ວິທະຍຸກະຈາຍສຽງຫວຽດນາມ ລາຍງານວ່າ: ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໄດ້ຈັດກອງປະຊຸມ “ ຊຸກຍູ້ໂອກາດຮ່ວມມືໃນຂົງເຂດກະສິກຳ ” ຂຶ້ນໃນຕອນບ່າຍວັນທີ 13 ພຶດສະພາ ຢູ່ຮ່າໂນ້ຍ ດ້ວຍການເຂົ້າຮ່ວມຂອງທູດການຄ້າ ແລະ ກະສິກຳຂອງບາງປະເທດທີ່ມີພື້ນຖານກະສິກຳພັດທະນາໃນໂລກ.
ໃນທີ່ກອງປະຊຸມ, ບັນດາຜູ້ແທນຖືວ່າ ຫວຽດນາມ ນອນໃນກຸ່ມ 15 ປະເທດສົ່ງອອກຜະລິດຕະພັນກະເສດໃຫຍ່ທີ່ສຸດໃນໂລກ ແລະ ຢືນອັນດັບທີ 2 ຢູ່ພາກພື້ນອາຊີຕາເວັນອອກສ່ຽງໃຕ້.
ຫວຽດນາມ ມີບົດບາດສຳຄັນໃນລະບົບມູນຄ່າ ແລະ ແມ່ນປະເທດຕັ້ງໜ້າເຂົ້າຮ່ວມໃນລະບົບທັນຍາຫານ, ສະບຽງອາຫານທົ່ວໂລກ. ປັດຈຸບັນ, ການເຕີບໂຕ GDP ໃນຂະແໜງກະສິກຳພວມກວມເອົາ 12% ຍອດ GDP ຂອງພື້ນຖານເສດຖະກິດ, ດ້ວຍພົນລະເມືອງກວ່າ 60% ທີ່ພວມດຳລົງຊີວິດຢູ່ເຂດຊົນນະບົດ.
ທ່ານ ເລມິງຮວານ ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ເນັ້ນໜັກວ່າ: “ ຫວຽດນາມ ປາດຖະໜາຢາກຊຸກຍູ້ເສດຖະກິດເວົ້າລວມ, ໃນນັ້ນມີເສດຖະກິດກະສິກຳ. ຊຸກຍູ້ການແລກປ່ຽນການຄ້າ, ການລົງທຶນໃນຂົງເຂດກະສິກຳ ກໍຄືຊອກຫາການຮ່ວມມືໃນໄລຍະຈະມາເຖິງ. ໂອກາດຮ່ວມມືລະຫວ່າງ ຫວຽດນາມ ແລະ ບັນດາປະເທດແມ່ນຫຼາຍຢູ່ ແຕ່ເພື່ອຫັນໂອກາດນັ້ນໃຫ້ປາກົດຜົນເປັນຈິງ ຕ້ອງມີການເຂົ້າຮ່ວມຢ່າງຕັ້ງໜ້າຂອງບັນດາຄູ່ຮ່ວມມືສາກົນ ”.
