ໄມໂຄຣຊັອຟ ບໍລິສັດຊັ້ນນຳດ້ານເຕັກໂນໂລຊີຂອງສະຫະລັດອາເມຣິກາ ປະກາດແຜນການລົງທຶນພື້ນຖານໂຄງລ່າງຄລາວ ແລະ ປັນຍາປະດິດ ມູນຄ່າຫຼາຍກວ່າ3,2ຕື້ໂດລາສະຫະລັດ ໃນປະເທດຊູແອັດ.
ຂ່າວສານຫວຽດນາມລາຍງານວ່າ: ໃນວັນທີ 3 ມິຖຸນາ ບໍລິສັດ ໄມໂຄຣຊັອຟ (Microsoft) ປະກາດວ່າ ຈະລົງທຶນ 3,2 ຕື້ໂດລາ ເພື່ອຂະຫຍາຍພື້ນຖານໂຄງລ່າງຄລາວ ແລະ ປັນຍາປະດິດ (AI) ຢູ່ ຊູແອັດ ໃນໄລຍະ 2 ປີ. ນີ້ແມ່ນການລົງທຶນທີ່ໃຫຍ່ທີ່ສຸດດ້ານເຕັກໂນໂລຊີຂອງອາເມຣິກາໃນປະເທດນີ້.
ທ່ານ ເບຣດ ສະມິດ ປະທານບໍລິສັດໄມໂຄຣຊັອຟ ກ່າວຄຳເຫັນໃນກອງປະຊຸມຂ່າວຮ່ວມກັບ ທ່ານ ອັລ ຄຣິສເຕີສັນ ນາຍົກລັດຖະມົນຕີ ຊູແອັດ ວ່າ: ໄມໂຄຣຊັອຟໃຫ້ຄໍາໝັ້ນສັນຍາທີ່ຈະຝຶກອົບຮົມທັກສະດ້ານ AI ໃຫ້ກັບ 250.000 ຄົນ (ເທົ່າກັບ 2,4% ຂອງປະຊາກອນຊູແອັດ) ໃນປີ 2027.
ການລົງທຶນທີ່ໃຫຍ່ທີ່ສຸດຂອງບໍລິສັດໃນ ຊູແອັດ ຈະຊ່ວຍໃຫ້ປະເທດນີ້ສ້າງພື້ນຖານໂຄງລ່າງສູນຂໍ້ມູນ AI ຊັ້ນນຳຂອງໂລກ.
ທ່ານ ເບຣດ ສະມິດ ໄດ້ອະທິບາຍວ່າ ເຫດຜົນຂອງການຕັດສິນໃຈຄັ້ງນີ້ຕົ້ນຕໍແມ່ນຍ້ອນ ຊູແອັດ ມີນະໂຍບາຍພະລັງງານທີ່ກ້າວໜ້າ, ທັງສ້າງການເຂົ້າເຖິງພະລັງງານສີຂຽວໄດ້ງ່າຍດາຍ. ປະທານໄມໂຄຣຊັອຟ ໃຫ້ຂໍ້ສັງເກດວ່າການລົງທຶນຂະໜາດໃຫຍ່ໃນ ຊູແອັດ ມີທ່າແຮງທີ່ຈະປູທາງໄປສູ່ການລົງທຶນອື່ນໆອີກຈໍານວນຫຼາຍ.
ໃນຊຸມເດືອນມໍ່ໆມານີ້, ໄມໂຄຣຊັອຟ ໄດ້ປະກາດການລົງທຶນທີ່ຄ້າຍຄືກັນຢູ່ປະເທດອື່ນໆ, ໃນນັ້ນມີປະມານ 4 ຕື້ເອີໂຣ ຢູ່ ຝຣັ່ງ ແລະ 2,9 ຕື້ໂດລາ ຢູ່ ຍີ່ປຸ່ນ.
