ບໍລິສັດອາເມຊອນ(Amazon) ແລະໄມໂຄຊອຟ(Microsoft) ກຽມລົງທຶນໃນຝຣັ່ງ ເກືອບ6ຕື້ໂດລາສະຫະລັດ ເພື່ອເພີ່ມໂຄງສ້າງພື້ນຖານ ຄລາວ ແລະ ເອໄອ ເຊິ່ງອາເມຊອນຄາດວ່າຈະສ້າງວຽກປະຈຳກວ່າ3.000ຕຳແໜ່ງ.
ສຳນັກຂ່າວຣອຍເຕີ ລາຍງານວ່າ: ບໍລິສັດອາເມຊອນ ປະກາດວ່າບໍລິສັດຈະລົງທຶນ1,3ຕື້ໂດລາສະຫະລັດ ໃນການດຳເນີນງານໃນຝຣັ່ງ ແລະ ຈະສ້າງວຽກປະຈຳຫຼາຍກວ່າ3.000ຕໍາແໜ່ງ.
ທັງນີ້ປະທານາທິບໍດີຝຣັ່ງ ເຄີຍກ່າວໄວ້ເມື່ອວັນອາທິດຜ່ານມາວ່າ: ອາເມຊອນ ແລະ ບໍລິສັດອື່ນໆ ລວມເຖິງຈີເອສເຄ ພີແອລເຄ ບໍລິສັດຈາກອັງກິດແລະ Accentureບໍລິສັດທີ່ປຶກສາດ້ານເທັກໂນໂລຊີ ຈະປະກາດການລົງທຶນມູນຄ່າຫຼາຍຕື້ເອີໂຣ.
ໃນຖະແຫຼງການຂອງບໍລິສັດ ອາເມຊອນ ລະບຸວ່າ: ການລົງທຶນຂອງ Amazon Web Services (AWS)ຈະຊ່ວຍເພີ່ມໂຄງສ້າງພື້ນຖານຄລາວໃນປາຣີ ເພື່ອສະໜັບສະໜູນໂອກາດອັນພົ້ນເດັ່ນຂອງປັນຍາປະດິດໃນຝຣັ່ງ. ນອກຈາກນີ້ ຍັງຈະຊ່ວຍເພີ່ມໂຄງສ້າງພື້ນຖານດ້ານເຕັກໂນໂລຊີໃນພາກພື້ນອີກ.
ຂະນະທີ່ໄມໂຄຊອຟ ຍັກໃຫຍ່ ດ້ານເທັກໂນໂລຊີ ແລະ ຊອຟແວ ກຽມລົງທຶນ 4,3 ຕື້ໂດລາສະຫະລັດ ພັດທະນາເອໄອ ໃນຝຣັ່ງ ຕາມທີ່ແບດ ສະມິດ ປະທານບໍລິສັດໄມໂຄຊອຟໃຫ້ສຳພາດກັບໜັງສືພິມ Le Figaro.
ການປະກາດລົງທຶນດັ່ງກ່າວເປັນສ່ວນໜຶ່ງຂອງການປະຊຸມສຸດຍອດທຸລະກິດ’Choose France’ ປະຈຳປີ ທີ່ຝຣັ່ງໃນອາທິດນີ້
