ສະຖາບັນ ອຸດສາຫະກຳ ແລະ ການຄ້າ, ກະຊວງອຸດສາຫະກຳ ແລະ ການຄ້າ(ອຄ) ຮ່ວມກັບ ໂຄງການການຄ້າ ລະດັບພາກພື້ນ ເພື່ອການພັດທະນາ (RT4D) ຈັດຊຸດຝືກອົບຮົມ ຄວາມຮູ້ພື້ນຖານກ່ຽວກັບການຄ້າທາງເອເລັກໂຕຼນິກ, ການເຮັດການຕະຫຼາດຂອງການຂາຍອອນໄລນ໌ ຂຶ້ນໃນລະຫວ່າງວັນທີ 5-6 ມິຖຸນາ 2024 ທີ່ໂຮງແຮມ ອີສທ໌ອິນ ເຂົ້າຮ່ວມຂອງ ທ່ານ ວຽງສະຫວ່າງ ທິບພະວົງ, ຫົວໜ້າສະຖາບັນ ອຸດສາຫະກຳ ແລະ ການຄ້າ, ທ່ານ ນາງ ສີອານົງ ພົມກອງ ຜູ້ຈັດການໂຄງການ RT4D ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ຫົວຂໍ້ຂອງການຝຶກອົບຮົມໃນຄັ້ງນີ້ມີ: ຄວາມຮູ້ພື້ນຖານກ່ຽວກັບການຄ້າທາງເອເລັກໂຕຼນິກ, ກົດລະບຽບທີ່ກ່ຽວຂ້ອງ, ຂໍ້ດີ-ຂໍ້ເສຍຂອງການຂາຍອອນໄລນ໌, ຂັ້ນຕອນການກະກຽມສຳລັບຜູ້ທີ່ຕ້ອງການຄ້າຂາຍອອນໄລ໌, ການເຮັດການຕະຫຼາດຂອງການຂາຍອອນໄລນ໌, ວິທີສ້າງຄອນເທັນ, ແລະ ຫົວຂໍ້ທີ່ສຳຄັນ ແລະ ໜ້າສົນໃຈອື່ນໆ.
ໃນລະຫວ່າງການສຳມະນາ, ຜູ້ເຂົ້າຮ່ວມໄດ້ປ່ຽນກັນ ແບ່ງປັນປະສົບການຕົວຈິງ ແລະ ຂໍຄຳແນະນຳຈາກອາຈານໃນຫົວຂໍ້ ແລະ ເຫດການທີ່ເກີດຂຶ້ນກັບຕົນ ແລະ ຄົນຮູ້ຈັກ. ຜູ້ເຂົ້າຮ່ວມຫຼາຍທ່ານຍັງໄດ້ນຳເອົາສິນຄ້າຂອງຕົນ ໄປວາງສະແດງ ແລະ ໂຄສະນາຂາຍໃນສະຖານທີ່ຝຶກອົບຮົມຕື່ມອີກ.
ໃນຂັ້ນຕໍ່ໄປ, ຄູຝຶກ ແລະ ຜູ້ເຂົ້າຮ່ວມໄດ້ສ້າງກຸ່ມວັອດແອບ ເພື່ອສືບຕໍ່ແລກປ່ຽນປະສົບການ, ຂະຫຍາຍຕາໜ່າງທຸລະກິດ ແລະ ໂອກາດໃນການພັດທະນາ.
