ລັດຖະບານ ໄດ້ມີແຜນພັດທະນາທ່າເຮືອ ລາວ – ຫວຽດນາມ ແລະ ທ່າເຮືອຕາມລຳແມ່ນໍ້າຂອງ ແລະ ແມ່ນໍ້າສາຂາ ເພື່ອແນໃສ່ການອຳນວຍ ຄວາມສະດວກໃນການຄົມມະນາຄົມຂົນສົ່ງໃນຕໍ່ໜ້າ ລວມທັງການພັດທະນາປ້ອງກັນຕາຝັ່ງເຈື່ອນ ແລະ ຄອງນໍ້າເລິກ ຈຳນວນ 18 ໂຄງການ.
ທ່ານ ລັນ ແສງອາພອນ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ລາຍງານໃນກອງປະຊຸມ ສະຫຼຸບວຽກງານ ຍທຂ ປະຈຳປີ 2023 ວ່າ: ແຜນພັດທະນາທ່າເຮືອລາວ-ຫວຽດນາມ ແລະ ທ່າເຮືອຕາມລຳແມ່ນໍ້າຂອງ ແລະ ແມ່ນໍ້າສາຂາເພື່ອແນໃສ່ການອຳນວຍຄວາມສະດວກໃນການຄົມມະນາຄົມຂົນສົ່ງໃນຕໍ່ໜ້າ ລວມທັງການພັດທະນາປ້ອງກັນຕາຝັ່ງເຈື່ອນ ແລະ ຄອງນໍ້າເລິກ ມີ 18 ແຜນ ດັ່ງນີ້:
(1) ສູ້ຊົນໃຫ້ສຳເລັດການປັບປຸງໂຄງປະກອບຂາຫຸ້ນ ລັດວິສາຫະກິດພັດທະນາທ່າເຮືອຫວຸ້ງອ່າງ ລາວ – ຫວຽດນາມ ດັດປັບຫຸ້ນຂອງລັດຖະບານ ສປປ ລາວ ຈາກ 20% ເປັນ 60%.
(2) ສືບຕໍ່ຈັດຕັ້ງປະຕິບັດແຜນພັດທະນາລະອຽດທ່າເຮືອ ລາວ – ຫວຽດນາມ ໃຫ້ສຳເລັດ.
(3) ສືບຕໍ່ສຶກສາສຳຫຼວດຄວາມເປັນໄປໄດ້ ໂຄງການຄຸ້ມຄອງ ແລະ ພັດທະນາວຽກງານເດີນທະເລຂຶ້ນທະບຽນທ່າເຮືອທາງທະເລ, ພ້ອມທັງດຳເນີນການດ້ານນິຕິກໍາ ແລະ ຂັ້ນຕອນຕ່າງໆ ເພື່ອສະໝັກເຂົ້າເປັນສະມາຊິກຂອງ IMO.
(4) ສືບຕໍ່ພັດທະນາ ແລະ ປັບປຸງບັນດາທ່າເຮືອ ຕິດພັນກັບການປັບປຸງຄອງເດີນເຮືອຕາມລຳແມ່ນໍ້າຂອງໃຫ້ສາມາດຮອງຮັບເຮືອຂົນສົ່ງ ຂະໜາດ 300 – 500 ໂຕນ.
(5) ສືບຕໍ່ປັບປຸງລະບົບການຂົນສົ່ງທາງນໍ້າໃຫ້ມີຄວາມປອດໄພ ທັງມາດຕະຖານຂອງເຮືອ ແລະ ມາດຕະຖານຂອງນາຍທ້າຍເຮືອ ໃຫ້ໄດ້ມາດຕະຖານສາກົນ.
(6) ສືບຕໍ່ສ້າງ ແລະ ປັບປຸງນິຕິກຳ ເປັນຕົ້ນ: ຍຸດທະສາດການຂົນສົ່ງທາງນໍ້າ, ບັນດາລະບຽບການໃນການຄຸ້ມຄອງທາງນໍ້າ.
(7) ເກັບກໍາສະຖິຕິລວງຍາວປ້ອງກັນຕາຝັ່ງເຈື່ອນທົ່ວປະເທດທີ່ເຊາະເຈື່ອນຮ້າຍແຮງຕາມການສຳຫຼວດ ໃນປີ 2015 ຄື: 514 ກິໂລແມັດ ການຈັດຕັ້ງປະຕິບັດຮອດປີ 2023 ສຳເລັດໄດ້ 219,61 ກິໂລແມັດ ເທົ່າກັບ 42,61%.
(8) ສືບຕໍ່ຄຸ້ມຄອງ ແລະ ຄວບຄຸມທຸລະກິດ ຂຸດຄົ້ນຫີນແຮ່ – ຊາຍ ຕາມສິດ ແລະ ໜ້າທີ່.
