ບໍລິສັດ ປຕທ ມີລາຍຮັບໃນໄຕມາດ 1 ທີ່ 782,2 ຕື້ກວ່າບາດ ເພີ່ມຂຶ້ນ 3,4% ຈາກໄລຍະດຽວກັນຂອງປີຜ່ານມາ ແລະ ມີກຳໄລສຸດທິ 28,9 ຕື້ບາດ ເພີ່ມຂຶ້ນ 4%.
ທ່ານ ຄົງກະພັນ ອິນທະຣະແຈ້ງ ປະທານເຈົ້າໜ້າທີ່ບໍລິຫານ ແລະ ກໍາມະການຜູ້ຈັດການໃຫຍ່ ບໍລິສັດ ປຕທ ຈຳກັດ( ມະຫາຊົນ ) ບໍລິສັດພະລັງງານລາຍໃຫຍ່ຂອງປະເທດໄທ ໄດ້ແຈ້ງຜ່ານຕະຫຼາດຫຼັກຊັບແຫ່ງປະເທດໄທ ວ່າໃນໄຕມາດ 1 ປີ 2024 ປຕທ ແລະ ບໍລິສັດຍ່ອຍມີລາຍໄດ້ຈາກການຂາຍ 782,2 ຕື້ບາດ ເພີ່ມຂຶ້ນ25,5 ຕື້ບາດ ຫຼື 3,4% ຈາກໄຕມາດ 1 ປີ 2023.
ກຸ່ມທຸລະກິດການຄ້າລະ ຫວ່າງປະເທດຂະຫຍາຍຕົວຢ່າງເຂັ້ມແຂງ ຈາກປະລິມານການຂາຍທີ່ເພີ່ມຂຶ້ນຕາມການຟື້ນຕົວຂອງເສດຖະກິດ ແລະ ກຸ່ມທຸລະກິດ ປີໂຕເຄມີ ແລະ ການກັ່ນມີລາຍໄດ້ຈາກການຂາຍເພີ່ມຂຶ້ນ.
ຢ່າງໃດກໍຕາມ, ກຸ່ມທຸລະກິດ ນໍ້າມັນ ແລະ ການຄ້າຍ່ອຍມີລາຍໄດ້ຫຼຸດລົງຕາມປະລິມານການຂາຍລວມ; ດ້ານການຂາຍນໍ້າມັນກາຊວນ ແລະ ນໍ້າມັນຍົນ ຫຼຸດລົງຕາມລາຄາປີໂຕລ້ຽມໃນຕະຫຼາດໂລກ.
ນອກຈາກນີ້, ກຸ່ມທຸລະກິດ ແກ໊ສທຳມະຊາດມີລາຍໄດ້ຈາກການຂາຍຫຼຸດລົງ; ສ່ວນທຸລະກິດທໍ່ສົ່ງແກ໊ສມີລາຍໄດ້ເພີ່ມຂຶ້ນຕາມປະລິມານຄ່າຈອງໃຊ້ທໍ່ທີ່ເພີ່ມຂຶ້ນ ອີກທັງທຸລະກິດໂຮງແຍກແກ໊ສມີລາຍໄດ້ຈາກການຂາຍເພີ່ມຂຶ້ນຈາກທັງປະລິມານການຂາຍແລະ ລາຄາສະເລ່ຍທີ່ເພີ່ມຂຶ້ນ.
