ສະຫະລັດອາເມຣິກາ ປະກາດມາດຕະການຂຶ້ນພາສີສິນຄ້າຈາກຈີນຮອບໃໝ່, ໃນນີ້ລົດອີວີ ຂຶ້ນພາສີ 4 ເທົ່າ ໂດຍມີຜົນບັງຄັບໃຊ້ຕັ້ງແຕ່ປີນີ້.
ສຳນັກຂ່າວຕ່າງປະເທດລາຍງານວ່າ: ທຳນຽບຂາວສະຫະລັດອາເມຣິກາ ຖະແຫຼງໃນວັນທີ14ພຶດສະພາ ວ່າ: ສະຫະລັດຈະໃຊ້ມາດຕະການທາງພາສີຕໍ່ສິນຄ້າຈີນ ເພື່ອປົກປ້ອງອຸດສາຫະກຳຂອງປະເທດ ເຊິ່ງກຳແພງພາສີຮອບໃໝ່ນີ້ ຈະກວມເອົາສິນຄ້າຈາກຈີນ ຄິດເປັນມູນຄ່າ 18 ຕື້ໂດລາສະຫະລັດ ແລະ ຈະມີຜົນບັງຄັບໃຊ້ຕັ້ງແຕ່ປີນີ້.
ສຳລັບສິນຄ້າທີ່ຖືກຂຶ້ນພາສີຄັ້ງນີ້ ສ່ວນໃຫຍ່ເປັນສິນຄ້າໃນກຸ່ມອຸດສາຫະກຳເປົ້າໝາຍທີ່ສະຫະລັດອາເມຣິກາ ສະແດງຄວາມກັງວົນ ເຊັ່ນ: ລົດໄຟຟ້າ( ອີວີ ) ຂຶ້ນພາສີຈາກເດີມ27,5% ເປັນ102,5%, ແຜງໂຊລາ ຂຶ້ນພາສີຈາກ 25% ເປັນ 50%, ແບັດເຕີຣີທຽມໄລອອນ ຂຶ້ນຈາກ 7,5% ເປັນ 25%.
ສິນຄ້າສ່ວນໃຫຍ່ທີ່ຖືກຂຶ້ນພາສີໃນຄັ້ງນີ້ ຈະມີຜົນບັງຄັບໃຊ້ຕັ້ງແຕ່ປີ 2024 ເປັນຕົ້ນໄປ ແຕ່ບາງລາຍການເຊັ່ນແບັດເຕີຣີ ແລະ ກຣາໄຟທຳມະຊາດ ຈະມີໄລຍະປັບຕົວໂດຍຄ່ອຍໆມີຜົນບັງຄັບໃຊ້ໃນພາຍຫຼັງ.
