ພູມໃຈໃນຄວາມເປັນລາວ ຢູ່ຕ່າງແດນຫຼາຍປີ ກໍກັບມາພັດທະນາຖິ່ນເກີດ

91

ຈາກປະເທດລາວໄປຫຼາຍປີ ມີກິດຈະການເປັນຂອງຕົນເອງໃນອາເມຣິກາ ແຕ່ຢາກມາພັດທະນາຊາດກໍາເນີດ, ດໍາເນິີນທຸລະກິດ 10 ກວ່າປີ ຜົນປະກອບການເຕີບໂຕ ຂະຫຍາຍທຸລະກິດຕື່ມ ພາຍໃຕ້ແນວຄິດ “ ຄືນກໍາໄລສູ່ສັງຄົມ ”.
ເມື່ອບໍ່ດົນຜ່ານມານີ້ ທີມຂ່າວ ເສດຖະກິດການຄ້າ ໄດ້ມີໂອກາດ ສໍາພາດ ທ່ານ ສີສົມບັດ ພິລາວົງ ປະທານ ບໍລິສັດ ສີສົມບັດ ເຊົ່າສິນເຊື່ອ ຈໍາກັດ ເຊິ່ງນອກຈາກຖາມດ້ານທັດສະນະຄວາມຄິດເຫັນໃນຍຸກເສດຖະກິດປັດຈຸບັນແລ້ວ ຍັງເຈາະຈິ້ມປະສົບການຊີວິດທາງທຸລະກິດຂອງເພິ່ນເພື່ອນໍາມາເຜີຍແຜ່ແລກ ປ່ຽນສູ່ສັງຄົມ.

ທ່ານ ສີສົມບັດ ພິລາວົງ ເກີດຢູ່ເມືອງຜາໄຊ ແຂວງ ຊຽງຂວາງ ແຕ່ເຕີບໃຫຍ່ໃນວຽງຈັນ. ພາຍ ຫຼັງຮຽນຈົບອຸດົມ ກໍໄປອາໄສຢູ່ອາເມຣິກາ ແລະ ບໍ່ດົນກໍມີທຸລະກິດຂະໜາດນ້ອຍເປັນຂອງຕົນເອງ ແຕ່ດ້ວຍຄວາມຄິດຮອດບ້ານເກີດເມືອງນອນ ພ້ອມຮັບຮູ້ໃນແນວທາງນະໂຍບາຍເປີດກວ້າງຂອງພັກ-ລັດຖະບານ; ໄລຍະປີ 1995 ກໍໄດ້ລົງທຶນໃຫ້ພີ່ນ້ອງທົດລອງເຮັດທຸລະກິດຢູ່ລາວ ເຊິ່ງເຫັນໄດ້ເຖິງ ຄວາມເປັນໄປໄດ້ ຈຶ່ງສຶກສາວາງແຜນເຮັດທຸລະກິດດ້ວຍຕົນເອງ ແລະ ໄດ້ເລີ່ມຢ່າງເປັນທາງການເມື່ອປີ 2007.
ສີສົມບັດ ເຊົ່າສິນເຊື່ອ ປະກົດຕົວທ່າມກາງສະພາບແວດລ້ອມສັງຄົມໄລຍະນັ້ນປະຊາຊົນເຂົ້າເຖິງການບໍລິການທາງທະນາຄານຂ້ອນຂ້າງຍາກ ແຕ່ປານນັ້ນກໍຕາມ ທຸລະກິດດ້ານສິນເຊື່ອໃນເບື້ອງຕົ້ນກໍມີອຸປະສັກບໍ່ໜ້ອຍເຊັ່ນກັນ ຊຶ່ງທ່ານກໍເຂົ້າໃຈດີວ່າ ອັນໃດທີ່ເປັນສິ່ງໃໝ່ໃນສັງຄົມຍ່ອມຕ້ອງໃຊ້ເວລາ ແລະ ຄວາມເຊື່ອໝັ້ນຈາກສັງຄົມ. ດັ່ງນັ້ນ, ທ່ານ ສີສົມບັດ ພິລາວົງ ຈຶ່ງເນັ້ນການບໍລິການທີ່ດີ, ສ້າງຄວາມໄວ້ວາງໃຈຕໍ່ລູກຄ້າ ເຮັດໃຫ້ຜູ້ໃຊ້ບໍລິການຮູ້ສຶກໄດ້ຮັບປະໂຫຍດ ແລະ ເກີດຄວາມເຊື່ອໝັ້ນ ຄຽງຄູ່ກັບນະໂຍ ບາຍທີ່ເໝາະສົມຂອງບໍລິສັດຕໍ່ພະນັກງານທີ່ເຮັດວຽກ.

