ.
ທ້າວອຸດໄດ້ສະແດງຄວາມໝັ້ນໃຈກັບອາຊີບທີ່ລາວຮຽນຈົບມາ ແລະ ກ່າວວ່າ: ປະເທດເຢຍລະມັນ ແລະ ບໍລິສັດ BHS Corrugated ເຄີຍເປັນຈຸດເປົ້າໝາຍ ແລະ ຄວາມໃຝ່ຝັນຂອງຂ້ອຍມາກ່ອນແລ້ວ, ເຢຍລະມັນເປັນຊາດໜຶ່ງທີ່ພົ້ນເດັ່ນທາງດ້ານເຕັກນິກການຊ່າງ, ຄຳວ່າ Made in Germany ມີຊື່ສຽງໂດ່ງດັງຢູ່ແລ້ວ”.
▶ ຮຽນພາສາເຢຍລະມັນອັນວ່າຍາກ ກໍຍັງຜ່ານຜ່າໄປໄດ້ດັ່ງຄວາມຕັ້ງໃຈ
ສຳລັບ ທ້າວອຸດ, ທ້າວໂຊກໄຊ (ຊ່າງຈັກກົນ) ແລະ ນາງປັນເຍຍ ຢ່າງ (ຊ່າງອີເລັກໂຕຣນິກ) ພາສາເຢຍລະມັນກໍ່ເຄີຍເປັນສິ່ງກີດກັ້ນການກ້າວເດີນຂອງພວກເຂົາ. ໃນເວລາພຽງແຕ່ສັ້ນໆ ພວກເຂົາຕ້ອງ ຮຽນພາສາເຢຍລະມັນໃຫ້ໄດ້ທັງອ່ານ ແລະ ຂຽນ ຄຽງຄູ່ກັບຕ້ອງສຶກສາ ຄວາມຮູ້ທາງວິຊາການເຊິ່ງມີ ຄຳສັບສະເພາະທີ່ສັບສົນແລະຊັບຊ້ອນໄປພ້ອມໆກັນ. Horst Lindner ຜູ້ເປັນຄູປະຕິບັດປະຈຳບໍລິສັດ BHS Corrugated ໄດ້ບອກວ່າ:ຍາກແດ່ກໍມີແຕ່ພາກທິດສະດີເທົ່ານັ້ນ. ສ່ວນພາກປະຕິບັດ, ພວກເຂົາກໍ່ຖືວ່າ ຢູ່ໃນອັນດັບແຖວໆໜ້າ“.
▶ລະດູໜາວທີ່ປະເທດເຢຍລະມັນ
ນັບໄດ້ວ່າເປັນປະສົບການຊີວິດທີ່ບໍ່ອາດຫຼົງລືມໄດ້, ໃນລະດູໜາວແຕ່ລະປີ ທ້າວໂຊກໄຊມັກຈະໃສ່ກັນໜາວສາມໂຕຊ້ອນກັນໄວ້ໂລດ. ເຖິງຈະໜາວປານໃດກໍຕາມ ໜຸ່ມລາວຜູ້ຊຳນານງານທັງສາມຄົນນີ້ ກໍຍັງຈະຄົງຕົວເຮັດວຽກຢູ່ກັບບໍລິສັດ BHS Corrugated ນີ້ອີກຕໍ່ໄປ ເພື່ອຊອກຫາປະສົບການດ້ານວິຊາ ສະເພາະ ໃຫ້ໄດ້ຫຼາຍເທົ່າທີ່ຈະຫາໄດ້“. ພ້ອມກັນນັ້ນ ພວກເຂົາຍັງມີໂອກາດສາມາດຍົກລະດັບເປັນຄູປະຕິບັດ ຫຼື ຊ່າງເຕັກນິກ ອີກດ້ວຍ. ຖ້າຫາກກ້າວໄປເຖິງລະດັບດັ່ງກ່າວນັ້ນແລ້ວ ພວກເຂົາກໍສາມາດກັບມາເຮັດວຽກຢູ່ພາກພື້ນອາຊີເພື່ອຮັບໜ້າທີ່ໃຫ້ແກ່ບໍລິສັດ BHS ພາຍໃນເຂດເສດຖະກິດດັ່ງກ່າວນີ້ດ້ວຍ.
▶ນັກຮຽນວິຊາຊີບຈາກຕ່າງປະເທດ ນັບມື້ນັບຫຼາຍຂຶ້ນ
ຕາມຄໍາເວົ້າຂອງ Tobias Kick ເຊິ່ງເປັນຜູ້ຮັບຜິດຊອບນັກຮຽນອາຊີບຈາກຕ່າງປະເທດປະຈຳບໍລິສັດ BHS, ຄວາມໝາຍຄວາມສຳຄັນຂອງນັກຮຽນອາຊີບຈາກຕ່າງເທດ ນັບມື້ນັບເຕີບໂຕຂຶ້ນ. ໂດຍສະເພາະ ໃນວິຊາອາຊີບດ້ານເຕັກນິກ ຈະເພີ່ມຂຶ້ນເລື້ອຍໆ“. ໜຶ່ງສ່ວນສາມຂອງນັກຮຽນທັງໝົດ ຈະບໍ່ແມ່ນປະ ຊາກອນຂອງ EU, ພວກເຂົາມາຈາກຕ່າງແດນ ເຊັ່ນ: ປະເທດເອວຊາວາດໍ, ຫວຽດນາມ, ມາເລເຊຍ ຫຼື ປະເທດລາວ.
▶ ທຶນການສຶກສາທີ່ໂດດເດັ່ນເປັນໂອກາດອັນໃຫຍ່ ຫຼວງສຳລັບຜູ້ທີ່ສົນໃຈ
ມູນນິທິຄົນໃຈບຸນມີການຮ່ວມມືຢ່າງແໜ້ນແຟ້ນກັບ ວິທະຍາໄລເຕັກນິກ ລາວ-ເຢຍລະມັນ. ແຕ່ລະປີ ທາງບໍລິສັດ BHS Corrugated ມີທຶນການສຶກສາວິຊາຊີບ 40 ທຶນ ໃນສາຂາການຊ່າງຈັກກົນ ແລະ ຊ່າງໄຟຟ້າ. ຫຼັງຈາກຮຽນຈົບຈາກວິທະຍາໄລນີ້ແລ້ວ ນັກຮຽນທີ່ມີຜົນງານດີຈະມີໂອກາດໄປຮຽນຕໍ່ຢູ່ກັບບໍລິສັດ BHS Corrugated ທີ່ປະເທດເຢຍລະມັນ.
ປັດຈຸບັນມີຄົນລາວ 19 ຄົນທີ່ກຳລັງຮຽນວິຊາຊີບຢູ່ກັບບໍລິສັດນີ້. ນອກຈາກນັ້ນແລ້ວ ມູນນິທິຍັງມີທຶນສົ່ງເສີມໃຫ້ພະນັກງານຄູອາຈານຂອງວິທະຍາໄລເຕັກນິກລາວ-ເຢຍລະມັນ ໄດ້ໄປບຳລຸງ ແລະ ຍົກລະດັບທີ່ປະເທດເຢຍລະມັນອີກ.
ໃນອະນາຄົດນີ້ ທາງມູນນິທິ ຍິ່ງຈະສຸມໃສ່ການສົ່ງເສີມໃຫ້ນັກຮຽນມີໂອກາດດ້ານອາຊີບຫຼາຍຂຶ້ນ ແລະ ເອົາໃຈ່ໃສ່ໃນການພັດທະນານັກຮຽນຕາມພອນສະຫວັນຂອງບຸກຄົນ.
