ເອສະຣາ ເອັຟຊີ ແລະ ນໍ້າທາ ຢູໄນເຕັດ ໃນຮຸ່ນອາຍຸບໍ່ເກີນ 16 ປີ ກາຍເປັນ 2 ສະໂມສອນທີ່ຊະນະ 2 ນັດລວດໃນການແຂ່ງຂັນບານເຕະ ຊີງຂັນ ສຕລ 2024 ຮຸ່ນອາຍຸບໍ່ເກີນ 16 ປີ ( LFF U-16 CHAMPIONSHIP 2024 ) ຢຶດທີມນໍາຮ່ວມກັນ.
ການແຂ່ງຂັນບານເຕະຊີງຂັນ ສຕລ ຮຸ່ນອາຍຸບໍ່ເກີນ 16 ປີ ປະຈໍາປີ 2024 ເປີດສາກຢ່າງເປັນທາງການເມື່ອວັນທີ 1 ມິຖຸນາ 2024 ແລະ ຫຼ້າສຸດວັນທີ 4 ມິຖຸນາ 2024 ໄດ້ມີການຈັດການແຂ່ງຂັນນັດທີ 2 ຂອງການແຂ່ງຂັນ ໂດຍທຸກໆນັດແຂ່ງຂັນທີ່ສະໜາມກີລາຫຍ້າທຽມ ສະຫະພັນບານເຕະແຫ່ງຊາດລາວ ທີ່ບ້ານຫ້ວຍຫົງ ເມືອງຈັນທະບູລີິ ນະຄອນຫຼວງວຽງຈັນ.
ໂດຍຄູ່ທີ່ໜ້າສົນໃນນັດຫຼ້າສຸດ ເອສະຣາ ເອັຟຊີ ສາມາດບຽດເອົາຊະນະ ສະໂມສອນ ຫຼວງພະບາງ 3-2 ເຊິ່ງເອສະຣາ ໄດ້ປະຕູຈາກ: ເບີ 10 ບິນລີ້ ໂດນສະໜູພິດ ນາທີ 45+2; ເບີ 47 ອາທິຍາ ອິນທະວົງ ນາທີ 47 ແລະ ເບີ 10 ສົມຄິດ ພົມມະເທບ ນາທີ 84, ສ່ວນຫຼວງພະບາງ ໄດ້ປະຕູຈາກ: ເບີ 10 ສີສຸພັນ ວົງສາລີ ນາທີ 5 ກັບ ເບີ 18 ລາຊາ ລາດສະວົງ ນາທີ 18.
ຂະນະທີ່ ສະໂມສອນ ນໍ້າທາ ຢູໄນເຕັດ ກໍສາມາດເອົາຊະນະ ວຽງຈັນ ເອັຟຊີ 3-1 ເຊິ່ງ ນໍ້າທາ ໄດ້ປະຕູຈາກ: ເບີ 9 ຈິນຕະນາ ແກ້ວອຸດົມ ນາທີ 20, ເບີ 10 ສູນດາວີ ແສງດາລາ ນາທີ 58 ແລະ ເບີ 23 ອິນຄຳ ອຸ່ນແສງຄຳ ນາທີ 90+3, ສ່ວນ ວຽງຈັນ ໄດ້ປະຕູຈາກ: ເບີ 5 ອາເລັກ ຫຼວງໂຄດ ນາທີ 27.
ຈາກຜົນດັ່ງກ່າວເຮັດໃຫ້ ເອສະຣາ ເອັຟຊີ ກັບ ນໍ້າທາ ຢູໄນເຕັດ ເກັບເພີ່ມເປັນ 6 ຄະແນນເທົ່າກັນຢຶືດທີມນໍາຂອງຕາຕະລາງຄະແນນລວມ ໂດຍ ເອສະຣາ ຢູ່ອັນດັບທີ 1 ເພາະມີຜົນປະຕູໄດ້ເສຍດີກວ່າ, ສ່ວນອັນດັບ 3 ຕົກເປັນຂອງ ຈໍາປາສັກ ເກັບເພີ່ມເປັນ 4 ຄະແນນເທົ່າກັບ ຊ້າງນ້ອຍ ເອັຟຊີ, ມາສເຕີ 7 ເອັຟຊີ.
ສໍາລັບຕາຕະລາງແຂ່ງຂັນນັດທີ 3 ຈະມີຂຶ້ນໃນວັນທີ 7 ມິຖຸນາ 2024 ມີດັ່ງນີ້:
-ເວລາ 9:00 ໂມງ ມາສເຕີ 7 ເອັຟຊີ ພົບ ວຽງຈັນ ແຂ່ງຂັນທີ່ສະໜາມ 1 ຂອງ ສຕລ
-ເວລາ 16:00 ໂມງ ຫຼວງພະບາງ ພົບ ນໍ້າທາ ຢູໄນເຕັດ ແຂ່ງຂັນທີ່ສະໜາມ 1 ຂອງ ສຕລ
-ເວລາ 16:00 ໂມງ ກອງທັບ ພົບ ຊ້າງນ້ອຍ ແຂ່ງຂັນທີ່ສະໜາມ 2 ຂອງ ສຕລ
-ເວລາ 19:00 ໂມງ ມາສດ້າ ຈີບີ ພົບ ຈໍາປາສັກ ແຂ່ງຂັນທີ່ສະໜາມ 1 ຂອງ ສຕລ
-ເວລາ 19:00 ໂມງ ເອສະຣາ ພົບ ທີບີ ບໍ່ແກ້ວ ແຂ່ງຂັນທີ່ສະໜາມ 2 ຂອງ ສຕລ
ຂ່າວ: Larh Creators; ຮູບຈາກ: ສຕລ
