ຮອງນາຍົກ ຢ້ຽມຢາມຊຸກຍູ້ຟາມລ້ຽງງົວຢູ່ເມືອງຍົມມະລາດ

19

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ ໄດ້ລົງເຄື່ອນໄຫວຢ້ຽມຢາມ ຟາມລ້ຽງງົວ ບໍລິສັດ ຄຳມ່ວນ ອິມພອດ – ເອັສ ພອດ ຈຳກັດຜູ້ດຽວ ຢູ່ບ້ານນາກະຕັງ ເມືອງຍົມມະລາດ ແຂວງ ຄຳມ່ວນ ໂດຍມີ ຄະນະປະທານ ແລະ ພະນັກງານພາຍໃນບໍລິສັດດັ່ງກ່າວເຂົ້າຮ່ວມຕ້ອນຮັບ ໃນວັນທີ 27 ພຶດສະພາ 2024.


ທ່ານ ໂຍມາ ອິນທະວົງ ຮອງປະທານບໍລິສັດຄຳມ່ວນ ອິມພອດ – ເອັສພອດ ຈຳກັດ ໄດ້ລາຍງານຄວາມຄືບໜ້າໃນການພັດທະນາໂຄງການລ້ຽງງົວ ເພື່ອເປັນສິນຄ້າວ່າ: ກຸ່ມ ບໍລິສັດ ໄດ້ເຊັນສັນຍາສໍາປະທານກັບອົງການປົກຄອງແຂວງຄໍາມ່ວນ ໃນເນື້ອທີ່ 600 ເຮັກຕາ ຢູ່ເຂດບ້ານນາກະຕັງ ເມືອງຍົມມະລາດ ແຂວງຄໍາມ່ວນ ເພື່ອຊຸກຍູ້ ແລະ ສົ່ງເສີມການພັດທະນາກະສິກຳແບບຍືນຍົງ ຮັບປະກັນດ້ານສະບຽງອາຫານ ແລະ ການມີສ່ວນຮ່ວມຂອງປະຊາຊົນໃນເຂດໂຄງການ ແລະ ເຂດໃກ້ຄຽງ. ໃນນັ້ນປະກອບມີການລ້ຽງງົວສາຍພັນບຣາມັນ, ການລ້ຽງງົວສາຍພັນທ້ອງຖິ່ນ, ການປູກຫຍ້າເພື່ອເປັນອາຫານງົວ, ປູກຕົ້ນໄມ້ໃຫ້ໝາກ, ສູນການຮຽນຮູ້ການລ້ຽງງົວ ຄົບວົງຈອນ ເພື່ອພັດທະນາເຂດດັ່ງກ່າວ ໃຫ້ກາຍເປັນບ່ອນຜະລິດສະບຽງອາຫານສະໜອງໃຫ້ແກ່ສັງຄົມ.

ໂອກາດນີ້, ທ່ານຮອງນາຍົກລັດຖະມົນຕີ ໄດ້ມີຄຳເຫັນ ເຊິ່ງຕາມແຜນພັດທະນາຂອງບໍລິສັດ ໂຄງການດັ່ງກ່າວແມ່ນສ້າງເງື່ອນໄຂໃຫ້ປະຊາຊົນ ໄດ້ພັດທະນາໃນອາຊີບການລ້ຽງສັດ, ການປູກໄມ້ໃຫ້ໝາກທັງປະກອບສ່ວນພັດທະນາຊົນນະບົດ ທີ່ມີສ່ວນຮ່ວມຂອງປະຊາຊົນໃນການພັດທະນາ ກາຍເປັນບ່ອນຮຽນຮູ້, ບ່ອນທ່ອງທ່ຽວ, ບ່ອນສຶກສາທົດລອງໃຫ້ປະຊາຊົນໄດ້ພັດທະນາຕົນເອງ.
ພ້ອມນີ້, ກໍສະເໜີໃຫ້ບໍລິສັດມີການພັດທະນາເນື້ອທີ່ທີ່ມີຢູ່ແລ້ວ ໃຫ້ເກີດໝາກຜົນສູງສຸດ ເຮັດໃຫ້ປະຊາຊົນ ແລະ ການນຳພັກ – ລັດ ເຊື່ອໝັ້ນ ໃນການມຸ່ງໝັ້ນ ແລະ ຄວາມຕັ້ງໃຈພັດທະນາ ສ້າງຜົນກຳໄລແກ່ບໍລິສັດ ແລະ ນໍາເອົາຜົນປະໂຫຍດ ເພື່ອປະກອບສ່ວນພັດທະນາເສດຖະກິດ – ສັງຄົມປະເທດຊາດ ກໍຄືທ້ອງຖິ່ນ.


ພ້ອມນີ້, ກໍສະເໜີໃຫ້ການນຳຂັ້ນແຂວງ, ຂັ້ນເມືອງ ໃຫ້ການຊີ້ນໍາຢ່າງໃກ້ຊິດ ຊ່ວຍເຫຼືອໃນການພັດທະນາບໍລິສັດ, ໃຫ້ອຳນາດການປົກຄອງບ້ານອ້ອມຂ້າງ ປຸກລະດົມພໍ່ແມ່ປະຊາຊົນມີສ່ວນຮ່ວມໃນການພັດທະນາ ເຂົ້າເຮັດວຽກໃນໂຄງການ ເພື່ອສ້າງລາຍຮັບພັດທະນາຊີວິດການເປັນຢູ່ ພັດທະນາຄອບຄົວໃຫ້ດີຂຶ້ນ, ໃຫ້ທຸກຂະແໜງການສະໜັບສະໜູນ ແລະ ຊ່ວຍເຫຼືອໃນການພັດທະນາບໍລິສັດ ໃຫ້ໄດ້ຮັບການຈັດຕັ້ງປະຕິບັດຢ່າງມີຜົນສຳເລັດຕາມເປົ້າໝາຍ.
ສ່ວນຂໍ້ສະເໜີຕ່າງໆທີ່ບໍລິສັດໄດ້ສະເໜີ ແມ່ນມອບໃຫ້ອຳນາດການປົກຄອງແຂວງ ກໍຄືຂະແໜງການກ່ຽວຂ້ອງໃນຂັ້ນທ້ອງຖິ່ນ ສົມທົບປຶກສາຫາລືຊອກຊ່ອງທາງວິທີການແກ້ໄຂໃນຕໍ່ໜ້າ.