ໃນວັນທີ 1 ມິຖຸນາ 2024 ທີ່ສວນພຶກສາ ບ້ານດານຊີ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດກິດຈະກຳສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ໂດຍການເຂົ້າຮ່ວມຂອງ ທ່ານ ພູວົງ ພະມີສິດ ເຈົ້າຂອງຮ້ານຄຳພູວົງ ແລະ ສວນພຶກສາ; ມີບັນດານ້ອງໆ ນັກຮຽນ, ຄູອາຈານ, ພໍ່ແມ່ຜູ້ປົກຄອງ, ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມຢ່າງຄຶກຄື້ນມ່ວນຊື່ນ.
ທ່ານ ພູວົງ ພະມີສິດ ກ່າວວ່າ: ກິດຈະກໍາດັ່ງກ່າວແມ່ນການສົ່ງເສີມໃຫ້ນ້ອງໆ ມີຄວາມສາມັກຄີ, ມີການເຕົ້າໂຮມກັນເພື່ອຈັດກິດຈະກໍາ ສ້າງບັນຍາກາດໃຫ້ມີ ຄວາມເບີກບານມ່ວນຊື່ນ ພ້ອມທັງສົ່ງເສີມການທ່ອງທ່ຽວ. ສວນພຶກສາເອງໄດ້ມີການພັດທະນາ ແລະ ປັບປຸງຫຼາຍຢ່າງເພື່ອດຶງດູດໃຫ້ນັກທ່ອງທ່ຽວໄດ້ເຂົ້ມາທ່ຽວຊົມ ໂດຍສະເພາະຫ້ອງວາງສະແດງ, ນໍ້າຕົກ, ສວນນໍ້າ, ວັງພະຍານາກ, ຕໍ່ໄປປັບສະລິງ, ສ້າງໄກນໍາທ່ຽວ, ວາງສະແດງຊຸດຊົນເຜົ່າ, ປັບປຸງອາຫານ, ມີບໍລິການຫ້ອງປະຊຸມ ແລະ ອື່ນໆ
ພາຍໃນພິທີໄດ້ມີກິດຈະກຳປູກຕົ້ນໄມ້ມຸງຄຸນທີ່ເຮືອນຊົນເຜົ່າ, ກິດຈະກຳປ່ອຍປາຈຳນວນ 500ໂຕສູ່ໜອງນ້ຳໃນສວນພຶກສາເພື່ອເສີມສ້າງຄວາມອຸດົມສົມບູນຂອງລະບົບນິເວດ, ຮັບຊົມການສະແດງສິລະປະຟ້ອນ, ການຮ້ອງເພງ, ການສະແດງກາຍະສິນຈາກນ້ອງໆນັກຮຽນພ້ອມດ້ວຍຄະນະສິລະປະໃນສວນພຶກສາ, ກິດຈະກຳເດີນແບບຂອງນາງແບບ-ຊາຍແບບຊົນເຜົ່າມົ້ງ, ກິດຈະກຳຫຼິ້ນເກມແຈກເຄື່ອງລາງວັນໃຫ້ນ້ອງໆນັກຮຽນ, ຮັບຊົມເຮືອນຊົນເຜົ່າ ແລະ ສວນນ້ຳທີ່ເປີດໃໝ່ໃນສວນພຶກສາ.