(9) ສຳເລັດການເຊັນ MOU ລະຫວ່າງ ກົມທາງນໍ້າ ກະຊວງ ຍທຂ ກັບ ອົງການ Koica ພາຍໃນ ກ່ຽວກັບການພັດທະນາການຂົນສົ່ງທາງນໍ້າ ໃນແມ່ນໍ້າຂອງ ( Port – MIS ).
(10) ໄດ້ສຸມໃສ່ສຶກສາສຳຫຼວດ – ອອກແບບຄວາມເປັນໄປໄດ້ໂຄງການຄຸ້ມຄອງ ແລະ ພັດທະນາວຽກງານເດີນທະເລ ເພື່ອສ້າງຕັ້ງຫ້ອງການໜ່ວຍງານຄຸ້ມຄອງຄວາມປອດໄພ ແລະ ຂຶ້ນທະບຽນເຮືອທາງທະເລ, ພ້ອມທັງດຳເນີນການດ້ານນິຕິກຳ ແລະ ຂັ້ນຕອນຕ່າງໆ ເພື່ອສະໝັກເຂົ້າເປັນສະມາຊິກຂອງ IMO ( ໂຄງການ PPP ).
(11) ສຳເລັດການສະເໜີໂຄງການກໍ່ສ້າງທ່າເຮືອຊຽງກົກ ຫາ ກະຊວງແຜນການ ແລະ ການລົງທຶນ, ຫ້ອງການປະຕູດຽວ ເພື່ອຂໍຈັດຕັ້ງປະຕິບັດໃນຮູບແບບລົງທຶນ PPP/BOT ປັດຈຸບັນຢູ່ຂັ້ນຕອນການຄົ້ນຄວ້າຂອງກະຊວງແຜນການ ແລະ ການລົງທຶນ.
(12) ສໍາເລັດສ້າງ ແລະ ປັບປຸງນິຕິກຳສຳລັບວຽກງານທາງນໍ້າ ຄື: ສໍາເລັດກົດໝາຍ ວ່າດ້ວຍການທາງນໍ້າ ໄດ້ຖືກຮັບຮອງຈາກສະພາແຫ່ງຊາດແລ້ວ; ສຳເລັດສ້າງໂຄງປະກອບສູດຄິດໄລ່ລາຄາຫົວໜ່ວຍກໍ່ສ້າງປ້ອງກັນຕາຝັ່ງເຈື່ອນ ແລະ ບົດແນະນຳໃນການນຳໃຊ້ໄດ້ຖືກຮັບຮອງ ແລະ ປະກາດໃຊ້ ຕາມຂໍ້ຕົກລົງຂອງທ່ານລັດຖະມົນຕີ ສະບັບເລກທີ 7262/ຍທຂ ລົງວັນທີ 5 ເມສາ 2021; ສໍາເລັດການຄົ້ນຄວ້າຂໍ້ຕົກລົງ ວ່າດ້ວຍການກວດກາເຕັກນິກເຮືອ; ສຳເລັດລະບຽບການຂຸດຄົ້ນຫີນແຮ່, ຊາຍ ແລະ ດິນດຳ ຕາມແມ່ນໍ້າຂອງ, ນໍ້າສາຂາ ແລະ ນໍ້າຕ່າງໆຢູ່ ສປປ ລາວ; ສໍາເລັດຮ່າງຂໍ້ຕົກລົງວ່າດ້ວຍທ່າເຮືອໃນ ສປປ ລາວ; ສຳເລັດການສ້າງວິໄສທັດ, ຍຸດທະສາດຮອດປີ 2030 ແລະ ແຜນພັດທະນາ 5 ປີ ( 2021 – 2025 ) ຂອງວຽກທາງນໍ້າ; ສຳເລັດການສ້າງຖານຂໍ້ມູນພື້ນທີ່ນໍ້າຖ້ວມໃນ 2 ຕົວເມືອງ ຄື: ແຂວງຫຼວງພະບາງ ແລະ ນະຄອນຫຼວງວຽງຈັນ ເປັນຂໍ້ມູນດ້ານແຜນທີ່ເຂດນໍ້າຖ້ວມຕົວເມືອງ.
(13) ການຄຸ້ມຄອງ ແລະ ຈັດຕັ້ງປະຕິບັດ ບັນດາໂຄງການປ້ອງກັນຕາຝັ່ງເຈື່ອນທີ່ໄດ້ຮັບອະນຸມັດ ແລະ ມີແຜນບັນຈຸໃນ 5 ປີ ( 2021 – 2025 ) ໃຫ້ສຳເລັດຕາມແຜນການ ເປັນຕົ້ນ: ໂຄງການປ້ອງກັນຕາຝັ່ງເຈື່ອນປາກກະດິງເໜືອ ເມືອງປາກກະດິງ ແຂວງບໍລິຄຳໄຊ ສຳເລັດ 26,24% ຫຼ້າຊ້າກວ່າແຜນການ.
