ໃນວັນທີ 2 ພຶດສະພາ 2024 ທີ່ປາຣີ ປະເທດຝຣັ່ງ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມສະພາລັດຖະມົນຕີ ປະຈຳປີ 2024 ຂອງອົງການຮ່ວມມືດ້ານເສດຖະກິດ ເພື່ອການພັດທະນາ ( Organization for Economic Cooperation and Development = OECD ) ພາຍໃຕ້ຫົວຂໍ້: ..“ ການນຳພາປຶກສາຫາລືລະດັບໂລກ ດ້ວຍແນວທາງທີ່ເປັນກາງ ແລະ ເຊື່ອຖືໄດ້ ເພື່ອການເຕີບໂຕແບບຍືນຍົງ ແລະ ຮອບດ້ານ ”.. ໂດຍການເປັນປະທານຂອງປະເທດຍີ່ປຸ່ນ.
ໃນນາມປະທານອາຊຽນໃນປີ 2024 ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ເຂົ້າຮ່ວມພິທີເປີດກອງປະຊຸມ ແລະ ກ່າວມີຄຳເຫັນໃນພາກພິທີສະຫຼອງຄົບຮອບ 10 ປີ ການສ້າງຕັ້ງໂຄງການ SEARP ຮ່ວມກັບບັນດາລັດຖະມົນຕີຈາກ 5 ປະເທດສະມາຊິກອາຊຽນຄື: ຫວຽດນາມ, ສິງກະໂປ, ໄທ, ອິນໂດເນເຊຍ ແລະ ກອງເລຂາອາຊຽນ. ທ່ານໄດ້ຍົກໃຫ້ເຫັນຄວາມສຳຄັນຂອງການຮ່ວມມືກັນ ແລະ ບັນຫາສິ່ງທ້າທາຍຂອງໂລກທີ່ພວກເຮົາກຳລັງປະເຊີນຢູ່ທັງໃນດ້ານການເມືອງ, ເສດຖະກິດ ແລະ ສັງຄົມທີ່ກົດໜ່ວງຖ່ວງດຶງຕໍ່ການພັດທະນາຂອງບັນດາປະເທດໃນໂລກ ເຊິ່ງ ສປປ ລາວ ໄດ້ຮຽກຮ້ອງໃຫ້ທຸກພາກສ່ວນ ໂດຍສະເພາະອົງການ OECD ແລະ ຄູ່ຮ່ວມມືຈົ່ງເພີ່ມທະວີຮ່ວມມືກັນໃຫ້ຫຼາຍຂຶ້ນໃນການແກ້ໄຂສິ່ງທ້າທາຍດັ່ງກ່າວ ເພື່ອກ້າວໄປສູ່ການເຕີບໂຕ ແລະ ພັດທະນາແບບຍືນຍົງ ແລະ ຮອບດ້ານໃນພາກພື້ນກໍຄືທົ່ວໂລກ. ສປປ ລາວ ເຫັນໄດ້ຄວາມສຳຄັນຂອງການຮ່ວມມືລະຫວ່າງ ອາຊຽນ ແລະ OECD ທີ່ນັບມື້ມີບາດກ້າວຂະຫຍາຍຕົວ ແລະ ເປັນຮູບປະທຳຂຶ້ນເລື້ອຍໆ; ເຊິ່ງໃນນາມປະເທດອາຊຽນ ສປປ ລາວ ກໍໄດ້ປະກອບສ່ວນຢ່າງຕັ້ງໜ້າ ແລະ ມີສ່ວນຮ່ວມໃນກອງປະຊຸມລະດັບລັດຖະມົນຕີເປັນປະຈຳທຸກປີ ເພື່ອແລກປ່ຽນວິໄສທັດຮ່ວມກັບປະເທດສະມາຊິກ OECD ແລະ ອາຊຽນ ລວມທັງ ສປປ ລາວ ກໍມີຄວາມຍິນດີໃຫ້ການຮ່ວມມືກັບ OECD ໃນຕໍ່ໜ້າ ເພື່ອສົ່ງເສີມການມີສ່ວນຮ່ວມຂອງ ສປປ ລາວ ໃນອົງການ OECD…
ພວກເຮົາມາເບິ່ງຕື່ມອີກໃນບົດວິເຄາະຈາກ VOVWORLD ພາຍຫຼັງຫົວຂໍ້: “ ..ກອງປະຊຸມສະພາລັດຖະມົນຕີ OECD.. ” ສະບັບອອນລາຍ ລົງວັນທີ 3 ພຶດສະພາ 2024 ດັ່ງນີ້:
ໂດຍໄດ້ຮັບການຈັດຂຶ້ນໃນເວລາສອງວັນ ( ຄືວັນທີ 2 – 3 ພຶດສະພາ ) ຢູ່ປາຣີ ປະເທດຝຣັ່ງ, ກອງປະຊຸມສະພາລັດຖະມົນຕີອົງການຮ່ວມມື ແລະ ພັດທະນາເສດຖະກິດ ( OECD ) ປີນີ້ໄດ້ສຸມໃສ່ປຶກສາຫາລືບັນດາມາດຕະການເຕີບໂຕແບບຍືນຍົງ, ປັນຍາປະດິດ ແລະ ຫຼຸດຜ່ອນການປ່ອຍກາກບອນ.
