ກູເກິລ ປະກາດລົງທຶນໃນປະເທດມາເລເຊຍ 2 ຕື້ໂດລາສະຫະລັດ ສ້າງສູນດາຕາ ແລະ ຄລາວ ເປັນການລົງທຶນສູງທີ່ສຸດໃນອາຊຽນ

36

ສຳນັກຂ່າວຕ່າງປະເທດລາຍງານວ່າ: ບໍລິສັດ ກູເກິລ ອິງ(Google) ປະກາດກຽມລົງທຶນ ຄັ້ງໃຫຍ່ ມູນຄ່າ 2 ຕື້ໂດລາສະຫະລັດ ໃນປະເທດມາເລເຊຍ ເພື່ອລົງທຶນສ້າງສູນດາຕາ ແລະ ຄລາວຣີເຈິນ ຂຶ້ນເປັນຄັ້ງທຳອິດໃນປະເທດນີ້ ລວມເຖິງສະໜັບສະໜູນການຝຶກອົບຮົມບຸກຄະລາກອນໃນດ້ານປັນຍາປະດິດ ຫລື ເອໄອ.

ປະທານເຈົ້າໜ້າທີ່ຝ່າຍການເງິນ (CFO) ຂອງບໍລິສັດອັລຟາເບດ ອິງ ເຊິ່ງເປັນບໍລິສັດແມ່ຂອງກູເກິລລະບຸວ່າ ການປະກາດດັ່ງກ່າວນັບເປັນມູນຄ່າການລົງທຶນທີ່ສູງທີ່ສຸດຂອງກູເກິລໃນຂົງເຂດອາຊີຕາເວັນອອກສ່ຽງໃຕ້.

ກູເກິລ ຈະສ້າງສູນດາຕາ ແລະ ຄລາວຣີເຈິນ ເຊິ່ງສູນດາຈະຮອງຮັບບໍລິການຕ່າງໆຂອງກູເກິລ ເຊັ່ນ: ເສີດເອັນຈິນ, ເວີດສະເປຊ, ກູເກິລ ແມັບ ລວມເຖິງບໍລິການດ້ານເອໄອໃນຂະນະທີ່ຄລາວຣີເຈິນ ຈະຮອງຮັບບໍລິການຄລາວໃຫ້ກັບທັງບໍລິສັດເອກະຊົນ ແລະ ໜ່ວຍງານພາກລັດ.

ຄວາມເຄື່ອນໄຫວຄັ້ງນີ້ ມີຂຶ້ນໃນຂະນະທີ່ບັນດາບໍລິສັດເທັກໂນໂລຊີລະດັບໂລກຕ່າງມຸ່ງໜ້າການລົງທຶນມາຍັງອາຊຽນ ເຊິ່ງຜູ້ບໍລິຫານບໍລິສັດຊັ້ນນຳຂອງໂລກທັງໄມໂຄຊອບ, ອິນວີເດຍ, ແອັບເປິລ ອິງ ຫາກໍເດີນທາງມາຢາມຫຼາຍປະເທດໃນອາຊຽນ ພ້ອມປະກາດແຜນການລົງທຶນມູນຄ່າຫຼາຍຕື້ໂດລາສະຫະລັດໃນໄລຍະບໍ່ເທົ່າໃດເດືອນຜ່ານມາ.

ໃນນີ້ບໍລິສັດ ໄມໂຄຊອບ ປະກາດແຜນລົງທຶນ ເພື່ອສ້າງສູນດາຕາ, ພັດທະນາໂຄງການເອໄອ ແລະ ຄລາວຄອມພິວເຕີ. ຂະນະທີ່ບໍລິສັດອິນວີເດຍ ຮ່ວມກັບກຸ່ມບໍລິສັດ YTL Power International ໃນມາເລເຊຍເພື່ອພັດທະນາໂຄງສ້າງພື້ນຖານເອໄອ.