(14) ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມເທສະບານ ເມືອງໄຊ ແຂວງອຸດົມໄຊ ມູນຄ່າໂຄງການ 13,5 ລ້ານໂດລາສະຫະລັດ ສຳເລັດ 85,06%.
(15) ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມຕົວເມືອງ ຢູ່ ສປປ ລາວ ( ງົບປະມານເພີ່ມຕື່ມ ) ມູນຄ່າ 25 ລ້ານໂດລາສະຫະລັດ ເພື່ອສືບຕໍ່ປະຕິບັດວຽກຟື້ນຟູໂຄງລ່າງພື້ນຖານ ແລະ ການຄຸ້ມຄອງຄວາມສ່ຽງໄພພິບັດນໍ້າຖ້ວມ 4 ແຂວງ ຄື: ເທສະບານເມືອງໄຊ ແຂວງອຸດົມໄຊ ( ໜ້າວຽກເພີ່ມຕື່ມ ), ນະຄອນຫຼວງພະບາງ ແຂວງຫຼວງພະບາງ, ນະຄອນຫຼວງວຽງຈັນ ແລະ ເທສະບານເມືອງປາກຊັນ ແຂວງບໍລິຄຳໄຊ ສຳເລັດ 58,56% ມູນຄ່າປະຕິບັດໄດ້ 3.400.015 ໂດລາສະຫະລັດ ເທົ່າກັບ 13,61%.
(16) ຄວາມຄືບໜ້າວຽກ TA ຢູ່ ແຂວງຫຼວງພະບາງ ( AF/C03 ): ສຳເລັດຮ່າງເຈລະຈາສັນຍາ, ຜ່ານກອງປະຊຸມຄະນະກໍາມະການປະມູນຈັດຊື້ ( ຄັ້ງທີ 2 ) ວັນທີ 6 ກັນຍາ 2023; ປັດຈຸບັນສືບຕໍ່ຂັ້ນຕອນຮ່າງສັນຍາ ແລະ ບົດສະຫຼຸບຜົນການເຈລະຈາ ກັບ GRAT ເພື່ອສືບຕໍ່ຂໍຄໍາເຫັນດີ ( NOL ) ຈາກທະນາຄານໂລກ ແລະ ຂໍຄຳເຫັນຮັບຮອງ ເພື່ອສະເໜີເຊັນສັນຍາຈາກຂັ້ນເທິງຕໍ່ໄປ.
(17) ຄວາມຄືບໜ້າວຽກ TA ຢູ່ ແຂວງບໍລິຄຳໄຊ ແລະ ນະຄອນຫຼວງ ວຽງຈັນ ( A/C04 ): ສຳເລັດຂັ້ນຕອນຄັດເລືອກບໍລິສັດທີ່ຜ່ານເງື່ອນໄຂເບື້ອງຕົ້ນ ຈໍານວນ 6 ບໍລິສັດ, ສືບຕໍ່ປະກາດເຊີນເຂົ້າຮ່ວມປະມູນດ້ານເຕັກນິກ ແລະ ການເງິນ, ກຳນົດວັນເປີດຊອງປະມູນ ວັນທີ 10 ພະຈິກ 2023.
(18) ຄວາມຄືບໜ້າຂອງໂຄງການ ທີ່ໄດ້ຮັບທຶນຈາກຄູ່ຮ່ວມພັດທະນາ ແລະ ທຶນຊ່ວຍເຫຼືອ ເພື່ອການພັດທະນາ ( EDCF ) ເປັນຕົ້ນ: 1). ໂຄງການພັດທະນາແຄມຂອງ ແຂວງຈຳປາສັກ ໄລຍະ 1 ມູນຄ່າ 65.653.000 ໂດລາສະຫະລັດ ສຳເລັດ 95,67%; 2). ໂຄງການພັດທະນາແຄມຂອງ ນະຄອນຫຼວງວຽງຈັນ ( ຊ່ວງ 2 ) ມູນຄ່າ 67.562.000 ໂດລາສະຫະລັດ ສຳເລັດ 32,85%; 3). ໂຄງການພັດທະນາແຄມຂອງແຂວງຈຳປາສັກ ບ້ວງທຶນກູ້ຢືມດອກເບ້ຍຜ່ອນຜັນເພີ່ມຕື່ມ ມູນຄ່າ 15.441.000 ໂດລາສະຫະລັດ ສຳເລັດ 35,48%.
