ປັດຈຸບັນຄອມພິວເຕີໄດ້ກາຍເປັນສ່ວນໜຶ່ງທີ່ສໍາຄັນໃນການເຮັດວຽກ ຖ້າໃຊ້ບໍ່ຖືກວິທີ ຫຼື ເກີນຂີດຈໍາກັດເກີນໄປ ຈະເຮັດໃຫ້ເກີດບັນຫາການປວດຕາ, ແສບຕາ, ສູ້ແສງບໍ່ໄດ້ ເນື່ອງຈາກການໃຊ້ສາຍຕາຈ້ອງເບິ່ງຄອມພິວເຕີເກີນໄປ ເຊິ່ງອາການປວດຕາເກີດຈາກ: ການເບິ່ງຄອມພິວເຕີໄລຍະໃກ້ເພື່ອໃຫ້ເຫັນຊັດເຈນ, ແສງຈາກຄອມພິວເຕີຈະກະຕຸ້ນການເຮັດວຽກຂອງຈໍປະສາດຕາ. ດັ່ງນັ້ນ ການເບິ່ງຄອມພິວເຕີຕິດຕໍ່ກັນເປັນເວລາດົນຫຼາຍຊົ່ວໂມງຫຼາຍວັນຈົນບໍ່ໄດ້ພັກສາຍຕາ ຫຼື ພັກຜ່ອນບໍ່ພຽງພໍ ຍິ່ງຈະເຮັດໃຫ້ປວດເມື່ອກ້າມເນື້ອຕາ ຜົນທີ່ຕາມມາກໍຄືການປວດຕາ, ແສບຕາ, ສູ້ແສງແດດບໍ່ໄດ້.
ເພື່ອຫຼຸດຜ່ອນອາການປວດຕາຈາກຄອມພິວເຕີໃຫ້ປະຕິບັດດັ່ງນີ້:
- ປັບຄວາມແຈ້ງຂອງຄອມພິວເຕີໃຫ້ເໝາະສົມກັບສະພາບແສງໃນບ່ອນເຮັດວຽກ ບໍ່ແຈ້ງ ແລະ ບໍ່ມືດຈົນເກີນໄປ, ຖ້າເປັນໄປໄດ້ຄວນນັ່ງເຮັດວຽກຢູ່ບ່ອນທີ່ມີແສງສະຫວ່າງພຽງພໍ ຊ່ວຍໃຫ້ເບິ່ງຄອມໄດ້ງ່າຍ ແລະ ແສງທໍາມະຊາດຍັງຊ່ວຍຕັດແສງຈາກໜ້າຈໍທີ່ເປັນອັນຕະລາຍຕໍ່ຕາໄດ້ບາງສ່ວນ.
- ປັບໄລຍະຫ່າງຂອງໜ້າຈໍ ເພີ່ມໄລຍະຫ່າງໃຫ້ຫຼາຍຂຶ້ນເພື່ອຫຼຸດການເກັງຂອງຂອບຕາ
- ປັບຄວາມຖີ່ຂອງໜ້າຈໍ (Refresh Rate) ໃຫ້ສູງຂຶ້ນໃນກໍລະນີທີ່ສາມາດປັບໄດ້
- ເມື່ອໃຊ້ຄອມພິວເຕີ 20-30ນາທີ ຄວນພັກສາຍຕາເປັນໄລຍະ ເພື່ອບໍ່ໃຫ້ໃຊ້ສາຍຕາໜັກເກີນໄປ ດ້ວຍການຫຼັບຕາ, ເບິ່ງໄປໄກໆ ແລະ ລຸກຍ່າງໄປເບິ່ງວິວທາງນອກ ເພື່ອໃຫ້ກ້າມເນື້ອຂອບຕາຜ່ອນຄາຍ
- ໃຊ້ແພຈຸບນໍ້າເຢັນແປະຂອບຕາໃນເບື້ອງຕົ້ນເພື່ອຫຼຸດອາການປວດ ແລະ ໃຊ້ແພຈຸບນໍ້າອຸ່ນແປະຂອບຕາອີກຄັ້ງເພື່ອໃຫ້ເລືອດໄຫຼວຽນດີຂຶ້ນ.
- ເມື່ອຮູ້ສຶກວ່າຕົນເອງຕາແຫ້ງຫຼັງຈາກທີ່ໃຊ້ຄອມພິວເຕີເປັນເວລາດົນ ຄວນຢອດນໍ້າຕາທຽມເພື່ອສ້າງຄວາມຊຸ່ມຊື່ນໃຫ້ກັບດວງຕາ ແລະ ສາມາດບັນເທົາອາການປວດຕາ ຫຼື ແສບຕາ
ການໃຊ້ສາຍຕາກັບຄອມເພື່ອເຮັດວຽກຕໍ່ເນື່ອງແບບບໍ່ຢຸດພັກ ເພາະຫວັງຢາກໃຫ້ວຽກແລ້ວໄວ ເຊິ່ງເປັນສິ່ງທີ່ບໍ່ຄວນເຮັດ ເຮົາຄວນຢຸດພັກ ໂດຍການລຸກດື່ມກາເຟ, ຟັງເພງເພີນໆກ່ອນໄປເຮັດວຽກຕໍ່ ຫຼື ໄປຍ່າງຫຼີ້ນຢູ່ທາງນອກຈິ່ງກັບມາເຮັດວຽກ. ການພັກຜ່ອນຊົ່ວຄາວເປັນການເພີ່ມສະມາທິໃຫ້ເຮົາເຮັດວຽກໄດ້ລ່ຽນໄຫຼຂຶ້ນ ແລະ ສົ່ງຜົນໃຫ້ປະສິດທິພາບການເຮັດວຽກດີຂຶ້ນ.
ຂໍ້ມູນຈາກ: OFM
