ພະຍາດໝາກແດງໃຫຍ່ເກີດຈາກໄວຮັສຊະນິດໜຶ່ງ ເກີດການຕິດຕໍ່ຈາກຄົນສູ່ຄົນໄດ້ໄວຫຼາຍ, ຜູ້ຕິດເຊື້ອສາມາດແຜ່ເຊື້ອໃຫ້ຄົນອື່ນຜ່ານລົມຫາຍໃຈ, ການໄອ ຫຼື ຈາມ; ພະຍາດດັ່ງກ່າວ ສາມາດເກີດຂຶ້ນກັບທຸກຄົນ ສ່ວນຫຼາຍແມ່ນເດັກນ້ອຍ.
ພະຍາດນີ້ເປັນພະຍາດທີ່ອັນຕະລາຍຫຼາຍແຕ່ສາມາດປ້ອງກັນໄດ້ດ້ວຍວັກຊີນ, ຖ້າບໍ່ໄດ້ຮັບວັກຊີນມາກ່ອນ ເມື່ອຕິດເຊື້ອແລ້ວມີໂອກາດເຈັບປ່ວຍໜັກ ແລະ ເສຍຊີວິດໄດ້. ເດັກນ້ອຍທີ່ມີອາຍຸຕໍ່າກວ່າ 5 ປີ ແມ່ນມີ ຄວາມສ່ຽງສູງທີ່ຈະເປັນພະຍາດໝາກແດງຮ້າຍແຮງ.
ອາການເບື້ອງຕົ້ນຂອງພະຍາດໄຂ້ໝາກແດງໃຫຍ່ຫຼັງຈາກຕິດເຊື້ອຈະມີ: ຜື່ນແດງ, ມີນໍ້າຕາ, ໄຂ້, ໄອ, ຕາອັກເສບ, , ຂີ້ມູກຍ້ອຍ, ຕາແດງ. ນອກຈາກນັ້ນກໍມີອາການສົນ ຫຼື ອາການແຊກຊ້ອນອີກເຊັ່ນ:
– ການຖອກທ້ອງຮຸນແຮງ, ຫູອັກເສບ, ຕາບອດ, ປອດ ອັກເສບ ແລະ ສະໝອງອັກເສບ. ບາງອາການເຫຼົ່ານີ້ສາມາດເຮັດໃຫ້ເສຍຊີວິດໄດ້.
– ສ່ວນໃຫຍ່ອາການແຊກຊ້ອນຈາກພະຍາດໝາກແດງ ໃຫຍ່ມັກເກີດກັບເດັກອາຍຸຕໍ່າກວ່າ 5 ປີ (ໂດຍສະເພາະເດັກທີ່ຂາດສານອາຫານ) ແລະ ຜູ້ໃຫຍ່ທີ່ອາຍຸຫຼາຍກວ່າ 30 ປີ.
– ສະນັ້ນ, ພະຍາດໝາກແດງໃຫຍ່ຈຶ່ງເປັນໜຶ່ງໃນສາເຫດຫຼັກທີ່ເຮັດໃຫ້ເດັກທົ່ວໂລກເສຍຊີວິດ.
– ພະຍາດດັ່ງກ່າວບໍ່ມີຢາປິ່ນປົວສະເພາະ, ແຕ່ທ່ານສາມາດປ້ອງກັນໄດ້ແຕ່ຫົວທີດ້ວຍການສັກວັກຊີນໃຫ້ຄົບ.
– ຖ້າຜູ້ຍິງຕິດເຊື້ອພະຍາດໝາກແດງໃຫຍ່ ໃນຕອນຖືພາ ພະຍາດນີ້ສາມາດເຮັດໃຫ້ແມ່ເກີດລູກກ່ອນກຳນົດໄດ້ ແລະ ເດັກຈະມີນໍ້າໜັກຕໍ່າໃນຕອນເກີດ.
ການສັກວັກຊີນປ້ອງກັນພະຍາດໄຂ້ໝາກແດງໃຫຍ່ໃຫ້ຄົບເປັນວິທີປ້ອງກັນທີ່ດີທີ່ສຸດສໍາລັບຕົວທ່ານ ແລະ ລູກນ້ອຍ ເພື່ອບໍ່ໃຫ້ແຜ່ເຊື້ອໄປສູ່ຄົນອື່ນ. ວັກຊີນປ້ອງກັນພະຍາດໄຂ້ໝາກແດງໃຫຍ່ ແລະ ໝາກແດງນ້ອຍ ປອດໄພ ແລະ ມີປະສິດທິພາບ ໄດ້ຖືກນໍາໃຊ້ທົ່ວໂລກເປັນເວລາຫຼາຍກວ່າ 60 ປີແລ້ວ; ແຕ່ລະປີກໍມີຄົນຫຼາຍລ້ານຄົນທີ່ໄດ້ສັກວັກຊີນນີ້ເພື່ອສ້າງພູມຄຸ້ມກັນທີ່ຈໍາເປັນ ເຊັ່ນດຽວກັບທຸກວັກຊີນທີ່ໃຊ້ຢູ່ໃນປະເທດຂອງພວກເຮົາ.
ວັກຊີນປ້ອງກັນພະຍາດໄຂ້ໝາກແດງໃຫຍ່-ໝາກແດງນ້ອຍໄດ້ຜ່ານຂະບວນການທາງວິທະຍາສາດທີ່ລະອຽດເພື່ອປະເມີນ, ຮອງຮັບຄວາມປອດໄພ ແລະ ຢັ້ງຢືນຜົນການສຶກສາຈໍານວນຫຼາຍ.
ເລີ່ມແຕ່ວັນທີ20-31ພຶດສະພາ ສປປ ລາວ ໄດ້ຈັດຂະບວນການສັກວັກຊີນໝາກແດງໃຫຍ່ ແລະ ໝາກແດງນ້ອຍທົ່ວປະເທດ. ໃຫ້ບັນດາທ່ານພາລູກຫຼານທີ່ມີອາຍຸລະຫວ່າງ 9 ເດືອນ ຫາ 59 ເດືອນ(ຕໍ່າກວ່າ5ປີ)ໄປຮັບວັກຊີນ ເພື່ອສ້າງພູມຄຸ້ມກັນ ສໍາລັບການສັກວັກຊີນນີ້ແມ່ນມີສະໜອງໃຫ້ໂດຍບໍ່ໄດ້ເສຍຄ່າພາຍໃຕ້ໂຄງການສັກຢາກັນພະຍາດແຫ່ງຊາດ.
ສະຖານທີ່ໃຫ້ບໍລິການມີດັ່ງນີ້:
– ສໍາລັບນະຄອນຫຼວງມີ: ໂຮງໝໍສູນກາງ ແລະ ໂຮງໝໍເມືອງທຸກ 9 ຕົວເມືອງ
– ບັນດາແຂວງມີ: ໂຮງໝໍແຂວງ, ໂຮງໝໍເມືອງ, ສຸກສາລາ ແລະ ຈຸດບໍລິການເພີ່ມເຕີມທີ່ແຂວງກໍານົດໄວ້.