ໂດຍແມ່ນເວທີປາໄສສູງສຸດຂອງ OECD, ກອງປະຊຸມສະພາລັດຖະມົນຕີ OECD ( MCM ) ປີນີ້ໂດຍ ຍີ່ປຸ່ນ ແລະ ເມັກຊີໂກ ເປັນເຈົ້າພາບຈັດຂຶ້ນ, ດ້ວຍເປົ້າໝາຍພາໄປເຖິງບັນດາການປຶກສາຫາລືທົ່ວໂລກ ຜ່ານບັນດາການສໍາຜັດທີ່ພາວະວິໄສ, ເປັນໜ້າໄວ້ເນື້ອເຊື່ອໃຈ, ມຸ່ງໄປເຖິງການເຕີບໂຕແບບຍືນຍົງ ແລະ ກວມລວມ.
■ ຍົກສູງບົດບາດຂອງ OECD
ໃນສອງວັນຈັດກອງປະຊຸມ MCM, ບັນດາຜູ້ແທນໄດ້ເຂົ້າຮ່ວມວາລະປະຊຸມສໍາຄັນຄັ້ງຕ່າງໆ ລວມມີ: ປະກາດບົດລາຍງານແງ່ຫວັງເສດຖະກິດທົ່ວໂລກຂອງ OECD; ຊຸກຍູ້ການບໍລິຫານພູມປັນຍາປະດິດແບບກວມລວມ ແລະ ທົ່ວໂລກ, ຫັນບັນດາການກະທໍາເພື່ອດິນຟ້າອາກາດຂອງໜ່ວຍໂລກໃຫ້ດີທີ່ສຸດ; ການສົນທະນາຂັ້ນລັດຖະມົນຕີ ເວທີປາໄສບັນດາວິທີການສໍາຜັດເພື່ອຫຼຸດຜ່ອນການປ່ອຍອາຍພິດກາກບອນ ( IFCMA). ກ່າວຄໍາເຫັນທີ່ພິທີໄຂ, ທ່ານ Mathias Cormann ເລຂາທິການໃຫຍ່ OECD ຢັ້ງຢືນວ່າ: ໂລກພວມຢູ່ໃນຈຸດເວລາມີລັກສະນະບາດລ້ຽວ, ດ້ວຍຫຼາຍສິ່ງທ້າທາຍໃຫຍ່ ອາດສາມາດພັດທະນາຫຼາຍປະເທດໃນອະນາຄົດ. ດັ່ງນັ້ນ, ບົດບາດ ແລະ ພາລະກໍາ ຂອງ OECD ໃນການເຊື່ອມຕໍ່ບັນດາປະເທດພ້ອມກັນສ້າງບັນດານະໂຍບາຍທົ່ວໂລກແບບຍືນຍົງນັ້ນນັບມື້ຮີບດ່ວນຍິ່ງກວ່າເວລາໃດໝົດ:
“ ພວກຂ້າພະເຈົ້າສຸມໃສ່ວຽກງານຂອງຕົນເຂົ້າໃນການຊຸກຍູ້ການຄ້າ ແລະ ການລົງທຶນເສລີ ແລະ ສະເໝີພາບກວ່າ, ຜ່ານນັ້ນ, ກໍປັບປຸງ ຄວາມໝັ້ນແກ່ນຂອງບັນດາພື້ນຖານເສດຖະກິດ. ພວກຂ້າພະເຈົ້າກໍສຸມໃສ່ບັນດາຄວາມມານະພະຍາຍາມຂອງຕົນເພື່ອນໍາມາເຊິ່ງການນໍາພາທີ່ຈໍາເປັນ, ຊ່ວຍຮັບມືກັບບັນດາສິ່ງທ້າທາຍກ່ຽວກັບດິນຟ້າອາກາດ ແລະ ການພັດທະນາແບບຍືນຍົງໃຫ້ປະສົບຜົນສໍາເລັດ ”.
