ລາວ-ຈີນເປັນປະເທດທີ່ມີສາຍນ້ຳແດນດິນຕິດຈອດກັນ, ມີເສັ້ນທາງລົດໄຟເຊື່ອມເຂົ້າຫາກັນ ແລະມີສາຍການບິນທັງຈີນ ແລະລາວບິນໄປມາຫາສູ່ກັນໃນຫຼາຍເຂດແຂວງ, ຫຼ້າສຸດນີ້ແມ່ນໄດ້ເປີດເສັ້ນບິນປາກເຊ-ກວາງໂຈເປັນທີ່ຮຽບຮ້ອຍແລ້ວ.
ສື່ທ້ອງຖິ່ນລາຍງານວ່າ ບໍລິສັດ ຮ່ວມພັດທະນາ ສີທັນດອນ ຈໍາກັດ ຮ່ວມກັບລັດວິສາຫະກິດການບິນລາວ ສາຂາ ແຂວງຈໍາປາສັກ ຈັດພິທີຕ້ອນຮັບຜູ້ໂດຍສານສາຍກົງ ເສັ້ນທາງປາກເຊ-ກວາງໂຈ-ປາກເຊ ຖ້ຽວທໍາອິດ ໃນວັນທີ 20 ພຶດສະພາ 2024 ທີ່ສະໜາມບິນສາກົນ ປາກເຊ ໂດຍການເຂົ້າຮ່ວມຂອງ ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ ພ້ອມດ້ວຍພະແນກການ, ພະນັກງານວິຊາການລັດວິສາຫະກິດການບິນລາວ ແລະ ໜ່ວຍງານທີ່ກ່ຽວຂ້ອງ ເຂົ້າຮ່ວມ.
ການເປີດຖ້ຽວບິນ ປາກເຊ-ກວາງໂຈ-ປາກເຊ ເປັນການຍົກລະດັບການເຊື່ອມໂຍງເຊື່ອມຈອດເສັ້ນທາງຄົມມະນາຄົມທາງອາກາດ ລະຫວ່າງສອງແຂວງ, ສອງຊາດ ທັງເປັນການຊຸກຍູ້ສົ່ງເສີມວຽກງານທ່ອງທ່ຽວຂອງສອງປະເທດ ທັງເປັນການເປີດເສັ້ນທາງ ໃຫ້ນັກທ່ອງທ່ຽວປະເທດທີສາມ ສາມາດເດີນທາງມາຢ້ຽມຢາມ ສປປ ລາວ ແລະ ສປ ຈີນ ອີກຊ່ອງທາງໜຶ່ງ. ນອກນີ້, ຍັງເປັນການດຶງດູດການລົງທຶນຂອງພາກທຸລະກິດ ໃຫ້ຂະຫຍາຍຕົວເພີ່ມຂຶ້ນ ແລະ ເພື່ອອໍານວຍຄວາມສະດວກ ໃຫ້ການເດີນທາງຂອງນັກລົງທຶນ, ນັກທ່ອງທ່ຽວຜູ້ໂດຍສານທີ່ເດີນທາງເຂົ້າ-ອອກພາກໃຕ້ ຂອງ ສປປ ລາວ ໂດຍສະເພາະແຂວງຈຳປາສັກ ໃຫ້ມີຄວາມສະດວກຍິ່ງຂຶ້ນ.
ສຳລັບເສັ້ນບິນນີ້ເປັນຖ້ຽວບິນກົງ ປາກເຊ-ກວາງໂຈ-ປາກເຊ ເປີດບໍລິການ 1 ຖ້ຽວຕໍ່ອາທິດ, ເລີ່ມໃຫ້ບໍລິການແຕ່ວັນທີ 19 ພຶດສະພາ 2024 ເປັນຕົ້ນມາ ດ້ວຍເຮືອບິນແອບັສ (Airbus 320), ເຊິ່ງຖ້ຽວບິນ ປາກເຊ-ກວາງໂຈ ອອກເດີນທາງເວລາ 23:15 ໂມງ ຮອດຈຸດໝາຍເວລາ 2:05 ໂມງ ມີທຸກວັນອາທິດ; ຖ້ຽວບິນ ກວາງໂຈ-ປາກເຊ ອອກເດີນທາງເວລາ 3:05 ໂມງ ຮອດຈຸດໝາຍເວລາ 04:05 ໂມງ ມີທຸກວັນຈັນ.
