ເດືອນທີ 5 ປະຈໍາປີ 2024 ຫາກໍຜ່ານພົ້ນໄປ ເຮົາມາເບິ່ງການເໜັງຕີງຂອງອັດຕາແລກປ່ຽນ ( ຄ່າເງິນ ), ລາຄາຄໍາ ແລະ ນໍ້າມັນ ໃນເດືອນດັ່ງກ່າວເປັນແນວໃດ?.
ໃນເດືອນພຶດສະພາ ນອກຈາກບັນຫາສະພາບອາກາດຮ້ອນອົບເອົ້າ ກໍຍັງມີບັນຫາຄ່າເງິນ – ຄໍາ – ນໍ້າມັນ ເຊິ່ງກ່ຽວພັນກັບການດໍາລົງຊີວິດຂອງປະຊາຊົນລາວ ແລະ ສືບຕໍ່ເປັນບັນຫາແປປ່ວນຕໍ່ສະພາບຈິດໃຈຂອງຄົນໃນສັງຄົມ ໂດຍອີງໃສ່ແຫຼ່ງຂໍ້ມູນຈາກ ເວັບໄຊ ທະນາຄານການຄ້າຕ່າງປະເທດລາວ ມະຫາຊົນ ( https://www.bcel.com.la/bcel/ ) ເຫັນໄດ້ວ່າ: ອັດຕາແລກປ່ຽນໄລຍະເລີ່ມຕົ້ນເດືອນພຶດສະພາ ສະກຸນເງິນກີບກັບໂດລາ ( ອັດຕາຂາຍ 2 ພຶດສະພາ ) ແມ່ນ 21.403 ກີບຕໍ່ໂດລາ ຂະນະທີ່ສະກຸນເງິນບາດ 656 ກີບຕໍ່ບາດ, ຈາກນັ້ນກໍມີການເໜັງຕີງແບບລາຍວັນ ກ່ອນຈະປິດທ້າຍເດືອນພຶດສະພາ ອ່ອນຄ່າລົງທີ່ 21.555 ກີບຕໍ່ໂດລາ ແລະ 662,56 ກີບຕໍ່ບາດ.
ສ່ວນລາຄາຄໍາ ອີງຕາມແຫຼ່ງຂໍ້ມູນຈາກ ເພຈ໌ ຮ້ານຄໍາພູວົງ Phouvong Jewelry ໃນວັນທີ 1 ພຶດສະພາ ( ລາຄາຂາຍ ) 27.859.000 ລ້ານກີບຕໍ່ 1 ບາດ 7.044.000 ກີບຕໍ່ 1 ສະຫຼຶງ; ຈາກນັ້ນກໍມີການເໜັງຕີງແບບລາຍວັນເຊັ່ນກັນ ກ່ອນຈະປິດລາຄາໃນທ້າຍເດືອນທີ່ 28.669.000 ກີບຕໍ່ 1 ບາດ ແລະ 7.169.000 ກີບຕໍ່ 1 ສະຫຼຶງ.
ຂະນະທີ່ລາຄານໍ້າມັນ ໂດຍອີງຕາມແຫຼ່ງຂໍ້ມູນຈາກລັດວິສາຫະກິດນໍ້າມັນເຊື້ອໄຟລາວ ( ລນລ ) ສັງລວມໄດ້ວ່າ: ໃນເດືອນພຶດສະພາ ມີການປັບລາຄານໍ້າມັນ 4 ຄັ້ງດ້ວຍກັນຄື ຄັ້ງທີ 1 ວັນທີ 8 ພຶດສະພາ ປັບລົງລາຄານໍ້າມັນທຸກຊະນິດ; ຄັ້ງທີ 2 ວັນທີ 15 ພຶດສະພາ ປັບລົງລາຄານໍ້າມັນແອັດຊັງ ແຕ່ປັບຂຶ້ນລາຄານໍ້າມັນກາຊວນ, ຄັ້ງທີ 3 ວັນທີ 22 ພຶດສະພາ ປັບຂຶ້ນລາຄານໍ້າມັນແອັດຊັງ ແຕ່ປັບລົງລາຄານໍ້າມັນກາຊວນ ແລະ ຄັ້ງທີ 4 ວັນທີ 29 ພຶດສະພາ ມີການປັບລົງລາຄານໍ້າມັນທຸກຊະນິດ.
ໃນນັ້ນ, ໄລຍະຕົ້ນເດືອນພຶດສະພາ ລາຄານໍ້າມັນສູງກວ່າເລັກໜ້ອຍ ເມື່ອທຽບກັບໄລຍະທ້າຍເດືອນທີ່ມີການປັບຫຼຸດລາຄາລົງ.