ໄປຄຽງຄູ່ກັບການຊຸກຍູ້ການປຶກສາຫາລື ແລະ ການຮ່ວມມືສ້າງນະໂຍບາຍ, OECD ກໍເນັ້ນໜັກເຖິງການເພີ່ມທະວີການມີໜ້າຂອງອົງການນີ້ຜ່ານການຮັບສະມາຊິກໃໝ່ ແລະ ເປີດກວ້າງບັນດາໂຄງການຄູ່ຮ່ວມມືກັບບັນດາປະເທດ ແລະ ພາກພື້ນ.
ໃນວັນທໍາອິດທີ່ຈັດກອງປະຊຸມ MCM, ດ້ວຍຖານະເປັນປະເທດປະທານກອງປະຊຸມຄັ້ງນີ້, ທ່ານ Fumio Kishida, ນາຍົກລັດຖະມົນຕີຍີ່ປຸ່ນ ໄດ້ປະກາດຂໍ້ລິເລີ່ມສ້າງຂອບນິຕິກໍາສາກົນສະບັບໃໝ່ ເພື່ອຄຸ້ມຄອງການນໍາໃຊ້ປັນຍາປະດິດ ( AI ), ທ່ານ Fumio Kishida ກໍເນັ້ນໜັກເຖິງເລື່ອງຮັກສາຄວາມເປັນລະບຽບຮຽບຮ້ອຍດ້ານເສດຖະກິດເສລີ ແລະ ຍຸຕິທໍາ, ກໍຄື ຄວາມຈໍາເປັນຂອງເລື່ອງ OECD ເປີດກວ້າງການພົວພັນຄູ່ຮ່ວມມື ແລະ ຄູ່ເຈລະຈາກັບບັນດາປະເທດທີ່ຍັງບໍ່ທັນເປັນສະມາຊິກຂອງອົງການນີ້.
■ ຄວາມປະເອີບໃຈຢ່າງລະມັດລະວັງກ່ຽວກັບການເຕີບໂຕທົ່ວໂລກ
ໜຶ່ງໃນບັນດາການເຄື່ອນໄຫວທີ່ເປັນໜ້າສົນໃຈໃນຂອບເຂດກອງປະຊຸມ MCM ປີນີ້ແມ່ນເລື່ອງ OECD ປະກາດບົດລາຍງານກ່ຽວກັບແງ່ຫວັງເສດຖະກິດທົ່ວໂລກສະບັບຫຼ້າສຸດ, ໃນນັ້ນ, ໄດ້ຍົກລະດັບການຄາດຄະເນການເຕີບໂຕເສດຖະກິດທົ່ວໂລກປີ 2024 ຢູ່ໃນລະດັບ 3,1%, ສູງກວ່າເມື່ອທຽບໃສ່ລະດັບ 2,9% ທີ່ຄາດຄະເນໃນເດືອນກຸມພາຜ່ານມາ. ໂດຍອະທິບາຍໃຫ້ແກ່ການຄາດຄະເນທີ່ປະເອີບໃຈນີ້, ທ່ານ Mathias Cormann ເລຂາທິການໃຫຍ່ OECD ໃຫ້ຮູ້ວ່າ: ໜຶ່ງໃນບັນດາສາເຫດຕົ້ນຕໍແມ່ນເລື່ອງ 2 ພື້ນຖານເສດຖະກິດໃຫຍ່ສຸດໃນໂລກ ຄື: ອາເມຣິກາ ແລະ ຈີນ ເຕີບໂຕດີພໍສົມຄວນ. ລະອຽດຄື, OECD ຄາດຄະເນພື້ນຖານເສດຖະກິດອາເມຣິກາ ເຕີບໂຕ 2,6% ໃນປີ 2024 ເມື່ອທຽບໃສ່ລະດັບຄາດຄະເນ 2,1% ທີ່ຍົກອອກມາກ່ອນໜ້ານັ້ນ ແລະ ລະດັບການ ເຕີບໂຕ 2,5% ຂອງປີ 2023. ສໍາລັບພື້ນຖານເສດຖະກິດຈີນ, OECD ໄດ້ຍົກລະດັບການເຕີບໂຕໃນປີ 2024 ຂຶ້ນເປັນ 4,9% ເມື່ອທຽບໃສ່ລະດັບຄາດຄະເນ 4,7% ທີ່ໄດ້ຍົກອອກມາກ່ອນໜ້ານັ້ນ, ບົນພື້ນຖານນະໂຍບາຍງົບປະມານເປີດກວ້າງຂອງປະເທດນີ້. ສໍາລັບເຂດໃຊ້ສະກຸນເງິນລວມ ເອີຣົບ – Eurozone, OECD ຄາດຄະເນລະດັບການເຕີບໂຕໃນປີນີ້ແມ່ນ 0,7%, ສູງ ກວ່າ 0,1% ເມື່ອທຽບໃສ່ການຄາດຄະເນກ່ອນໜ້ານັ້ນ.
ສັງລວມແລ້ວ, ທ່ານ Mathias Cormann, ເລຂາທິການໃຫຍ່ OECD ໃຫ້ຂໍ້ສັງເກດປະເອີບໃຈຢ່າງລະມັດລະວັງກ່ຽວກັບພື້ນຖານເສດຖະກິດທົ່ວໂລກ ເລີ່ມກວມເອົາທ່າແຮງກວ່າ.
“ ປັດຈຸບັນ, ພວມມີບາງສາເຫດເພື່ອສືບຕໍ່ມີຄວາມປະເອີບໃຈໃນຊຸມເດືອນ ແລະ ໄຕມາດຈະມາເຖິງ. ເຖິງວ່າບັນດານະໂຍບາຍເງິນຕາຖືກຮັດກຸມ ຍັງໄດ້ກໍ່ຜົນສະທ້ອນ, ພິເສດແມ່ນສະທ້ອນເຖິງຕະຫຼາດດ້ານເຮືອນຢູ່ ແລະ ສິນເຊື່ອກໍຕາມ, ແຕ່ການເຄື່ອນໄຫວເສດຖະກິດທົ່ວໂລກຍັງໝັ້ນແກ່ນພໍສົມຄວນ. ຄວາມເຊື່ອໝັ້ນຂອງພາກເອກະຊົນໄດ້ຮັບການປັບປຸງ, ໄພເງິນເຟີ້ຄ່ອຍໆຫຼຸດລົງຢູ່ໃນລະດັບເປົ້າໝາຍ ຂອງບັນດາທະນາຄານກາງ ແລະ ບັນດາຄວາມສ່ຽງກັບເສດຖະກິດທົ່ວໂລກໄດ້ມີຄວາມດຸ່ນດ່ຽງກວ່າ ”.
ແຕ່ເຖິງຢ່າງໃດກໍຕາມ, ທ່ານນາງ Clare Lombardelli ຫົວໜ້ານັກຊ່ຽວຊານເສດຖະກິດຂອງ OECD ກໍກ່າວເຕືອນວ່າ ເສດຖະກິດໂລກຍັງຕ້ອງປະເຊີນໜ້າກັບບາງຄວາມສ່ຽງໃຫຍ່, ໃນນັ້ນ, ມີ ຄວາມຂາດສະຖຽນລະພາບດ້ານ ພູມສາດການເມືອງ ແລະ ໄພເງິນເຟີ້ສູງໃນໄລຍະຍາວ, ພິເສດແມ່ນໃນຂົງເຂດການບໍລິການ, ເຮັດໃຫ້ລາຍຮັບ ແລະ ກໍາລັງຊື້ຂອງປະຊາຊົນຫຼຸດລົງ…
ສະເໜີເພື່ອໃຫ້ເພື່ອນຜູ້ອ່ານໄດ້ຮັບຮູ້ນໍ້?
