ເສັ້ນທາງຄືປັດໄຈສຳຄັນຂອງການໃຊ້ຊີວິດ ມີເສັ້ນທາງດີ, ການໄປມາສະດວກການພັດທະນາກໍ່ຈະໄປໄວຂຶ້ນ ຊຶ່ງດີໃຈກັບກຸ່ມບ້ານໄຊສົມບູນທີ່ປຸ້ມລຸມກັນສ້າງເສັ້ນທາງເບຕົງຜ່ານໄປແຕ່ລະບ້ານດ້ວຍຄວາມຮັບຜິດຊອບເຂດແດນຂອງໃຜລາວ ເຖິງຈະບໍແລ້ວທັນໃຈໃນເວລາສັ້ນໆແຕ່ຄ່ອຍເຮັດຄ່ອຍສ້າງໄປ ເພື່ອຄວາມສະບາຍໃນວັນໜ້າ.
ໃນວັນທີ 5 ມິຖຸນາ 2024 ເມືອງອຸທຸມພອນ ແຂວງສະຫວັນນະເຂດ, ໄດ້ເປີດການນຳໃຊ້ເສັ້ນທາງເບຕົງເສີມເຫຼັກ ຂອງກຸ່ມບ້ານໄຊສົມບູນ. ໂດຍການເປັນກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ມີບັນດາທ່ານການນຳຂອງແຂວງ, ເມືອງອຸທຸມພອນ ພ້ອມດ້ວຍອຳນາດການປົກຄອງ ທັງ 3 ບ້ານຄື: ບ້ານໄຊສົມບູນ, ບ້ານອຸດົມມີໄຊ ແລະບ້ານໄຊຍະເພັດ ເຂົ້າຮ່ວມ.
ທ່ານ ຄຳຈັນ ອຳພາວັນ ນາຍບ້ານໄຊສົມບູນ ໄດ້ຕາງໜ້າໃຫ້ແກ່ 3 ບ້ານລາຍງານໃຫ້ຮູ້ວ່າ: ສຳລັບການກໍ່ສ້າງທາງເບຕົງເສີມເຫຼັກ ຂອງກຸ່ມບ້ານໄຊສົມບູນ ແມ່ນໄດ້ເຮັດເປັນແຕ່ລະຂອບເຂດບ້ານ, ໂດຍມີໄລຍະທາງ 2 ຂະໜາດຄື: ທາງກວ້າງ 7 ແມັດ, ຍາວ 396 ແມັດ, ທາງກວ້າງ 3,50 ແມັດ (ສຳເລັດແລ້ວເຄິ່ງໜຶ່ງ), ຍາວ 466 ແມັດ, ມີມູນຄ່າການກໍ່ສ້າງທັງໝົດ 647 ລ້ານກວ່າກີບ, ໃນນັ້ນ ໃຊ້ຊີມັງທັງໝົດ 268 ໂຕນ, ໃຊ້ຫີ້ນແຮ່ 1.026 ແມັດກ້ອນ, ໃຊ້ຊາຍ 628 ແມັດກ້ອນ, ໃຊ້ເຫຼັກຕາໜ່າງ 70 ກໍ້, ມີ 3.500 ແມັດ, ໃຊ້ຜ້າຢາງປູພື້ນ 61 ກໍ້, ເທົ່າກັບ 1.525 ແມັດ, ໃຊ້ເວລາການກໍ່ສ້າງທັງໝົດ 2 ເດືອນກວ່າ; ເຊິ່ງແຫຼ່ງທຶນທີ່ນຳມາກໍ່ສ້າງ ແມ່ນໄດ້ຈາກການປະກອບສ່ວນຈາກຫຼາຍພາກສ່ວນ ເປັນຕົ້ນ: ທຶນຈາກງົບປະມານຂອງເມືອງ, ທຶນສົມທົບຈາກນັກທຸລະກິດ, ທຶນຈາກການປະກອບສ່ວນຂອງພຣະສົງ ແລະທຶນສົມທົບຂອງພໍ່ແມ່ປະຊາຊົນ.
