ແຂວງຫຼວງນ້ຳທາ ເປີດປະດິດສະຖານຮູບປັ້ນແສງອາລຸນ ເພື່ອລະນຶກເຖິງວັນປົດປ່ອຍແຂວງຫຼວງນ້ຳທາ ວັນທີ 6 ພຶດສະພາ 1962 ຂຶ້ນໃນວັນທີ 31 ພຶດສະພາ 2024 ໂດຍການເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ເຈົ້າແຂວງ ຫຼວງນ້ຳທາ.
ທ່ານ ພູນແກ້ວ ເຫຼົາອີນ ຫົວໜ້າພະແນກໂຍທາທິການ ແລະ ຂົນສົ່ງ (ຍທຂ) ແຂວງ ກ່າວວ່າ: ເພື່ອເປັນການປັບປຸງ ລະບົບວົງວຽນໃຫ້ຖືກຕ້ອງຕາມລະບົບການສັນຈອນຂອງອາຊຽນ ເພື່ອຫຼຸດຜ່ອນອຸບັດເຫດຕາມທ້ອງຖະໜົນ ແລະ ການວາງຮູບປັ້ນແສງອາລຸນແຂວງ ຫຼວງນໍ້າທາ ເພື່ອບົ່ງບອກ ຄວາມໝາຍສຳຄັນທາງປະຫວັດສາດຂອງແຂວງ ຫຼວງນໍ້າທາ.
ໂຄງການກໍ່ສ້າງວົງວຽນ ແລະ ຮູບປັ້ນແສງອາລຸນຂອງແຂວງຫຼວງນໍ້າທາ ແມ່ນໄດ້ຮັບທຶນສະໜັບສະໜູນຊ່ວຍເຫຼືອລ້າຈາກ ທ່ານ ນາງ ສົມວິໄລວົງ ສຸຂະວົງ ພັນລະຍາ ທ່ານເຈົ້າແຂວງຫຼວງນໍ້າທາ ໂດຍການຈັດຕັ້ງປະຕິບັດຂອງ ບໍລິສັດ ກະຣຸນາໄຊກໍ່ສ້າງ ຈຳກັດ ຊິ່ງພະແນກ ຍທຂ ເປັນຜູ້ປະສານງານດ້ານເຕັກນິກ, ຕິດຕາມການກໍ່ສ້າງມູນຄ່າ 297 ລ້ານກວ່າກີບ, ເລີ່ມລົງມືກໍ່ສ້າງວົງວຽນ ແລະ ຖານຮູບປັ້ນໃຊ້ເວລາ 5 ເດືອນຈຶ່ງສຳເລັດ.
ໄລຍະຜ່ານມາວົງວຽນແຫ່ງດັ່ງກ່າວ ແມ່ນບໍ່ໄດ້ຕັ້ງຢູ່ຈຸດໃຈກາງຂອງ 3 ແຍກ ຈຶ່ງເຮັດໃຫ້ລົດບັນທຸກຂະໜາດໃຫຍ່ (22 ລໍ້) ມີຄວາມຫຍຸ້ງຍາກໃນເວລາລ້ຽວອ້ອມວົງວຽນ.
ການຕິດຕັ້ງຮູບປັ້ນແສງອາລຸນແຂວງຫຼວງນໍ້າທາ ແມ່ນມີຄວາມຈໍາເປັນໄດ້ວາງຖານຂອງຮູບປັ້ນໃຫ້ຂະໜານກັບຕະຝັ່ງດ້ານທິດຕາເວັນຕົກ, ປິ່ນຫຼັງໃສ່ປ້າຍໂຄສະນາ ດ້ານໜ້າແມ່ນໄດ້ຫັນໜ້າໄປຫາທາງທິດຕາເວັນອອກ ເພື່ອໃຫ້ແຂກ, ນັກທ່ອງທ່ຽວ ທີ່ເດີນທາງມາແຕ່ຕ່າງແຂວງ, ຕ່າງເມືອງທີ່ເດີນທາງເຂົ້າມາແຂວງຫຼວງນໍ້າທາ ກໍຈະເຫັນຮູບປັ້ນດັ່ງກ່າວ ເປັນຈຸດເດັ່ນສວຍງາມຕ້ອນຮັບແຂກຕ່າງດ້າວທ້າວຕ່າງແດນທີ່ເຂົ້າມາໃນເທສະບານແຂວງ ຫຼວງນໍ້າທາ .
