ອົງການປົກຄອງແຂວງ ອັດຕະປື ໄດ້ອະນຸຍາດໃຫ້ບໍລິສັດ ບໍລິສັດ ແສງພັດທະນາ ບໍ່ແຮ່ ແລະ ກະສິກຳ ອັດຕະປື ຈຳກັດຜູ້ດຽວ ເປັນຜູ້ຄຸ້ມຄອງເພື່ອອະນຸລັກຂະຫຍາຍພັນ, ຟື້ນຟູປ່າໝາກຈອງ ແລະ ເຫັດລີນຈື ພ້ອມທັງເຄື່ອງປ່າຂອງດົງອື່ນໆ ໃນຂອບເຂດບ້ານ ລະມອງ, ບ້ານ ຄຳວົງສາ, ບ້ານ ວັງແຄນ ແລະ ບ້ານ ວົງຊົມພູ ເມືອງ ພູວົງ.
ເຊິ່ງການອະນຸຍາດໃຫ້ເອກະຊົນເປັນຜູ້ຄຸ້ມຄອງ ເພື່ອອະນຸລັກຂະຫຍາຍພັນ, ຟື້ນຟູປ່າໝາກຈອງ ແລະ ເຫັດຫລີນຈື ຢູ່ 4 ບ້ານ ຂອງເມືອງ ພູວົງ ຄັ້ງນີ້ ແມ່ນປະຕິບັດຕາມກົດໝາຍ ວ່າດ້ວຍການປົກຄອງທ້ອງຖິ່ນ, ກົດໝາຍ ວ່າດ້ວຍການສົ່ງເສີມການລົງທຶນ, ລວມທັງປະຕິບັດຕາມໜັງສືສະເໜີ ຂອງພະແນກແຜນການ ແລະ ການລົງທຶນແຂວງ, ເຊິ່ງທັງສອງຝ່າຍຕົກລົງເປັນເອກະພາບໃນການກໍານົດເນື້ອໃນ ແລະ ເງື່ອນໄຂການຄຸ້ມຄອງຂອງບໍລິສັດ, ເປັນການແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນໄລຍະຜ່ານມາ, ສືບຕໍ່ປະຕິບັດຕາມນະໂຍບາຍຂອງພັກ-ລັດຖະບານ ກໍຄືແຜນນະໂຍບາຍຂອງອົງການປົກຄອງແຂວງ ກ່ຽວກັບການສົ່ງເສີມການຮ່ວມມືກັບພາກລັດ ແລະ ເອກະຊົນ ພັດທະນາດໍາເນີນທຸລະກິດໃຫ້ກ້າວເຂົ້າສູ່ການຄຸ້ມຄອງທີ່ເປັນລະບົບ ແລະ ຂັ້ນຕອນທີ່ໄດ້ກໍານົດໄວ້ໃນກົດໝາຍການລົງທຶນ ແລະ ທຸກການຈັດຕັ້ງປະຕິບັດ ແມ່ນທັງສອງຝ່າຍ ຕ້ອງໄດ້ເອົາໃຈໃສ່ຄຸ້ມຄອງໃຫ້ໄດ້ຢ່າງຄົບຖ້ວນ ແລະ ຖືກຕ້ອງຕາມລະບຽບກົດໝາຍ, ເພາະສິນຄ້າກະສິກຳ ແລະ ເຄື່ອງປ່າຂອງດົງ ແມ່ນທ່າແຮງໜຶ່ງທີ່ສຳຄັນປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ປະກອບສ່ວນສຳຄັນໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງ ແລະ ເມືອງ.
ພິທີເຊັນສັນຍາວຍກດັ່ງກ່າວໄດ້ຈັດຂຶ້ນຢ່າງເປັນທາງການໃນວັນທີ 30 ພຶດສະພາ 2024 ທີ່ພະແນກແຜນການ ແລະ ການລົງທຶນແຂວງ ອັດຕະປື, ຮ່ວມລົງນາມ ຕາງໜ້າອົງການປົກຄອງແຂວງມີທ່ານ ສູນນະຄອນ ແກ້ວວຽງຄໍາ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ຄຳສິງ ພົງສະຫວັດ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ທ່ານ ທອງສະຫວັດ ສິດທິຈັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ໂອພາດ ວົງມາຈຽງ ຮອງຫົວໜ້າພະແນກອຸດສະຫະກຳ ແລະ ການຄ້າແຂວງ, ທ່ານ ຄຳຊຽງ ພິມມະຈັນ ຮອງເຈົ້າເມືອງ ພູວົງ, ຝ່າຍບໍລິສັດລົງນາມໂດຍທ່ານ ແສງພະຈັນ ໂພທິສານ ປະທານບໍລິສັດ ແສງພັດທະນາບໍ່ແຮ່ ແລະ ກະສິກຳ ອັດຕະປື ຈຳກັດຜູ້ດຽວ ແລະ ທ່ານ ແກ້ວກາຍຍາສິດ ບຸດສະບົວບານ ຮອງປະທານບໍລິສັດ, ໂດຍຊ້ອງໜ້າ ທ່ານ ພົນໂທ ວັນທອງ ກອງມະນີ ເຈົ້າແຂວງ ອັດຕະປື ພ້ອມຄະນະນຳຂອງແຂວງ ແລະ ພະພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ຂ່າວ: ສິດຕິພອນ
