ເກີນດູນການຄ້າຄືສິ່ງທີ່ທຸກຄົນໃຫ້ເປັນເພາະນັ້ນໝາຍເຖິງເຮົາໄດ້ສົ່ງອອກຫຼາຍກວ່ານຳເຂົ້າຖືວ່າປະຊາຊົນທ້ອງຖິ່ນມີກຳລັງການຜະລິດຫຼາຍ ແລະມີລາຍໄດ້ຈາກການຂາຍອອກຫຼາຍກວ່າຊື້ເຂົ້າມາ ແຕ່ກໍ່ບໍແມ່ນເລື່ອງງ່າຍປານໃດ ແນວໃດກໍ່ຕາມສຳລັບແຂວງເຊກອງຕາມຂ່າວລາຍງານຫຼ້າສຸດນີ້ແມ່ນໄດ້ເກີນດູນການຄ້າເກືອບ 60 ລ້ານໂດລາ ນັບວ່າເປັນຂ່າວດີສຸດທ່າມກາງຄວາມຫຍຸ້ງຍາກທາງເສດຖະກິດ.
ຕາມການລາຍງານຂອງທ່ານ ສີສຸພັນ ມະຫາວົງ ຫົວໜ້າຫ້ອງວ່າການແຂວງເຊກອງ ເມື່ອບໍ່ດົນນີ້ໃຫ້ຮູ້ວ່າ: ໃນໄລຍະ 4 ເດືອນຕົ້ນປີ 2024 ນີ້ແຂວງເຊກອງໄດ້ຜະລິດເຂົ້ານາແຊງບັນລຸ 3.976 ໂຕນ, ພືດສະບຽງອາຫານ 6.021 ໂຕນ ແລະ ພືດເປັນສິນຄ້າ 10.248 ໂຕນ. ພ້ອມນີ້, ກໍໄດ້ເອົາໃຈໃສ່ສົ່ງເສີມຜູ້ປະກອບການສ້າງຜະລິດຕະພັນສິນຄ້າໂອດ໋ອບ (ODOP) ທີ່ມີມາດຕະຖານ ມີທ່າອ່ຽງເພີ່ມຂຶ້ນ ສາມາດຮັບຮອງໄດ້ກາໝາຍໜຶ່ງເມືອງໜຶ່ງຜະລິດຕະພັນທັງໝົດ 11 ຫົວໜ່ວຍ 14 ລາຍການ, ສ້າງສະພາບແວດລ້ອມທີ່ອໍານວຍຄວາມສະດວກໃຫ້ພາກທຸລະກິດ ແລະ ພັດທະນາທຸລະກິດຂະໜາດນ້ອຍແລະຂະໜາດກາງ(SME)ໄປສູ່ຄຸນນະພາບໃໝ່ໃຫ້ເຂັ້ມແຂງ, ປະຕິບັດການນໍາເຂົ້າສິນຄ້າໄດ້ທັງໝົດ 5 ແສນກວ່າໂດລາ ເທົ່າກັບ 2,78% ຂອງແຜນການແລະ ສົ່ງອອກບັນລຸໄດ້ 59,16 ລ້ານໂດລາ ເທົ່າກັບ 23,11% ຂອງແຜນການເຮັດໃຫ້ແຂວງໄດ້ເກີນດຸ່ນການຄ້າ58ລ້ານກວ່າໂດລາສະຫະລັດ.
ທ່ານ ສີສຸພັນ ມະຫາວົງ ໃຫ້ຮູ້ຕື່ມວ່າ: ເພື່ອເຮັດໃຫ້ເສດຖະກິດ-ສັງຄົມຂະຫຍາຍຕົວ, ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ມີປະສິດທິພາບ-ປະສິດທິຜົນ, ແຂວງຈະສຸມໃສ່ຊຸກຍູ້ສົ່ງເສີມການຜະລິດ, ໃຫ້ພຽງພໍກັບຄວາມຕ້ອງການບໍລິໂພກພາຍໃນ ແລະ ສົ່ງອອກເປັນສິນຄ້າ ຕາມເງື່ອນໄຂຕົວຈິງຂອງແຂວງ, ເອົາໃຈໃສ່ຄຸ້ມຄອງລາຄາສິນຄ້າ, ການນໍາເຂົ້າ-ສົ່ງອອກສິນຄ້າ, ສະໜອງສະບຽງອາຫານໃຫ້ແກ່ໂຄງການໃຫຍ່ທີ່ດໍາເນີນຢູ່ທ້ອງຖິ່ນໃຫ້ເປັນຮູບປະທໍາ ເພື່ອຊ່ວຍໜູນການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກຂອງປະຊາຊົນ.
ຂ່າວຈາກ: ປະຊາຊົນ
