ແຜນການຈັດເກັບລາຍຮັບງົບປະມານຂອງແຂວງສາລະວັນ ໃນປີ 2024 ເປົ້າໝາຍຈັດເກັບລາຍຮັບ 205,7 ຕື້ກວ່າກີບ ເພື່ອເຮັດໃຫ້ແຜນການດັ່ງກ່າວບັນລຸຕາມຄາດໝາຍທີ່ກຳນົດໄວ້ ແຂວງສາລະວັນ ໄດ້ກຳນົດ 7 ມາດຕະການຈັດຕັ້ງປະຕິບັດ.
ທ່ານ ພອນປະເສີດ ລາຊາໂພ ຫົວໜ້າພະແນກການເງິນ ແຂວງສາລະວັນ ໄດ້ລາຍງານໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ວ່າ: ແຜນລາຍຮັບ ປະຈຳປີ 2024 ອີງຕາມແຈ້ງການຂອງກະຊວງການເງິນ ເລກທີ 3857/ກງ ລົງວັນທີ 1 ທັນວາ 2023 ໄດ້ຕັ້ງເປົ້າໝາຍຈັດເກັບລາຍຮັບ 205,7 ຕື້ກວ່າກີບ, ໃນນັ້ນ ພາສີ ( ລາຍຮັບສູນກາງ ) 85,4 ຕື້ກວ່າກີບ, ລາຍຮັບຂອງແຂວງ 120,3 ຕື້ກວ່າກີບ; ໃນນັ້ນ ສ່ວຍສາອາກອນ 111,5 ຕື້ກວ່າກີບ, ຄຸ້ມຄອງຊັບສິນແຫ່ງລັດ 8,6 ຕື້ກວ່າກີບ, ຄຸ້ມຄອງວິສາຫະກິດ 200 ລ້ານກວ່າກີບ.
ເພື່ອເຮັດໃຫ້ແຜນການດັ່ງກ່າວ ບັນລຸຕາມຄາດໝາຍທີ່ກຳນົດໄວ້ ແຂວງສາລະວັນ ໄດ້ວາງ 7 ມາດຕະການຈັດຕັ້ງປະຕິບັດ ຄື:
1). ມອບໃຫ້ຄະນະພັກ ຄະນະນໍາແຕ່ລະຂັ້ນຂອງຂະແໜງການເງິນ ໃນທົ່ວແຂວງຈັດຕັ້ງເຜີຍແຜ່, ເຊື່ອມຊຶມໃຫ້ພະນັກງານ – ລັດຖະກອນ ພາຍໃນຂະແໜງການຕົນຮັບຜິດຊອບໃຫ້ເລິກເຊິ່ງ, ກວ້າງ ຂວາງ ຮັບປະກັນຜົນສໍາເລັດໃນການຈັດຕັ້ງປະຕິບັດ ໃຫ້ບັນລຸຄາດໝາຍທີ່ວາງໄວ້.
2). ສືບຕໍ່ສຶກສາອົບຮົມການເມືອງ – ແນວຄິດ, ຍົກລະດັບ ຄວາມຮູ້, ຄວາມສາມາດໃຫ້ແກ່ພະນັກງານລັດຖະກອນ ພາຍໃນຂະແໜງການເງິນທຸກຂັ້ນ ແລະ ປັບປຸງວຽກງານການເງິນຫັນສູ່ທັນສະໄໝຢ່າງແຂງແຮງຮອບດ້ານ ໂດຍການປັບປຸງກົງຈັກການຈັດຕັ້ງ, ສັບຊ້ອນ, ຈັດວາງພະນັກງານ ແລະ ກໍານົດຕໍາແໜ່ງງານໃຫ້ແທດເໝາະກັບຄວາມ ຮຽກຮ້ອງຕ້ອງການ, ປັບປຸງກົນໄກ ແລະ ລະບຽບການຄຸ້ມຄອງການເກັບລາຍຮັບ, ຄຸ້ມຄອງລາຍຈ່າຍໃຫ້ຮັດກຸມກວ່າເກົ່າ ໂດຍຫັນໄປສູ່ລະບົບການຄຸ້ມຄອງແບບທັນສະໄໝ ແລະ ເຂົ້າສູ່ລະບົບທະນາຄານໃນເຂດທີ່ມີເງື່ອນໄຂ ເພື່ອເຮັດໃຫ້ມີຄວາມໂປ່ງໃສ, ແກ້ໄຂປາກົດການຫຍໍ້ທໍ້ໃນຖັນແຖວພະນັກງານຢ່າງເຂັ້ມງວດ, ຕິດຕາມ, ກວດກາ ການປະຕິບັດໜ້າທີ່ວິຊາສະເພາະຂອງພະນັກງານຢ່າງເປັນປົກກະຕິ – ຕໍ່ເນື່ອງ.