ທ່ານນາຍບ້ານຍັງກ່າວຕື່ມວ່າ: ສຳລັບການກໍ່ສ້າງເສັ້ນທາງເບຕົງເສີມເຫຼັກ ຂອງກຸ່ມບ້ານໄຊສົມບູນ ແມ່ນໝາກຜົນໃນການຮ່ວມແຮງຮ່ວມໃຈ ໃນການພັດທະນາພື້ນຖານໂຄງລ່າງ ໃຫ້ມີຄວາມສະດວກໃນການໄປ-ມາ, ແລກປ່ຽນຄ້າຂາຍ, ການຮຽນ, ການປິ່ນປົວສຸຂະພາບ ແລະອື່ນໆ, ເຊິ່ງເຫັນໄດ້ຄວາມຈຳເປັນຄືດັ່ງກ່າວ, ການນຳເມືອງພ້ອມຄະນະ ຈຶ່ງໄດ້ຕັດສິນໃຈນຳພາພໍ່ແມ່ປະຊາຊົນ, ໂດຍໄດ້ມີການເຮັດບຸນຫາລາຍໄດ້, ການປະກອບສ່ວນຈາກການນຳແຂວງ, ເມືອງ, ການລະດົມຈາກນັກທຸລະກິດ, ຈາກປະຊາຊົນໃນສັງຄົມ ເຊິ່ງອຳນາດການປົກຄອງບ້ານ, ເຖົ້າແກ່ແນວໂຮມ, ພ້ອມປະຊາຊົນທັງ 3 ບ້ານ, ໄດ້ເປັນເຈົ້າການທາງດ້ານແຮງງານ, ນອກນັ້ນ ຍັງມີກຳລັງພະນັກງານ, ກຳລັງອ້າຍນ້ອງທະຫານ ຈາກກົມກອງອ້ອມຂ້າງເຂົ້າຊ່ວຍຈຳນວນໜຶ່ງ.
ຈາກນັ້ນ ທ່ານ ທອງໃສ ໄຊຍະວົງຄຳດີ ເຈົ້າເມືອງອຸທຸມພອນ ກໍ່ໄດ້ກ່າວສະແດງຄວາມຂອບອົກຂອບໃຈ ຕໍ່ການປະກອບສ່ວນ ໃນການພັດທະນາພື້ນຖານໂຄງລ່າງຂອງເມືອງ ໂດຍມີທຸກພາກສ່ວນໄດ້ໃຫ້ການຮ່ວມມື ໂດຍສະເພາະ ກຳລັງຊັບທີ່ຊ່ວຍໃນການກໍ່ສ້າງ, ພ້ອມນັ້ນ ກໍ່ຍັງຮຽກຮ້ອງມາຍັງອຳນາດການປົກຄອງ, ພໍ່ແມ່ປະຊາຊົນ ຈົ່ງພ້ອມກັນປົກປັກຮັກສາ ເສັ້ນທາງດັ່ງກ່າວນີ້ ເພື່ອໃຫ້ນຳໃຊ້ໄປໄດ້ຍາວນານ.
ຂ່າວແຈ້ງໃຫ້ຮູ້ຕື່ມວ່າ: ໃນການກໍ່ສ້າງທາງເບຕົງເສີມເຫຼັກ ຂອງກຸ່ມບ້ານໄຊສົມບູນຄັ້ງນີ້ ທ່ານເຈົ້າແຂວງສະຫວັນນະເຂດ ກໍ່ໄດ້ປະກອບສ່ວນຊີມັງ ຈຳນວນ 30 ໂຕນ, ເພື່ອປະກອບສ່ວນໃນການສ້າງສາ ພັດທະນາພື້ນຖານໂຄງລ່າງ ຂອງພໍ່ແມ່ປະຊາຊົນຢູ່ໃນເຂດດັ່ງກ່າວຕື່ມອີກ.