“ ເບື້ອງຕົ້ນກໍປະສົບບັນຫາ ເພາະເປັນສິ່ງໃໝ່ໃນສັງຄົມ ຊຶ່ງກໍເປັນປົກກະຕິ…ເມື່ອຜ່ານໄລຍະໃດໜຶ່ງກໍຄ່ອຍດີຂຶ້ນ ຈາກເມື່ອກ່ອນການກູ້ຢືມເງິນ ພໍ່ແມ່ປະຊາຊົນບາງຄົນຈະມີຄວາມຢ້ານ, ມີຄວາມອາຍທີ່ເປັນໜີ້ ແລະ ຕໍ່ໆມາເມື່ອມີຄວາມຈໍາເປັນເຂົາເຈົ້າກໍຈຶ່ງກ້າເຂົ້າມາຫາ…ບາງຄົນກໍຊື້ລົດໄປຄ້າຂາຍ, ເຮັດທຸລະກິດ, ເຮັດວຽກງານ ແທນທີ່ຈະທ້ອນເງິນຫຼາຍປີຈຶ່ງໄດ້ພາຫະນະ ແຕ່ບັງເອີນເຂົາອາດທ້ອນເງິນພຽງປີດຽວກໍສາມາດຜ່ອນເອົາລົດໄປຂີ່; ຍັງສາມາດເອົາເງິນໄປໝູນໃຊ້ທາງອື່ນ ຫຼື ເຮັດກິດຈະການ; ລັກສະນະໜຶ່ງກໍບໍ່ແຕກຕ່າງກັບວ່າຊ່ວຍເຂົາເຈົ້າມີພະລັງເພີ່ມຂຶ້ນ ”, ທ່ານ ສີສົມບັດ ພິລາວົງ ກ່າວ.
ມາຮອດປັດຈຸບັນ ບໍລິສັດ ສີສົມບັດ ເຊົ່າສິນເຊື່ອ ຈໍາກັດ ສາມາດຍືນຍົງ ແລະ ເຕີບໃຫຍ່ ຜ່ານການເວລາ 10 ກວ່າປີ ມີທຸລະກິດຂະແໜງອື່ນຂະຫຍາຍຕື່ມ ຈາກການເລີ່ມຕົ້ນມີພະນັກງານພຽງ 5 ຄົນດຽວນີ້ມີຈໍານວນລວມເປັນຫຼັກຮ້ອຍທີ່ປະຈໍາການຢູ່ນະຄອນຫຼວງ ແລະ ຕ່າງແຂວງ.

ທ່ານ ປະທານ ບໍລິສັດ ຍັງເວົ້າວ່າ: ຍ້ອນພັກ-ລັດໃຫ້ ຄວາມຍຸຕິທໍາ, ອໍານວຍ ຄວາມສະດວກ ເຮັດໃຫ້ບໍລິສັດເຕີບໂຕຕະຫຼອດມາ; ໃນເມື່ອກິດຈະການເຕີບໂຕຕໍ່ເນື່ອງ ຈຶ່ງເຮັດທຸລະກິດຢ່າງອື່ນເພີ່ມເພື່ອເປັນຊັບສິນມໍລະດົກຂອງຊາດ ເຊັ່ນ: ດ້ານອະສັງຫາ ປຸກສ້າງພັດທະຄານ-ສະຖານທີ່ພັກ ຮອງຮັບຄົນເຊື້ອຊາດລາວຢູ່ຕ່າງປະເທດເພື່ອໃຫ້ເຂົາເຈົ້າໄດ້ເຂົ້າມາພັກຜ່ອນ ແລະ ໃຊ້ຊີວິດບັ້ນປາຍໃນປະເທດລາວ. ໃນຖານະທີ່ຕົນເອງມາເຮັດທຸລະກິດໃນລາວທີ່ປະສົບຜົນສໍາເລັດກໍຢາກເຮັດອັນໃດໜຶ່ງເພື່ອປະເທດຊາດ-ເພື່ອສັງຄົມໃນລາວ ໂດຍສະເພາະການປຸກສ້າງອາຄານທີ່ເປັນການລົງທຶນມູນຄ່າສູງ ກໍເພື່ອໃຫ້ຫຼາຍຄົນໄດ້ເຫັນ, ໄດ້ຊົມໃຊ້, ເປັນໃບໜ້າໃບຕາໃຫ້ກັບບ້ານເມືອງກໍຄືປະເທດຊາດ.
“ ຄັນມີໂອກາດກໍຢາກໃຫ້ຄົນເຊື້ອຊາດລາວທີ່ຢູ່ຕ່າງປະເທດ ມາພັດທະນາບ້ານເຮົາ ເພາະຢູ່ບ້ານເຮົາຍັງມີຫຼາຍສິ່ງຫຼາຍຢ່າງທີ່ສາມາດເຮັດໄດ້…ເວລາເຮົາຢູ່ບ້ານເພິ່ນເຫັນຫຼາຍສິ່ງຢ່າງ, ມີປະສົບການໃນລະດັບໃດໜຶ່ງ ເມື່ອມາໃຊ້ຢູ່ບ້ານເຮົາມັນກໍງ່າຍ…ພັກ-ລັດຖະບານລາວກໍເປີດກວ້າງຢູ່ແລ້ວ ”, ທ່ານ ສີສົມບັດ ພິລາວົງ ກ່າວ.