ພິທີເປີດຫ້ອງການທະນາຄານ ນະໂຍບາຍ ສາຂາ ບໍລິຄຳໄຊ ທີ່ແຂວງບໍລິຄຳໄຊ ມີຂຶ້ນໃນວັນທີ 30 ພຶດສະພາ 2024 ໂດຍການເຂົ້າຮ່ວມຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານ ແຫ່ງ ສປປ ລາວ, ປະທານສະພາບໍລິຫານ ທະນາຄານນະໂຍບາຍ, ທ່ານ ສອນທະນູ ທຳມະວົງ ຮັກສາການເຈົ້າ ແຂວງບໍລິຄຳໄຊ, ທ່ານ ວິສອນ ໄຊສົງຄາມ ຜູ້ອຳນວຍການໃຫຍ່ທະນາຄານນະໂຍບາຍ.
ຫ້ອງການທະນາຄານ ນະໂຍບາຍ ສາຂາບໍລິຄຳໄຊ ຖືເປັນສາຂາແຫ່ງທີ 11 ຂອງທະນາຄານນະໂຍບາຍ ເຊິ່ງໄດ້ຮັບການສ້າງຕັ້ງຕາມຄວາມຮຽກຮ້ອງຕ້ອງການໃນການຈັດຕັ້ງປະຕິບັດວຽກງານ, ປະຕິບັດຕາມມະຕິກອງປະຊຸມໃຫຍ່ ຄັ້ງທີ່ XI ແລະ ແຜນພັດທະນາເສດຖະກິດສັງຄົມແຫ່ງຊາດ ໄລຍະ 5 ປີ ຄັ້ງທີ IX ເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ ແລະ ຄວາມດ້ອຍພັດທະນາ ຕາມແນວທາງນະໂຍບາຍຂອງພັກ ແລະ ລັດຖະບານ.
ສາຂາທະນາຄານແຫ່ງນີ້ແມ່ນໄດ້ຈັດຕັ້ງປະຕິບັດບັນດາທິດທາງ ແລະ ໜ້າທີ່ຈຸດສຸມເປັນຕົ້ນແມ່ນການສະໜອງທຶນສິນເຊື່ອ ເພື່ອປະກອບສ່ວນໃນການແກ້ໄຂ ຄວາມທຸກຍາກຂອງປະຊາຊົນຢູ່ແຂວງບໍລິຄຳໄຊ ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ; ພ້ອມກັນນີ້ ໄດ້ການຈັດຕັ້ງເຄື່ອນໄຫວວຽກງານສະໜອງແຫຼ່ງທຶນສິນເຊື່ອຂອງທະນາຄານນະໂຍບາຍ ແມ່ນຕິດພັນກັບແຜນພັດທະນາເສດຖະກິດສັງຄົມ ຂອງແຂວງ, ເມືອງ ໂດຍສະເພາະ ແນໃສ່ ບັນດາຈຸດສຸມພັດທະນາຂອງລັດຖະບານ, ຂອງທ້ອງຖິ່ນ ແລະ ບັນດາບ້ານ 3 ສ້າງ.
