ບໍລິສັດ ອາຊີ-ໂປຕາສ ສາກົນ ມອບທຶນພັດທະນາບ້ານໃຫ້ 2 ເມືອງຂອງແຂວງຄໍາມ່ວນ

37

ບໍລິສັດ ອາຊີ-ໂປຕາສ ສາກົນ ໄດ້ມອບທຶນພັດທະນາບ້ານ (ໂຄງການພັດທະນາສັງຄົມ) ປະຈຳປີ 2024 ໃຫ້ແກ່ບ້ານອ້ອມຂ້າງໂຄງການ ຢູ່ເມືອງທ່າແຂກ ແລະ ເມືອງໜອງບົກ ແຂວງຄຳມ່ວນ ພິທີຈັດຂຶ້ນວັນທີ 17 ພຶດສະພາ 2024 ທີ່ບໍລິສັດ ຊີໂນ-ອາກຣີ ໂປຕາສ ຈໍາກັດ ຢູ່ບ້ານດົງໃຕ້ ເມືອງທ່າແຂກ. ໂດຍມີ ທ່ານ ສີຫງວນ ອິນທະລາດ ຮອງເຈົ້າເມືອງ ທ່າແຂກ, ທ່ານ ຄໍາມອນ ພົມພິພັກ ຮອງເຈົ້າເມືອງໜອງບົກ, ທ່ານ ຈູ່ ຊຽງ ລີ້ ຮອງຜູ້ອໍານວຍການບໍລິສັດ ຊີໂນ-ອາກຣີ ໂປຕາສ ຈຳກັດ ພ້ອມດ້ວຍບັນດາພະແນກການທີ່ກ່ຽວຂ້ອງຂັ້ນແຂວງ ແລະ ເມືອງ, ຕະຫຼອດຮອດຕາງໜ້າການຈັດຕັ້ງບ້ານເປົ້າໝາຍ ອ້ອມຂ້າງໂຄງການທັງສອງເມືອງເຂົ້າຮ່ວມ.

May be an image of 8 people, dais and text
ທຶນ ປະກອບສ່ວນພັດທະນາບ້ານ ຄັ້ງນີ້ ລວມມູນຄ່າທັງໝົດ 1,8 ຕື້ກວ່າກີບ, ໃນນີ້ຂອງບໍລິສັດ ຊີໂນ-ອາກຣີ ພັດທະນາບໍ່ແຮ່ ຈຳກັດ ມອບໃຫ້ເມືອງໜອງບົກມູນຄ່າ 1 ຕື້ກວ່າກີບ, ເຊິ່ງປະກອບມີ 12 ບ້ານທີ່ໄດ້ຮັບທຶນດັ່ງກ່າວຄື: ບ້ານ ນາຄໍາ, ດົງບູນ, ໂນນຈິກ, ດົງຄຸງ, ໜອງຜໍາ, ນານ້ອຍ, ໂນນແຕ້, ໂນນສີລາ, ຊຽງຫວາງທົ່ງ, ໜອງປາຫຼາດ, ດົງຍາງ ແລະ ບ້ານ ດົງຂວາງ, ໂດຍໄດ້ຈັດແບ່ງການຊ່ວຍເຫຼືອໃຫ້ແຕ່ລະບ້ານ ນັບແຕ່ມູນຄ່າ 21 ລ້ານ ຫາ 375 ລ້ານກີບ. ສໍາລັບເມືອງທ່າແຂກທາງບໍລິສັດ ຊີໂນ-ອາກຣີ ໂປຕາສ ຈຳກັດ ໄດ້ມອບທຶນພັດທະນາບ້ານປະຈຳປີ 2024 ໃຫ້ແກ່ບ້ານອ້ອມຂ້າງໂຄງການ ລວມມູນຄ່າ 738 ລ້ານກວ່າກີບ, ໃນຈໍານວນ 10 ບ້ານຄື: ບ້ານດົງໃຕ້, ນາດິນຈີ່, ນາໂພທ່າ, ໜອງຫ່າງ, ໂຄກປ່າທ່ອນ, ດົງຊອກ-ໂພນໄຊ, ດອນທົ່ງ, ໂນນຕູມ, ທ່າແຮ່ ແລະ ບ້ານ ທ່າງາມ ແລະ ໄດ້ຈັດແບ່ງ ການຊ່ວຍເຫຼຶອໃຫ້ບັນດາບ້ານນັບແຕ່ມູນຄ່າ 26 ລ້ານ ຫາ 160 ລ້ານກີບ.ໂດຍມີເປົ້າໝາຍເພື່ອນໍາໄປພັດທະນາ ບັນດາພື້ນຖານໂຄງລ່າງທີ່ຈໍາເປັນຂອງບ້ານ ເປັນຕົ້ນແມ່ນ ການປັບປຸງໂຮງຮຽນ, ສົ່ງເສີມທຶນການສຶກສາ, ປັບປຸງເສັ້ນທາງ, ບັບປຸງສຸກສາລາ, ພັດທະນາອາຊີບ, ສົ່ງເສີມການຜະລິດກະສິກຳ ແລະ ໂຄງການອື່ນໆ ທີ່ຕອບສະໜອງດ້ານສາທາລະນະປະໂຫຍດໃຫ້ແກ່ສັງຄົມ ກໍ່ຄືບັນດາບ້ານອ້ອມຂ້າງໂຄງການໄດ້ຮັບການພັດທະນາຢ່າງຕໍ່ເນື່ອງໃນແຕ່ລະປີ ແລະ ທັງເພື່ອປະຕິບັດຕາມແຜນພັດທະນາຊຸມຊົນ (ບ້ານທີ່ຕິດພັນກັບໂຄງການ) ໂຄງການຂຸດຄົ້ນ ແລະ ປຸງແຕ່ງເກືອໂປຕາສ 1 ລ້ານໂຕນ ແລະ 2 ລ້ານໂຕນ/ປີ ຂອງ ບໍລິສັດ ຊີໂນ-ອາກຣີ ພັດທະນາບໍ່ແຮ່ຈຳກັດ ແລະ ບໍລິສັດຊີໂນ-ອາກຣີ ໂປຕາສ ຈໍາກັດ ເຊິ່ງທັງສອງບໍລິສັດແມ່ນຂຶ້ນກັບບໍລິສັດອາຊີ-ໂປຕາສ ສາກົນ.

ໄລຍະປີ 2023 ຜ່ານມາ ບໍລິສັດ ຊີໂນ-ອາກຣີ ພັດທະນາບໍ່ແຮ່ ຈຳກັດ ໄດ້ປະກອບທຶນຢ່າງຫຼວງຫຼາຍ ເຂົ້າໃນ (ໂຄງການພັດທະນາສັງຄົມ) ຢູ່ບັນດາບ້ານອ້ອມຂ້າງໂຄງການຂອງ 2 ເມືອງ ທ່າແຂກ ແລະ ເມືອງໜອງບົກ ລວມມູນຄ່າ 1,6 ຕື້ກວ່າກີບ ໃນນັ້ນ ບັນດາບ້ານອ້ອມຂ້າງໂຄງການຢູ່ເຂດເມືອງທ່າແຂກ ໄດ້ຮັບໃນມູນຄ່າ 692 ລ້ານກີບ ແລະ ບັນດາບ້ານອ້ອມຂ້າງໂຄງການຢູ່ເຂດເມືອງໜອງບົກ ໄດ້ຮັບໃນມູນຄ່າ 1 ຕື້ກວ່າກີບ.