ສິ່ງເສດເຫຼືອ ຖີ້ມກໍ່ເປັນຂີ້ເຫຍື້ອ​ເກັບມາປະຍຸກກໍ່ຄືຂອງມີຄ່າ

57

ອາທິດຜ່ານມານີ້ ທີ່ຫ້ອງປະຊຸມພະແນກຊັບພະຍາກອນທຳມະຊາດ ແລະສິ່ງແວດລ້ອມ ແຂວງຫຼວງພະບາງ ໄດ້ມີງານປະກວດສິ່ງປະດິດຈາກສິ່ງເສດເຫຼືອ ໂດຍເປັນປະທານຂອງ ທ່ານ ຈັນທະວົງ ຜົນນະຈິດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ມີແຂກຮັບເຊີນ, ຜູ້ໃຫ້ການສະໜັບໜູນ, ຄະນະກຳມະການຕັດສິນ ແລະຜູ້ສົ່ງຜົນງານປະກວດ ເຂົ້າຮ່ວມ. ທ່ານ ຈັນທະວົງ ຜົນນະຈິດ ໄດ້ມີຄຳເຫັນວ່າ: ການກຳຈັດສີ່ງເສດເຫຼືອ ມີຄວາມສຳຄັນຫຼາຍຕໍ່ການຮັກສາສະພາບແວດລ້ອມ ປັດຈຸບັນປະລິມານການຖີ້ມຂີ້ເຫຍື້ອຢູ່ຫຼາຍປະເທດ ລວມທັງ ສປປ ລາວ ໂດຍສະເພາະແຂວງຫຼວງພະບາງ ອັນເປັນສາເຫດເຮັດໃຫ້ເກີດມີມົນລະຜິດທາງອາກກາດ ແລະສົ່ງຜົນກະທົບຕໍ່ສີ່ງແວດລ້ອມ-ສັງຄົມ ຢ່າງກວ້າງຂວາງ ຈື່ງຮຽກຮ້ອງໃຫ້ທົ່ວສັງຄົມ ຫັນມາໃສ່ໃຈຕໍ່ການຫຼຸດຜ່ອນຂີ້ເຫຍື້ອ, ທ່ານກ່າວຕື່ມວ່າ: ການຈັດງານຄັ້ງນີ້ ເປັນການປຸກລະດົມໃຫ້ທົ່ວສັງຄົມ ພ້ອມກັນຊຸກຍູ້ໃຫ້ມີການນຳເອົາສີ່ງເສດເຫຼືອ ມາປະດິດເປັນເຄື່ອງທີ່ລະນຶກ ເຄື່ອງຊົມໃຊ້ ເພື່ອຫຼຸດຜ່ອນປະລິມານຂີ້ເຫຍື້ອ ທີ່ນັບມື້ນັບເພີ່ມຂື້ນ.

May be an image of 1 person, toy, dais and text
ສຳລັບສິ່ງປະດິດຈາກສີ່ງເສດເຫຼືອ ທີ່ນຳເຂົ້າມາປະກວດໃນຄັ້ງນີ້ມີ ທັງໝົດ 28 ລາຍການ ໂດຍໄດ້ແບ່ງອອກເປັນ 2 ລະດັບຄື: ລະດັບວິທະຍາໄລ ແລະບຸກຄົນທົ່ວໄປມີ 14 ລາຍການ ແລະລະດັບມັດທະຍົມມີ 14 ລາຍການ ຜ່ານການນຳສະເໜີສິ່ງປະດິດຂອງຜູ້ເຂົ້າປະກວດທັງ 28 ລາຍການ ແລະການຕັດສີນຂອງຄະນະກຳມະການ, ລະດັບວິທະຍາໄລ ແລະບຸກຄົນທົ່ວໄປ, ທີ 1 ແມ່ນ ຊຸດແຍກຖັງຂີ້ເຫຍື້ອ 4 ສີ ທີ່ເຮັດຈາກຕຸກນໍ້າເກົ່າ ຜົນງານຂອງທິມງານຈາກ ໂຮງຮຽນມັດທະຍົມສົມບູນປ່ອງຄຳ, ທີ 2 ກະເປົາໂອວັນຕີນຊອຍ ທີ່ຂ້ອຍຮັກ ໂດຍເຮັດຈາກຖົງໂອວັນຕີນຊອຍເກົ່າ ຜົນງານຂອງ ນາງ ບຸນມີ ພັດທະນາ ບ້ານພູຊ້າງຄຳ, ທີ 3 ຖ່ານອັດແທ່ງຊີວະຈາກໃບໄມ້ແຫ້ງ ຜົນງານຂອງ ນາງ ເພັດສາຄອນ ລະຕະນະມະນີ ບ້ານຂົວທີ 1 ແລະລາງວັນຊົມເຊີຍອີກ 3 ລາງວັນ.

May be an image of 7 people, tree and text

ສ່ວນລະດັບມັດທະຍົມ ທີ 1 ໄກ່ຜູ້ໂອກ ທີ່ເຮັດຈາກໂຟມ ແລະຕຸກນໍ້າເປົ່າຜົນງານຂອງນັກຮຽນໂຮງຮຽນມັດທະຍົມສົມບູນເດັກກຳພ້າ, ທີ 2 ໂຖດອກໄມ້ ເຮັດຈາກເຈ້ຍ, ຕຸກນໍ້າ ແລະໄມ້ ຜົນງານຂອງນັກຮຽນໂຮງຮຽນ SOS, ທີ 3 ເຮືອຊ່ວງ ເຮັດຈາກໄມ້ເສດ ຜົນງານຂອງ ທ້າວ ອານຸສິດ ຈາກໂຮງຮຽນມັດທະຍົມສົມບູນສັນຕິພາບ ແລະລາງວັນຊົມເຊີຍ ອີກ 3 ລາງວັນ.

May be an image of 3 people, dais and text

ສຳລັບລາງວັນໄດ້ຈັດເປັນເອກະພາບກັນທັງສອງປະເພດຄື ທີ 1 ໄດ້ຮັບເງິນສົດ 1 ລ້ານກີບ, ທີ 2 ໄດ້ຮັບງເງິນສົດ 7 ແສນກີບ, ທີ 3 ໄດ້ຮັບເງິນສົດ 5 ແສນກີບ ແລະລາງວັນຊົມເຊີຍ 2 ແສນກີບ, ເຊີ່ງຜົນງານທີ່ໄດ້ຮັບລາງວັນທີ່ 1 ຈະໄດ້ມີການຈັດວາງສະແດງໂອກາດສະເຫຼີມສະຫຼອງ ວັນສີ່ງແວດລ້ອມໂລກ ທີ່ຈະມາເຖີງນີ້.