ບຸນພະຈັນ ບໍ່ເຮັດໃຫ້ແຟນບານຜິດຫວັງກາຍເປັນນັກເຕະລາວ ຄົນທໍາອິດພາທີມຄວ້າ 2 ແຊັມທີ່ ກໍາປູເຈຍ

214

ບຸນພະຈັນ ບຸນກອງ ກອງໜ້າຫົວໜ້າທີມຊາດລາວ ຊຸດໃຫຍ່ ກາຍເປັນນັກເຕະລາວຄົນທໍາອິດໃນປະຫວັດສາດທີ່ພາ Preah Khan Reach Svay Rieng FC ຄວ້າແຊັມໄດ້ເຖິງ 2 ລາຍການໃນການແຂ່ງຂັນບານເຕະທີ່ປະເທດກໍາປູເຈຍ ໄດ້ແກ່ ກໍາປູເຈຍ ພຣີເມຍລີກ ແລະ ແຊັມລາຍການຊີງຂັນ Hun Sen Cup 2024 ໄປຄອງຢ່າງຍິ່ງໃຫຍ່.
ບຸນພະຈັນ ບຸນກອງ ຕັດສິນໃຈຍ້າຍຈາກ ຊ້າງນ້ອຍ ເອັຟຊີ ແຊັມເປບຊີ ລາວລີກ 1 ລະດູການ 2023 ໄປຢູ່ກັບ Preah Khan Reach Svay Rieng FC ທີມຊັ້ນນໍາໃນລີກສູງສຸດຂອງປະເທດກໍາປູເຈຍ ສາມາດສ້າງຜົນງານຢ່າງໂດດເດັ່ນລົງສະໜາມ 25 ນັດຍິງໄປເຖິງ 11 ປະຕູພາທີມຊະນະ 22, ສະເໝີ 3 ແລະ ເສຍ 2 ນັດຈາກທັງໝົດ 27 ນັດມີ 69 ຄະແນນຄວ້າແຊັມກໍາປູເຈຍ ພຣີເມຍລີກ 2023-2024 ໄປຄອງ, ສ່ວນອັນດັບ 2 ເປັນຂອງ ພະນົມເປັນ ຄລາວ ລົງສະໜາມ 27 ນັດມີ 64 ຄະແນນ.
ຫຼ້າສຸດໃນທ້າຍອາທິດທີ່ຜ່ານມາ ທາງຝ່າຍຈັດການແຂ່ງຂັນ ກໍາປູເຈຍ ພຣີເມຍລີກ ໄດ້ມີພິທີມອບຂັນແຊັມຢ່າງເປັນທາງການໃຫ້ກັບ Preah Khan Reach Svay Rieng FC ຢ່າງຍິ່ງໃຫຍ່, ໃນນັ້ນ ບຸນພະຈັນ ບຸນກອງ ກໍໄດ້ຂຶ້ນຮັບຂັນແຊັມຢ່າງຍິ່ງໃຫຍ່ ແລະ ມີແຟນບານຊາວກໍາປູເຈຍ ມາຮ່ວມສະຫຼອງແຊັມ ແລະ ຖ່າຍຮູບກັນຢ່າງປະທັບໃຈ ພ້ອມກັບຖືທຸງຊາດລາວ ຢ່າງສະຫງ່າຜ່າເຜີຍ ເຊິ່ງແຊັມລາຍການເປັນແຊັມລາຍການທີ 2 ຂອງ ບຸນພະຈັນ ກັບ ສະໂມສອນດັ່ງກ່າວ ເພາະກ່ອນໜ້ານີ້ ບຸນພະຈັນ ກໍພາທີມໄດ້ແຊ້ມລາຍການ Hun Sen Cup 2024 ເຊິ່ງເປັນລາຍການຊີງຂັນຂອງສະໂມສອນໃນປະເທດກໍາປູເຈຍ.
ຫຼ້າສຸດວັນທີ 16 ພຶດສະພາ 2024 ທີມຂ່າວພວກເຮົາໄດ້ຕິດຕໍ່ຫາ ບຸນພະຈັນ ທີ່ຍັງຢູ່ໃນປະເທດກໍາປູເຈຍ ໂດຍລາວເປີດເຜີຍວ່າ: ” ພູມໃຈເປັນທີ່ສຸດທີ່ນ້ອງໄດ້ມາຫຼິ້ນໃນລີກນອກປະເທດຄັ້ງທໍາອິດກໍສາມາດຍາດໄດ້ 2 ແຊັມທີ່ກໍາປູເຈຍ, ການທີ່ໄດ້ມາຫຼິ້ນຢູ່ກໍາປູເຈຍ ນ້ອງສາມາດຍາດໄດ້ຫຼາຍຢ່າງ ແລະ ກະມີຫຼາຍຢ່າງໃຫ້ເຮົາເຫັນ ຢູ່ນີ້ກະຄືໆກັນກັບຢູ່ລາວເຮົາ, ການແຂ່ງຂັນຢູ່ນີ້ເຫັນຫຼາຍໆທີມພັດທະນາຂຶ້ນຫຼາຍ ແຕ່ສິ່ງສຳຄັນຄືການປັບຕົວເຂົ້າກັບທີມ ຈົບໄປລະດູການ 1 ຖືວ່າ ນ້ອງເຮັດໄດ້ດີ ແລະ ສື່ສານກັບທີມ. ຢ່າງໃດກໍຕາມ ນ້ອງຕ້ອງພັດທະນາຕົວເອງຂຶ້ນໄປຕື່ມອີກ ແລະ ຕ້ອງຂໍຂອບໃຈເປັນຢ່າງສູງກັບ Preah Khan Reach Svay Rieng ທີ່ໃຫ້ໂອກາດ ແລະ ຂອບໃຈແຟນບານທີ່ໃຫ້ກໍາລັງໃຈຕະຫຼອດມາ ແນ່ນອນລະດູການຕໍ່ໄປຖ້ານ້ອງຍັງໄດ້ຮັບໂອກາດກໍຈະພ້ອມເດີນໜ້າ ແລະ ພັດທະນາຕໍ່ໄປ ”.
ຂ່າວ: Larh Creators; ຮູບຈາກ: Preah Khan Reach Svay Rieng FC