ປະເທດມາເລເຊຍ ປະກາດຍຸດທະສາດໃຫຍ່ ເພື່ອມຸ່ງເປັນສູນກາງຜະລິດຊິບລະດັບໂລກ ດ້ວຍການທຸ່ມເງິນປະມານ5,1ຕື້ໂດລາສະຫະລັດ ເພື່ອຝຶກອົບຮົມວິສະວະກອນທັກສະສູງຈຳນວນ 60 ພັນຄົນ ພ້ອມຕັ້ງເປົ້າດຶງດູດການລົງທຶນ 108ຕື້ໂດລາສະຫະລັດພາຍໃນ 10 ປີ.
ສຳນັກຂ່າວນິກເຄອິ ລາຍງານວ່າ: ທ່ານ ອັນວາ ອິບຣາຮິມ ນາຍົກລັດຖະມົນຕີມາເລເຊຍ ປະກາດໃນວັນທີ 28 ພຶດສະພາວ່າ: ມາເລເຊຍ ມີແຜນຝຶກອົບຮົມວິສະວະກອນເຊມິຄອນດັກເຕີທ້ອງຖິ່ນທີ່ມີທັກສະສູງຈຳນວນ 60 ພັນຄົນ ເພື່ອສະໜັບສະໜູນເປົ້າໝາຍຂອງປະເທດໃນການກາຍເປັນ ສູນກາງການຜະລິດຊິບລະດັບໂລກ.
ການຝຶກອົບຮົມຄັ້ງນີ້ ເປັນສ່ວນໜຶ່ງຂອງຄວາມພະຍາຍາມໃນການເສີມສ້າງສັກກະຍະພາບດ້ານເຕັກໂນໂລຊີ ແລະ ນະວັດຕະກຳຂອງມາເລເຊຍ ເພື່ອດຶງດູດການລົງທຶນຈາກຕ່າງປະເທດໃນອຸດສາຫະກຳຊິບ.
ພາຍໃຕ້ຍຸດທະສາດເຊມີຄອນດັກເຕີແຫ່ງຊາດນີ້ ລັດຖະບານຈະຈັດສັນງົບປະມານ5,1ຕື້ໂດລາສະຫະລັດ ໃນໄລຍະ 5 ຫາ 10 ປີຂ້າງໜ້າ ເພື່ອສົ່ງເສີມບຸກຄະລາກອນ ແລະ ພັດທະນາບໍລິສັດທ້ອງຖິ່ນໂດຍເງິນທຶນຈະມາຈາກກອງທຶນຄວາມຮັ່ງມີແຫ່ງຊາດຂອງມາເລເຊຍ ຢ່າງອາຊານາ ເນຊັນແນລ (Khazanah Nasional).
ຍຸດທະສາດນີ້ມີເປົ້າໝາຍໃນການຝຶກອົບຮົມບຸກຄະລາກອນຈຳນວນ 60 ພັນຄົນ ໃນດ້ານຕ່າງໆ ຂອງການຜະລິດຊິບ ຕັ້ງແຕ່ການອອກແບບ, ການບັນຈຸ ໄປຈົນເຖິງການທົດສອບ ເຊິ່ງໂປແກຣມການຝຶກອົບຮົມຈະມີການຮ່ວມມືກັບມະຫາວິທະຍາໄລ ແລະ ບໍລິສັດຕ່າງໆ.
ນອກຈາກນີ້ມາເລເຊຍ ຍັງຕ້ອງການຈັດຕັ້ງບໍລິສັດທ້ອງຖິ່ນຢ່າງໜ້ອຍ10ແຫ່ງ ໃນດ້ານການອອກແບບ ແລະ ບັນຈຸຂັ້ນສູງສຳລັບຊິບເຊມິຄອນດັກເຕີ ໂດຍມີລາຍໄດ້ລະຫວ່າງ210ລ້ານເຖິງ1ຕື້ໂດລາສະຫະລັດ.
ຕາມຍຸດທະສາດນີ້ ລັດຖະບານຕັ້ງເປົ້າດຶງດູດການລົງທຶນຈຳນວນ500ຕື້ລິງກິດ ຫລື ປະມານ 108ຕື້ໂດລາສະຫະລັດ ຜ່ານການລົງທຶນໂດຍກົງໃນປະເທດ ແລະ ການລົງທຶນໂດຍກົງຈາກຕ່າງປະເທດ.
ມາເລເຊຍ ເປັນໜຶ່ງໃນປະເທດຜູ້ມີບົດບາດສຳຄັນໃນອຸດສາຫະກຳເຊມິຄອນດັດເຕີໂລກ ໂດຍຄອງອັດຕາສ່ວນ13%ຂອງຕະຫຼາດໂລກໃນດ້ານການບັນຈຸ ແລະ ທົດສອບ ແລະ ສາມາດດຶງດູດເງິນລົງທຶນຫຼາຍຕື້ໂດລາສະຫະລັດຈາກບໍລິສັດຊັ້ນນຳຕ່າງໆໃນບໍ່ເທົ່າໃດປີຜ່ານມາ ເຊິ່ງລວມເຖິງ ອິນເທລ (Intel) ແລະ ອິນຟີນິອອນ (Infineon).