ຈາກນັ້ນ ທ່ານ ຈັນທອງ ແກ້ວປະເສີດ ຮອງເລຂາພັກແຂວງຫຼວງນໍ້າທາ ກໍໄດ້ເລົ່າປະຫວັດການສູ້ຮົບເພື່ອຍາດເອົາເຂດນ້ຳແດນດິນແຂວງຫຼວງນ້ຳທາ ເຊິ່ງໄຊຊະນະບັ້ນຮົບຫຼວງນໍ້າທາ ແມ່ນໄຊຊະນະຂອງກຳລັງແຮງແຫ່ງນໍ້າໃຈຮັກຊາດ, ນ້ຳໃຈຄຽດແຄ້ນຈັກກະພັດຜູ້ຮຸກຮານ, ນໍ້າໃຈຕໍ່ສູ້ອັນອົງອາດກ້າຫານ, ບໍ່ຍອມຈຳນົນຂອງກອງທັບ ແລະ ປະຊາຊົນລາວ ໂດຍສະເພາະແມ່ນກອງທັບ ແລະ ປະຊາຊົນຊາວຫຼວງນໍ້າທາ. ມາຮອດເວລາ 3 ໂມງເຊົ້າຂອງວັນທີ 6 ພຶດສະພາ 1962 ບັ້ນຮົບຫຼວງນ້ຳທາເລີ່ມແຕກສຽງປືນດ້ວຍໃຊ້ກຳລັງໄຟບຸກໂຈມຕີຍິງໃສ່ຈຸດສຸມຕ່າງໆຂອງສັດຕູຢ່າງແຂງແຮງ, ອັນເຮັດໃຫ້ກໍາລັງຂອງສັດຕູຕົກຢູ່ໃນສະພາບກະວົນກະວາຍ ແລະ ບໍ່ສາມາດຈັ້ງທ່າໄດ້.
ຈາກນັ້ນ ສາມາດຢຶດປ້ອມຂອງສັດຕູຢູ່ເຂດບ້ານຫ້ວຍ ຫົກ, ນານ້ອຍ, ບ້ານປຸ່ງ, ນໍ້າປີກ ແລະ ເຂດຕາເວັນຕົກສ່ຽງໃຕ້ຂອງທົ່ງພຽງເມືອງຫຼວງນໍ້າທາ ແລະ ມາຮອດເວລາ 11 ໂມງຂອງວັນທີ 6 ພຶດສະພາ 1962 ສາມາດປົດປ່ອຍ ແລະ ເປັນເຈົ້າທົ່ງພຽງເມືອງຫຼວງນໍ້າທາໄດ້ຢ່າງສີ້ນເຊີງ. ສາມາດປັດເຂ່ຍກຳລັງຂອງສັດຕູອອກຈາກວົງສູ້ຮົບໄດ້ 2ພັນກວ່າຄົນ, ດັບສູນສັດຕູໄດ້ 327 ຄົນ, ຈັບທະຫານສັດຕູໄດ້ 1.522 ຄົນ, ຍິງຍົນຕົກ 2 ລຳ; ຢຶດອາວຸດລູກກະສຸນ, ພາຫະນະ, ສະບຽງອາຫານ, ເຄື່ອງນຸ່ງຫົ່ມຕ່າງໆໄດ້ຫຼາຍຮ້ອຍໂຕນ, ປົດປ່ອຍດິນແດນໄດ້ 8.000 ກິໂລຕາແມັດ ແລະ ປົດປ່ອຍປະຊາຊົນໄດ້ 76.000 ຄົນ.
ໂອກາດນີ້, ທ່ານ ວຽງສະຫວັດ ສີພັນດອນ ເຈົ້າແຂວງ ຫຼວງນໍ້າທາ ພ້ອມດ້ວຍຄອບຄົວ ກໍໄດ້ຕັດແຖບຜ້າເປີດປະດິດສະຖານຮູບປັ້ນແສງອາລຸນ ເພື່ອລະນຶກເຖິງວັນປົດປ່ອຍແຂວງຫຼວງນ້ຳທາ ຢ່າງເປັນທາງການ.
[ ຂ່າວ: ອຸ້ມ ສົມນໍວັນ ]
