ກະຊວງສາທາລະນະສຸກ ໄດ້ຖະແຫຼງຂ່າວກ່ຽວກັບການພິມຄຳເຕືອນສຸຂະພາບໃສ່ຊອງ ແລະ ກັບຢາສູບທຸກຊະນິດ. ພ້ອມນັ້ນຍັງໄດ້ລະບຸວ່າ ມີຜູ້ເສຍຊີວິດຈາກພະຍາດທີ່ກ່ຽວຂ້ອງກັບຢາສູບປະມານ 18 ຄົນຕໍ່ມື້ ຫຼື ຄິດເປັນ 6.700 ຄົນຕໍ່ປີ ໃນ ສປປ ລາວ.
ເມື່ອບໍ່ດົນມານີ້, ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ໄດ້ຖະແຫຼງຂ່າວກ່ຽວກັບການພິມຄຳເຕືອນກ່ຽວກັບສຸຂະພາບໃສ່ຊອງ ແລະ ກັບຢາສູບທຸກຊະນິດ ໃຫ້ຮູ້ວ່າ: ການສູບຢາ ແລະ ການໄດ້ຮັບຄວັນຢາສູບ ເປັນສາເຫດຂອງການເຈັບປ່ວຍຮ້າຍແຮງ, ການພິການ ແລະ ການຕາຍກ່ອນໄວອັນຄວນ. ຜູ້ເປັນພະຍາດທີ່ເກີດຈາກຢາສູບ ລ້ວນແຕ່ມີຄ່າໃຊ້ຈ່າຍທີ່ສູງຫຼາຍ.
ຈາກການຄິດໄລ່ຄ່າໃຊ້ຈ່າຍທັງທາງກົງ ແລະ ທາງອ້ອມໃນການປິ່ນປົວພະຍາດທີ່ເກີດຈາກການສູບຢາລະດັບຊາດໃນແຕ່ລະປີສູງເຖິງ 3.600 ຕື້ກີບ ຫຼື ປະມານ 2,3% ຂອງ GDP ເຮັດໃຫ້ຄົນລາວເສຍຊີວິດ 6.700 ຄົນຕໍ່ປີ ຫຼື 18 ຄົນຕໍ່ມື້ ເຊິ່ງກວມເອົາ 15% ຂອງການຕາຍທັງໝົດໃນ ສປປ ລາວ.
ການຕາຍຍ້ອນສາເຫດນີ້ ສາມາດປ້ອງກັນໄດ້ ຖ້າມີມາດຕະການຄວບຄຸມຢາສູບຢ່າງມີປະສິດທິພາບ ເປັນຕົ້ນແມ່ນການເພີ່ມອາກອນຢາສູບ, ການຫ້າມໂຄສະນາຢາສູບທຸກຮູບແບບ, ການຈັດສະຖານທີ່ເຮັດວຽກ ແລະ ສະຖານທີ່ສາທາລະນະປອດຈາກຄວັນຢາສູບ, ການໃຫ້ຄວາມຮູ້ແກ່ສັງຄົມກ່ຽວກັບຜົນຮ້າຍຈາກການສູບຢາ ແລະ ການໄດ້ຮັບຄວັນຢາສູບ ແລະ ການພິມຄໍາເຕືອນ ກ່ຽວກັບສຸຂະພາບເປັນຮູບພາບຂະໜາດໃຫຍ່ໃສ່ຊອງ ແລະ ກັບຢາສູບ.
ຜ່ານການຈັດຕັ້ງປະຕິບັດຂໍ້ຕົກລົງວ່າດ້ວຍ ການພິມຄໍາເຕືອນກ່ຽວກັບສຸຂະພາບທີ່ເປັນພາບຂະໜາດ 75% ທີ່ອອກໃນປີ 2016 ມາຮອດປັດຈຸບັນເປັນເວລາ 8 ປີ ເຫັນວ່າຮູບພາບຄໍາເຕືອນ ແລະ ສະຫຼາກຍັງມີປະສິດທິພາບຕໍ່າ, ຍັງມີການໂຄສະນາ ແລະ ໃຫ້ຂໍ້ມູນທີ່ສ້າງຄວາມເຂົ້າໃຈຜິດແກ່ຜູ້ບໍລິໂພກຜ່ານຊອງຢາສູບ ແລະ ຍັງບໍ່ສອດຄ່ອງກັບຂໍ້ມູນໃໝ່ໆດ້ານວິທະຍາສາດ ກ່ຽວກັບຜົນກະທົບຂອງຢາສູບຕໍ່ສຸຂະພາບ. ດັ່ງນັ້ນ, ຈຶ່ງໄດ້ປັບປຸງເພື່ອໃຫ້ສອດຄ່ອງກັບກົດໝາຍວ່າດ້ວຍການປັບປຸງຢາສູບ ສະບັບເລກທີ 09/ສຂສ ລົງວັນທີ 16 ພະຈິກ 2021 ເຊິ່ງກໍານົດໃຫ້ກະຊວງສາທາລະນະສຸກປັບປຸງຄໍາເຕືອນກ່ຽວກັບສຸຂະພາບເປັນຮູບພາບ ແລະ ສະຫຼາກແຕ່ລະໄລຍະໃຫ້ມີປະສິດທິພາບ ແລະ ແທດເໝາະກັບແຕ່ລະໄລຍະ ອີງໃສ່ສະພາບຄວາມເປັນຈິງໃນປັດຈຸບັນ.
ຂໍ້ຕົກລົງ ວ່າດ້ວຍການບັນຈຸ, ການຫຸ້ມຫໍ່, ການພິມຄໍາເຕືອນກ່ຽວກັບສຸຂະພາບ ແລະ ສະຫຼາກຜະລິດຕະພັນຢາສູບ ສະບັບເລກທີ 1090/ສທ ລົງວັນທີ 13 ພຶດສະພາ 2024 ແມ່ນປະກອບມີ 10 ຮູບພາບ ພ້ອມດ້ວຍຂໍ້ ຄວາມ ແລະ 10 ຮູບແບບສະຫຼາກຄໍາເຕືອນກ່ຽວກັບສຸຂະພາບ ທີ່ບໍລິສັດຜະລິດຢາສູບທັງພາຍໃນ ແລະ ນໍາເຂົ້າຈາກຕ່າງປະເທດຕ້ອງໄດ້ພິມໃສ່ທຸກຊອງ ເພື່ອໃຫ້ຈຳກັດຢາສູບທີ່ຈໍາໜ່າຍຢູ່ໃນ ສປປ ລາວ ລວມທັງຢູ່ໃນຮ້ານຄ້າປອດພາສີ ແລະ ຕ້ອງມີການສັບປ່ຽນໝູນວຽນຮູບພາບ ພ້ອມຂໍ້ຄວາມ ແລະ ສະຫຼາກຄໍາເຕືອນການກໍານົດສີ, ທາຄວາມເຂັ້ມຂອງສີ, ນໍ້າໜັກສີ, ລະຫັດສີ, ຕໍາແໜ່ງຕົວອັກສອນ, ຂະໜາດ ແລະ ຄວາມຊັດເຈນຕ້ອງພິມຕາມຕົ້ນສະບັບທີ່ກະຊວງສາທາລະນະສຸກສະໜອງໃຫ້ເທົ່ານັ້ນ.
