ການກໍ່ສ້າງຂົວເຊຈຳພອນ ສໍາເລັດແລ້ວ ຫຼາຍກວ່າ 84%

37

ໂຄງການກໍ່ສ້າງຂົວເບຕົງຂ້າມເຊຈຳພອນ ຢູ່ເຂດບ້ານນາທົ່ມ ເມືອງອາດສະພອນ ແຂວງສະຫວັນນະເຂດ ຮອດປັດຈຸບັນສໍາເລັດແລ້ວຫຼາຍກວ່າ 84%.
ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ລົງຕິດຕາມຄວາມຄືບໜ້າຂອງການກໍ່ສ້າງຂົວດັ່ງກ່າວເມື່ອມໍ່ໆມານີ້ ເຊິ່ງ ທ່ານ ທິບພາວອນ ສີລາຊາ ປະທານ ບໍລິບັດ ວີແອພີ ພັດທະນາກໍ່ສ້າງ ຈຳກັດຜູ້ດຽວ ເຊິ່ງເປັນບໍລິສັດຮັບເໝົາກໍ່ສ້າງໄດ້ລາຍງານໃຫ້ຮູ້ວ່າ: ຂົວດັ່ງກ່າວມີຄວາມຍາວທັງໝົດ 100 ແມັດ, ກວ້າງ 5,5 ແມັດ ໂດຍອອກແບບເປັນຂົວເບຕົງເສີມເຫຼັກ.

ເຊິ່ງໄດ້ເລີ່ມການກໍ່ສ້າງມາແຕ່ວັນທີ 25 ທັນວາ 2023 ມາຮອດເດືອນພຶດສະພາ 2024 ແມ່ນສາມາດປະຕິບັດໜ້າວຽກໄດ້ແລ້ວ 84,6%, ຄາດວ່າຈະໃຫ້ສຳເລັດໃນໄວໆນີ້.
ຂົວດັ່ງກ່າວນີ້ ແມ່ນນອນຢູ່ໃນເສັ້ນທາງຫຼັກຂອງເມືອງອາດສະພອນ ລະຫວ່າງບ້ານນາທົ່ມ ຫາ ຈຸດສຸມນາເລົ່າ ແລະເປັນຂົວ – ທາງ ທີ່ສາມາດເຊື່ອມຕໍ່ໄປຫາຫຼາຍບ້ານ ທີ່ຢູ່ຟາກເຊເບື້ອງນັ້ນ ເປັນຕົ້ນ: ບ້ານນາທົ່ມ, ນາກະປົງ, ນາເລົ່າ, ນາຂາມ, ວຽງໄຊ, ຈອມຮາດ, ດົງຂັນຄຳ, ຫ້ວຍງົວ, ສິງສະຫວ່າງ, ຫ້ວຍເດື່ອ, ສີນົນໄຊ ແລະ ບ້ານເດີ່ນປ້ອມ. ປັດຈຸບັນການສັນຈອນໄປ – ມາຍັງບໍ່ສະດວກ ເພາະຍັງບໍ່ທັນມີຂົວຂ້າມເຊ ແລະ ໃນລະດູຝົນແມ່ນບໍ່ສາມາດສັນຈອນໄປມາໄດ້.