ຂ່າວຊີອາໄອ ລາຍງານວ່າ: ວັນທີ 27 ພຶດສະພານີ້, ກອງປະຊຸມໃຫຍ່ອົງການອະນາໄມໂລກ ຄັ້ງທີ 77 ໄດ້ໄຂຂຶ້ນຢູ່ນະຄອນເຊີແນວ ຂອງສະວິດ, ຫົວຂໍ້ຂອງກອງປະຊຸມຄັ້ງນີ້ແມ່ນ “ ທຸກສິ່ງທຸກຢ່າງເພື່ອສຸຂະພາບ, ທຸກຄົນມີສຸຂະພາບແຂງແຮງ ”.
ກອງປະຊຸມໃຫຍ່ອົງການອະນາໄມໂລກຄັ້ງນີ້ ຈະດຳເນີນໄປເປັນເວລາ 6 ວັນ. ໃນໄລຍະດຳເນີນກອງປະຊຸມ, ຜູ້ເຂົ້າຮ່ວມຈະອະນຸມັດແຜນດຳເນີນງານ ລວມສະບັບທີ 14 ຂອງອົງການອະນາໄມໂລກ ເຊິ່ງຈະເປັນແຜນຍຸດທະສາດສາທາລະນະສຸກຂອງອົງການອະນາໄມໂລກປີ 2025 – 2028. ຈຸດປະສົງແມ່ນເພື່ອຮັບມືກັບຜົນກະທົບຕໍ່ສຸຂະພາບ ແລະ ຜົນປະໂຫຍດທີ່ເກີດຈາກບັນຫາຕ່າງໆ ເຊັ່ນ: ການປ່ຽນແປງຂອງດິນຟ້າອາກາດ, ອັດຕາສ່ວນຜູ້ອາຍຸສູງເພີ່ມຂຶ້ນ, ການຍົກຍ້າຍຖິ່ນຖານຂອງປະຊາຊົນ, ຄວາມກ້າວໜ້າຂອງວິທະຍາສາດເຕັກນິກ ແລະ ອື່ນໆ.
ຜູ້ເຂົ້າຮ່ວມກອງປະຊຸມຍັງຈະພິຈາລະນາ ແລະ ປຶກສາຫາລືກ່ຽວກັບການຮ່າງ “ ສັນຍາວ່າດ້ວຍ ພະຍາດແຜ່ລະບາດຢ່າງຮ້າຍແຮງ ” ແລະ ການປັບປຸງ “ ລະບຽບການສາທາລະນະສຸກສາກົນ ”. ພ້ອມທັງວາງຂໍ້ຕົກລົງກ່ຽວກັບວຽກງານບຸລິມະສິດຕ່າງໆ ເຊັ່ນ: ດິນຟ້າອາກາດ ກັບ ສາທາລະນະສຸກ, ວຽກງານຂອງອົງການອະນາໄມໂລກໃນເຫດການສຸກເສີນດ້ານສາທາລະນະສຸກ, ພະຍາດຕິດແປດ, ພະຍາດທີ່ບໍ່ແມ່ນປະເພດຕິດແປດ, ສຸຂະພາບຈິດ, ສຸຂະພາບຂອງແມ່ຍິງ, ການປະຕິຮູບອົງການອະນາໄມໂລກ ແລະ ອື່ນໆ.