3). ສໍາລັບການເບີກຈ່າຍເງິນເດືອນໃຫ້ແກ່ພະນັກງານ – ລັດຖະກອນ ໃນງວດທີ 1 ປີ 2024 ສະເໜີໃຫ້ບັນດາພະແນກການເອົາຂໍ້ມູນຈໍານວນພົນ ງວດທີ 4 ປີ 2023 ໄປຜ່ານພະແນກພາຍໃນ ເພື່ອເຊັນຢັ້ງຢືນຄວາມຖືກຕ້ອງ ລວມທັງຂໍ້ມູນດ້ານຈໍານວນພົນຂອງເມືອງ, ກໍລະນີພະແນກການອ້ອມຂ້າງ ແຂວງ ຫຼື ເມືອງ ຫາກມີການດັດແກ້ຊັ້ນ – ຂັ້ນເງິນເດືອນໃໝ່ ສະເໜີໃຫ້ຄິດໄລ່ໃນງວດ 2 ປີ 2024. ການປະກອບເອກະສານສະເໜີອະນຸມັດຈ່າຍເງິນເດືອນ ແນະນຳໃຫ້ຍື່ນເອກະສານຢູ່ພະແນກການເງິນ ( ຂະແໜງງົບປະມານ ) ຊ້າສຸດບໍ່ໃຫ້ກາຍວັນທີ 15 ມັງກອນ ປີ 2024 ເພື່ອກວດກາ ແລະ ອະນຸມັດລົງຄັງ. ສຳລັບການອະນຸມັດເງິນເດືອນ – ເງິນນະໂຍບາຍຕ່າງໆ ໃນງວດທີ 1 ປີ 2024 ແມ່ນອະນຸມັດຢູ່ຂັ້ນແຂວງບ່ອນດຽວ.
4). ເອົາໃຈໃສ່ວຽກງານກວດກາ ແລະ ແກ້ໄຂຜົນການກວດສອບຢ່າງເປັນຮູບປະທຳ, ເລັ່ງທວງ ແລະ ເກັບຄືນລາຍຮັບທີ່ຄ້າງມອບຈາກວິສາຫະກິດ, ໂຄງການສຳປະທານ, ຄ່າທຳນຽມ, ຄ່າບໍລິການ, ຄ່າເຊົ່າ – ສຳປະທານທີ່ດິນ ແລະ ເກັບກູ້ຄືນ ລາຍຮັບທີ່ກວດເຫັນເພີ່ມຈາກຜົນການກວດ ສອບ – ກວດກາ ແລະ ລາຍຮັບອື່ນໆທີ່ຍັງຄ້າງນຳຫົວໜ່ວຍງົບປະມານ ທີ່ຖືກກວດສອບແຕ່ປີຜ່ານມາໃຫ້ຄົບຖ້ວນ.
5). ແນະນຳພະແນກການ, ກົມກອງ, ຫົວໜ່ວຍງົບປະມານລັດ ຖືບັນຊີຕາມມາດຕະຖານສາກົນ ນຳໃຊ້ຫຼັກການບັນຊີຄູ່ ໃນການບັນທຶກຈົດກ່າຍບັນຊີຕາມລໍາດັບລາຍການເຄື່ອນໄຫວ ເກີດຂຶ້ນເຂົ້າປຶ້ມບັນຊີປະຈຳວັນສຳຮອງ ແລະ ປຶ້ມປະຈໍາວັນທົ່ວໄປໃຫ້ຖືກຕ້ອງ, ຄົບຖ້ວນ, ຊັດເຈນ ແລະ ທັນເວລາ.
6). ສ້າງແຜນເຄື່ອນໄຫວເປັນອັນລະອຽດ ໃນແຕ່ລະກຸ່ມວຽກ, ຊຸກຍູ້, ຕິດຕາມ ແລະ ປະເມີນຜົນການຈັດຕັ້ງປະຕິບັດຢ່າງເຄັ່ງຄັດ ແລະ
7). ເພີ່ມທະວີການປະສານສົມທົບກັບທຸກພາກສ່ວນທີ່ກ່ຽວຂ້ອງ ໃນການຄຸ້ມຄອງແຜນງົບປະມານແຫ່ງລັດ ບົນພື້ນຖານລະບຽບກົດໝາຍຢ່າງເຂັ້ມງວດ.