ໃນວັນທີ 22 ພຶດສະພາ ຜ່ານມານີ້ທີ່ແຂວງຄຳມ່ວນ ໄດ້ມີພິທີຈັດສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊິວິດໃນປາງສົງຄາມກັບຄືນປະເທດໂດຍມີ ສະຫາຍ ວັນໄຊ ພອງສະຫວັນ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຄໍາມ່ວນ, ສະຫາຍ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນຫົວໜ້າຄະນະປະຕິບັດງານພິເສດຂັ້ນແຂວງ, ພ້ອມດ້ວຍບັດດາສະຫາຍໃນຄະນະປະຈໍາພັກແຂວງ, ກໍາມະການພັກແຂວງ, ຄະນະປະຕິບັດງານພິເສດແຂວງ ຄໍາມ່ວນ, ສະຫາຍ ຮວ່າງຊວັນ ເຕິນ ຮອງປະທານຄະນະກໍາມະການປະຊາຊົນແຂວງ ຫົວໜ້າຄະນະປະຕິບັດງານພິເສດແຂວງກວາງບິ່ງ ສສ ຫວຽດນາມຕະຫຼອດຮອດຄະນະພັກ – ຄະນະບັນຊາກໍາລັງປກຊ – ປກສແຂວງ, ພະແນກການອ້ອມຂ້າງແຂວງ, ສະຫະພັນນັກຮົບເກົ່າແຂວງ, ອົງການຈັດຕັ້ງມະຫາຊົນ ພ້ອມດ້ວຍພະນັກງານ – ນັກຮົບກອງປະຕິບັດງານພິເສດ 589 ເຂົ້າຮ່ວມ.
ສະຫາຍ ປອກ ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນ, ຫົວໜ້າກອງປະຕິບັດງານພິເສດຂັ້ນແຂວງໄດ້ຜ່ານບົດສະດຸດີ ໂດຍມີເນື້ອໃນວ່າ: ໃນການຈັດພິທີມອບ – ສົ່ງອັດຖິຂອງທະຫານອາສາສະໝັກ ແລະ ຊ່ຽວຊານຫວຽດ ນາມ ທີ່ເສຍສະຫຼະຊິວິດໃນປາງສົງຄາມຢູ່ດິນແດນສະໝໍລະພູມແຂວງຄໍາມ່ວນທີ່ສາມາດຂຸດຄົ້ນ ແລະ ທ້ອນໂຮມໄດ້ໃນລະດູແລ້ງປີ 2023 – 2024 ມີຈໍານວນ 16 ຮ່າງອັດຖິ, ເພື່ອກັບຄືນປະເທດ, ກັບຄືນບ້ານເກີດເມືອງນອນຂອງຕົນໃນຄັ້ງນີ້, ພວກເຮົາສະແດງຄວາມໄຫວ້ອາໄລ ແລະ ຮູ້ບຸນຄຸນຢ່າງລົ້ນເຫຼືອຕໍ່ດວງວິຍານຂອງບັນດາພະນັກງານ – ນັກຮົບທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດໃນປາງສົງຄາມ ເຊິ່ງຕະຫຼອດໄລຍະຜ່ານມາປະຊາຊົນລາວບັນດາເຜົ່າ ເວົ້າລວມ, ເວົ້າສະເພາະ ປະຊາຊົນຊາວແຂວງຄໍາມ່ວນ ມີຄວາມຊາບຊຶ້ງ ແລະ ຈົດຈໍາຈາລຶກບຸນຄຸນຢ່າງບໍ່ມີວັນຫຼົງລືມໄດ້, ມູນເຊື້ອການຮ່ວມມືສູ້ຮົບລະຫວ່າງສອງຊາດ ລາວ – ຫວຽດນາມ, ຫວຽດນາມ – ລາວ ແມ່ນເປັນສັນຍາລັກທີ່ສະຫວ່າງສະໄຫວ ແລະ ຢືນຢັນໄດ້ວ່າ : ການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງກອງທັບປະຊາຊົນລາວ ແລະ ກອງທັບປະຊາຊົນຫວຽດນາມ ເຊິ່ງແມ່ນການປະສານສົມທົບທີ່ມີປະສິດທິຜົນສູງ ເຊິ່ງຜົນງານ ແລະ ຄຸນງາມຄວາມດີຂອງບັນດາສະຫາຍພະນັກງານ – ນັກຮົບ ຈະກາຍເປັນແວ່ນແຍງອັນໃສແຈ້ງໃຫ້ແກ່ລູກຫຼານຄົນຮຸ້ນຫຼັງໄດ້ຮໍ່າຮຽນເອົາໄປຊົ່ວກາລະນານ.
ຈາກນັ້ນ ຄະນະຜູ້ແທນທັງສອງຝ່າຍ ແລະ ພາກສ່ວນທີ່ກ່ຽວຂ້ອງ ກໍ່ໄດ້ຂຶ້ນວາງພວງມະລາ ເພື່ອລະນຶກເຖິງຄວາມຮູ້ບຸນຄຸນຂອງພະນັກງານ – ນັກຮົບ ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມໃນຄັ້ງນີ້ ພ້ອມທັງນຳເອົາຮ່າງອັດຖິດັ່ງກ່າວຂຶ້ນສູ່ລົດ ແລະ ນຳສົ່ງກັບຄືນປະເທດຫວຽດນາມຢ່າງສົມກຽດ.