ໂຄງການ ການຄ້າ ລະດັບພາກພື້ນ ເພື່ອການພັດທະນາ (the Regional Trade for Development – RT4D)ໄດ້ເຮັດວຽກຮ່ວມກັບສະຖາບັນ ອຸດສາຫະກຳ ແລະ ການຄ້າ ກະຊວງ ອຄ, ນັບແຕ່ເດືອນ ພະຈິກ ປີ 2023ເປັນຕົ້ນມາ ເພື່ອໃຫ້ການສະໜັບສະໜູນ ໂຄງການການຄ້າທາງອີເລັກໂຕຼນິກ, ເຊິ່ງ ຮວມມື 4 ໜ້າວຽກໃຫຍ່: 1) ການລົງສຳຫຼວດ ແລະ ວິໄຈ ຂໍ້ມູນກ່ຽວກັບການຄ້າທາງອີເລັກໂຕຼນິກຢູ່ນະຄອນຫຼວງວຽງຈັນ ແລະ ຫຼວງພະບາງ (ຊຶ່ງແມ່ນຈຸດໃຫຍ່ຂອງການຄ້າທາງອີເລັກໂຕຼນິກຢູ່ລາວ; 2) ເປີດກອງປະຊຸມປຶກສາຫາລືກັບບັນດາພາກສ່ວນກ່ຽວຂ້ອງ ເພື່ອສະເໜີຄຳແນະນຳໃຫ້ລັດຖະບານປັບປຸງແກ້ໄຂລະບຽບກົດໝາຍທີ່ກ່ຽວຂ້ອງ; 3) ເປີດຊຸດຝຶກອົບຮົມກ່ຽວກັບການຂາຍອອນໄລນ໌ ຢູ່ນະຄອນຫຼວງພະບາງ ແລະ ນະຄອນຫຼວງວຽງຈັນ; ແລະ 4) ຈັດພິມປຶ້ມຂໍ້ແນະນຳກ່ຽວກັບການຂາຍອອນໄລນ໌ເປັນພາສາລາວ ເພື່ອເຜີຍແຜ່ໃຫ້ສັງຄົມໄດ້ຊົມໃຊ້.
RT4D ມີສຳນັກງານໃຫຍ່ຕັ້ງຢູ່ອາຄານມໍລະດົກ ຂອງ ກອງເລຂາອາຊຽນ ທີ່ກຸງ ຈາກາຕ້າ ໄດ້ຮັບທຶນສະໜັບສະໜູນ ໃນອັດຕາສ່ວນ 7 ຕໍ່ 1 ຈາກລັດຖະບານ ຂອງອົດສະຕຣາລີ ແລະ ນິວຊີແລນ. ໃນເຟສ 1 ນີ້, ພວກເຮົາມີທຶນຊ່ວຍເຫຼືອຢູ່ 46 ລ້ານໂດລາ ອົດສະຕຣາລີ ບວກກັບອີກ 5 ລ້ານ ໂດລາອົດສະຕຣາລີ. ສປປ ລາວ ໄດ້ຮັບການຊ່ວຍເຫຼືອຈາກໂຄງການພວກເຮົາໄປແລ້ວ 9 ແສນໂດລາອົດສະຕຣາລີ. ແລະ ໃນງົບປີ 2024-25 ນີ້ ຄາດວ່າລາວຈະໄດ້ຮັບການຊ່ວຍເຫຼືອສະເພາະອີກ ປະມານ 1.5 ລ້ານ ໂດລາອົດສະຕຣາລີ
ຊຸດຝຶກອົບຮົມໃນເທື່ອນີ້ ແມ່ນອົງປະກອບໜຶ່ງຂອງໂຄງການຊ່ວຍເຫຼືອໃຫ້ແກ່ ສະຖາບັນອຸດສາຫະກຳ ແລະ ການຄ້າ ຂອງກະຊວງ ອຄ ເຊີ່ງມີມູນຄ່າລວມທັງໝົດ 120.000 ໂດລາອົດສະຕຣາລີ ເພື່ອທຳການສຶກສາຄົ້ນຄວ້າ ໂອກາດ ແລະ ສິ່ງທ້າທາຍ ຂອງແວດລ້ອມການຄ້າທາງເອເລັກໂຕຼນິກ ຢູ່ ສປປ ລາວ. ໂຕເລກ ແລະ ຂໍ້ມູນທີ່ໄດ້ຮັບຈະຖືກນຳໄປຄົ້ນຄວ້າວິໄຈ ແລ້ວເຊື້ອເຊີນຊ່ຽວຊານຈາກບັນດາພາກສ່ວນທີ່ກ່ຽວຂ້ອງມາປຶກສາຫາລື ເພື່ອສະຫຼຸບຮວບຮວມຂໍ້ຄິດເຫັນສະເໜີເຖິງຂັ້ນນຳຂອງກະຊວງການຄ້າ ແລະ ລັດຖະບານໃນຂັ້ນຕໍ່ໄປ
