ກົມຊັບສິນທາງປັນຍາ ລາວ – ຫວຽດ ລົງນາມແຜນວຽກຮ່ວມມື

25

ພິທີລົງນາມແຜນວຽກຮ່ວມມືສອງຝ່າຍ ສົກປີ 2024 – 2025 ລະຫວ່າງ ກົມຊັບສິນທາງປັນຍາ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ກັບ ກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ ມີຂຶ້ນໃນວັນທີ 28 ພຶດສະພາ 2024 ທີ່ກະຊວງອຸດສາຫະກໍາ ແລະ ການຄ້າ.

ຕາງໜ້າລົງນາມໂດຍ ທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ ກະຊວງອຸດສາຫະກໍາ ແລະ ການຄ້າ ສປປ ລາວ ກັບ ທ່ານ ລື່ ຮວງ ລ່ອງ ( Luu Hoang Long ) ຫົວໜ້າກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີ ສສ ຫວຽດນາມ.

ໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສປປ ລາວ, ທ່ານ ຫິ່ງ ແທງ ດາດ ( Huynh Thanh Dat ) ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ ພ້ອມດ້ວຍບັນດາຫົວໜ້າຫ້ອງການ, ກົມ, ສະຖາບັນ ແລະ ພະນັກງານທີ່ກ່ຽວຂ້ອງສອງກະຊວງເຂົ້າຮ່ວມ.


ການລົງນາມໃນຄັ້ງນີ້ ແມ່ນປະຕິບັດຕາມບົດບັນທຶກການຮ່ວມມືໃນຂົງເຂດວຽກງານຊັບສິນທາງປັນຍາ ລະຫວ່າງ ກົມຊັບສິນທາງປັນຍາ ສປປ ລາວ ແລະ ສຳນັກງານຊັບສິນທາງປັນຍາແຫ່ງຊາດ ສສ ຫວຽດນາມ ລົງນາມໃນວັນທີ 7 ພະຈິກ 2015 ເພື່ອແນໃສ່ເພີ່ມທະວີການຮ່ວມມື ລະຫວ່າງ ສອງປະເທດໃນຂົງເຂດຊັບສິນທາງປັນຍາ, ຜັນຂະຫຍາຍແຜນກິດຈະກໍາໃຫ້ເປັນອັນລະອຽດ ໂດຍສະເພາະຜ່ານການສ້າງແຜນວຽກ ປະຈຳປີ 2024 – 2025 ເຊິ່ງໃນແຜນວຽກດັ່ງກ່າວໄດ້ກໍານົດສອງແຜນວຽກ 2 ຂົງເຂດ ຄື: ການໄປທັດສະນະສຶກສາຂັ້ນບໍລິຫານ ແລະ ຂັ້ນວິຊາການ ຢູ່ ສສ ຫວຽດນາມ ກ່ຽວກັບນະໂຍບາຍດ້ານຊັບສິນທາງປັນຍາ ແລະ ການພັດທະນາບຸກຄະລາກອນ ແລະ ສຶກສາແລກປ່ຽນບົດຮຽນໃນການກະກຽມເຂົ້າສົນທິສັນຍາສາກົນ ເພື່ອສ້າງຄວາມອາດສາມາດໃຫ້ພະນັກງານວິຊາການ ແລະ ເຈົ້າໜ້າທີ່ກ່ຽວຂ້ອງ.

ໃນການລົງນາມຮ່ວມມືຄັ້ງນີ້ ທັງສອງຝ່າຍເຫັນດີເປັນເອກະພາບກັນ ຈະຈັດໃຫ້ມີການພົບປະສອງຝ່າຍ ລະຫວ່າງ ກົມຊັບສິນທາງປັນຍາ ສປປ ລາວ ແລະ ກົມຊັບສິນທາງປັນຍາ ສສ ຫວຽດນາມ ຢ່າງເປັນປະຈໍາ ແລະ ຕໍ່ເນື່ອງ ເພື່ອທົບທວນ ແລະ ປະເມີນການຈັດຕັ້ງປະຕິບັດແຜນວຽກ ແລະ ກໍານົດທິດທາງການພັດທະນາວຽກງານຊັບສິນທາງປັນຍາຮ່ວມກັນໃນຕໍ່ໜ້າ.